【梁齊昕拍戲？】讚特首女兒捱得苦 導演爆齊昕有「床戲」
2015-02-10 18:47:00
(攝影：馬建華)
特首女兒梁齊昕殺入影圈，處女下海拍戲，新戲導演劉俊輝及男角李逸朗（Don）現身記者會。
問到梁齊昕係咪會出現，劉導演話：「嚟﹗（佢係咪答應咗？）係呀，簽埋約。」
係咪重金禮聘？佢話：「好難講，有錢人認為唔重，有啲人就認為重，六位數字囉。」劉導演話齊昕於新戲角色演社工，並與Don演情侶。點解搵齊昕？佢表示：「有演戲細胞，佢又鍾意演戲，咪培育下細路女。」
問到齊昕於戲中係咪有床戲？佢話：「有床戲，佢成日喺床上食朱古力，成日畀蟻咬。（親熱戲嗰種喎？）談情嗰啲囉，（着比堅尼？）睇下佢兩個拍拖有冇游水。」
咁齊昕有冇講乜嘢底線或唔拍得？劉導表示：「佢畀我拍都唔拍。（係咪驚佢背景？）唔係，分分鐘上大陸嘛，（二級定三級？）有時可能戲中會兩句粗口。（齊昕講粗口？）戲中嘅壞人。」劉俊輝表示呢部戲全部喺香港拍，於三月八日喺開鏡，會投資千萬拍攝，佢又話今次戲中新人好多。
知唔知齊昕有冇問過爸爸意見？佢話：「我諗呢方面冇要求佢，佢大個女，20幾歲，自己作主，佢應該有同父母溝通。」有冇收到乜嘢部門，叫佢處理題材要審慎啲？導演再說：「我拍戲之嘛，理得係乜嘢背景，娛樂觀眾之嘛。」
幾時搵齊昕拍戲？「簽咗個幾兩個月。（傾過程傾幾耐？）都係個幾月。（打動齊昕拍戲？）唔使，佢鍾意拍戲，我又係拍戲。」咁有冇見過特首梁振英？劉導笑言：「見佢都冇用，佢亦都唔會見我。」問到驚唔驚佢爸爸搵你？佢話：「見到就請佢食飯。（驚唔驚佢媽媽搵你？）見到就請佢飲茶﹗」
問到齊昕有冇乜嘢擔心？導演讚：「佢好捱得苦，點辛苦都唔驚。（叫佢唔好化濃妝？）冇呀。」
咁覺唔覺得齊昕反叛？佢話：「每個聰明女孩子都係反叛，除非戇居居坐坑渠邊就唔反叛。（有冇試戲？）試咗，OK，唔OK都唔要佢。試戲都係畀稿佢讀，叫佢講下對白，佢OK。」
劉導演話齊昕於新戲角色演社工。
導演又話齊昕好捱得苦。
|
鍾意就快D Share啦！
|
|
|