真人騷
離𡃁模太遠了 周秀娜：我唔係得身材好！
05年入行做老臨， 09年出版第一本寫真，趕在入行第十年、 30歲前，已經拍過周星馳電影《西遊之降魔篇》、主演去年賣座港產愛情片《分手 100次》、又為即將上畫大卡士雲集的
賀歲片《浮華宴》擔大旗，我是真心誠意覺得周秀娜既是𡃁模始祖，亦是史上最成功轉型的𡃁模。
不過近年市面上的𡃁模已經淪落到要漏 M除底褲，我把讚美原話的「𡃁模」兩個字降低聲量，沒想到娜姐太敏感：
「做咩呀？係唔係我老得滯，你都講唔出口呢？」
非也非也！
首先年紀大一截仲年年出書爭認𡃁模嘅大有人在，其次以𡃁模做起點，至今已經離𡃁模太遠，還總提着𡃁模兩個字，是我怕娜姐怪罪就真！
「好多人認識我係因為身材，無疑佢係幫到自己好多，但係當所有人淨係見到我嘅身材，我就更加想俾人知，除咗身材好我仲有啲乜！」
「唔拍拖係因為我唔想去試，係就係㗎啦，我真係冇時間去試！」
「我唔係嗰啲會逃避現實嘅人，我鍾意解決問題，攤喺度唔理唔係我，只會令我冇辦法行到下一步。」
「我冇諗過我最終行到去邊，淨係會諗呢一刻做到啲乜，我就去做！」
我不是第一天認識周秀娜，不是第一次訪問周秀娜，這種強悍
這種決心這股衝勁，有點像當初那個漏奶食雪糕的她，可是又完全不一樣。
想當年叫她娜姐是順口也是開玩笑，可是今時今日看着她走到這一步，並大有可能走得更遠，我心諗，呢句「娜姐」，果然冇叫錯！
留喺片場幫我忘記現實！
喺《浮華宴》嘅角色係？
我嘅角色係張少娟，但係呢個女仔有好多身份，喺套戲我其實分飾六個身份：揼骨妹、工廠女工、 Sales，仲有舞小姐……同曾志偉、同毛舜筠、同林家棟幾乎所有人都有故事，由我帶出每個人嘅陰暗面。簡單嚟講，即係一個千面女郎。我收到劇本都覺得好有趣，一個人一套戲，但可以試勻咁多身份、咁多行業。
好多藝人都話，做演員最有趣就係可以逃離真實，咁你一次試勻六行，咪好過癮？
絕對係，可以匿埋喺角色裡面。我都幾鍾意留喺片場，真實生活好多瑣碎嘢都可以唔理。但係拍完都要返屋企，點都走唔甩……但係我唔係嗰啲會逃避現實嘅人，我鍾意解決問題，我嘅性格係咁，當有問題出現，一定要第一時間處理佢，攤喺度唔理唔係我，只會令我好𤷪𤺧，冇辦法行到下一步。
比如話啲咩呢？現實生活有嘢煩住你，你一定要即刻解決？
我發覺我呢幾年擺晒時間做嘢度，原來生活方面自己係一個白痴嚟。以前同父母一齊住，尤其係呢兩年自己住。
啱啱入行做𡃁模拍寫真，你話想買樓俾父母一齊住，𠵱家有冇離個目標近咗？
冇……原來越做越係好似離個目標越遠，香港樓價太恐怖，條數點計都好，原來點都係負擔得起租多過買。咁搞法，當我搵到一嚿錢，我寧願去投資。
因為唔想拍戲拍到老？想做女強人？
我冇諗過我最終行到去邊，我淨係會諗呢個階段自己可以做啲乜，我就會做。我入行到𠵱家都係咁，亦都好慶幸，我真係可以一步一步朝住呢個目標做咗。以前忙開，一停我就冇安全感。舊年開始，我話俾自己聽要換一個生活模式，要放慢我嘅時間表。
真係咁有野心？
唔係之前做代言人，都唔會開始了解一個商品、一個市場，所以合約完咗，就開始搞自己品牌。香港細，要出街話咁易，但係唔係度度都係咁。我試過喺大陸拍戲，大部份演員嘅娛樂都係網購。生意嚟講，我唔知自己可以做到幾多，但係好想做女仔嘢。
即係想賺女人錢？
唔係唔係……我係覺得自己好想同女仔一齊追求。你唔覺得女人無論去到咩階段，無論做女定做媽咪都追求靚，我覺得呢樣嘢好開
身材好係我弱點！
距離上次宣傳《西遊之降魔篇》見面，又過咗兩年，你覺得呢兩年你有咩轉變？
《分手 100次》以後，我覺得自己轉變最大，唔係戲路，係被肯定，感覺唔同：原來周秀娜係可以做女朋友嘅。呢樣嘢要多謝旦哥眼光。在此之前我不停接不停拍，就係想儲多啲。我冇上過堂、冇學過戲、唔係科班出身，就好想做多啲，好過自己乜都冇。本來我都會問自己，不停咁做做做，得着係咩呢？直到《分手 100次》……原來所有嘢都真係有用，原來我真係儲咗啲嘢。
係你入行咁耐第一次得到認同？
係，由外面到我自己都係。當然，《西遊》我都鍾意，四妹嘅角色好多人留意，但係大部份人唔知四妹即係周秀娜，因為周星馳嘅關係，每個角色都有佢嘅影子。唔同《分手 100次》，十足一個港女，真係香港人嘅影子，每個人都可以見到自己，包括我。
唔好介意我咁講，會唔會在此之前，周秀娜對大家嚟講，就係一個好美麗嘅殼？
唔緊要，你講得啱，咁好多嘢都係由美麗嘅外表開始嘅。等於 Victoria's Screct嘅女 model，我都想自己嘅 body係咁，想自己嘅內衣品牌做到咁。
咩係港女？
口硬心軟囉，覺得自己唔係，但當你開始投入一段關係，嗰啲特質自自然然就會出咗嚟。我鍾意呢套戲，因為，女神、性感女神，你點叫都好，距離好遠，但呢套戲，令我、令周秀娜呢個人唔再淨係得幻想。
出道時係性感𡃁模，好想證明自己？好想將除落嘅衫逐件着返嚟？
唔多唔少都會，我唔記得邊個同我講過，人嘅優點有時會變咗缺點，有時別人眼中覺得呢樣嘢係優勢，但係到底好定壞，自己最清楚。靚就見仁見智啦，但好多人認識我係因為身材，無疑佢係幫到自己好多，但係當所有人淨係見到我嘅身材，我就更加想俾人知，除咗身材好我仲有啲乜……有機會嘅時候我會用多十倍廿倍努力證明自己。
比如話？邊樣嘢？邊套戲？你付出額外努力？
「女神」呢個朵好形象化，好多人淨係聽過呢個朵，而唔識我呢個人。好似拍動作片，我接受唔到自己係女神，甚至女仔，就姐手姐腳求求其其。我去到邊都係呢個心態，人哋做到我都做到，男仔做到我都做到。俾人覺得我恃住自己係乜乜乜，就「唓……」，我最唔想見到。
我有戴 bra唔係真空！
你𠵱家一冇嘢做就話籮籮攣……係唔係有啲似細個時冇拖拍嘅籮籮攣？
我從來都冇試過冇拖拍……哈哈。
呢兩年真空期，搵愛情感覺要靠拍戀愛戲？
我有戴（ bra）……唔係真空呀……哈哈，所以我真係好鍾意呢份工，尤其係拍《分手 100次》時，有開心、有嗌交，真係好似有拖拍一樣。
拍戲令你更認清自己？
係㗎，人哋話我係、我唔信，但係一路拍我一路驚，係喎，我都係咁、我都試過咁，又唔係唔愛個男人，點解要口硬心軟？點解係都要贏？係把口死都要贏咋嘛。
女神呢個朵令人哋喺工作上同你產生距離，感情上亦一樣？
我覺得我冇閘住自己，但係人哋俾咗道閘我。呢兩年我發覺一樣嘢，好多嘢係我自己一廂情願覺得冇變，但係好多人以為我變咗，呢個就係最大嘅改變。
呢兩年有冇人追？
我話冇，我諗你唔會信。但係佢追我，而我又有意思嘅……真係未遇到。
未遇到因為你要求唔同咗？眼角高咗？定顧慮多咗？
我諗係因為唔敢、唔容易開始，遇到一個人再唔同以前，會覺得可以去試下。我覺得用咁多時間去試，不如用呢啲時間做嘢。係就係㗎啦，根本就唔需要試。我真係冇咁嘅時間去試。
同陳偉成（ Avis）分手後，你覺唔覺傳媒真係有能耐影響一段感情？
幾好呀，多一個監督者。天眼一樣，我唔知嘅嘢，自然有人話俾我知。
Avis上次分手搞到大龍鳳，有冇留意新聞？
冇留意就假嘅，就算我唔睇，都好多人話俾我知。但係過咗去又關我咩事？唔係佢一個，所有前度我都唔會再做朋友，分開咗就係分開咗，冇關連就自然唔會再造成無謂傷害。
你真係好強悍！
唔係，未遇到時我一定要照顧自己，但係我相信呢個世界一定有一個人會見到我小鳥依人嗰一面，不過未遇到啫，可以強過我、收服到我。
生活咁多姿多彩，見到咁多人，都見唔到？
太快喇，時間太短喇！我真係遇到好多人，但每次最多咪一餐飯、一餐飯咪最多兩三粒鐘，跟住我已經飛勻意大利北京廣州，又點會有次次？
呢兩年步伐匆匆，咪好易錯過好多嘢？
所以我想放慢腳步，所以我想去學影相，時間過得太快，我想記低啲值得紀念嘅嘢，影象可以幫我記低值得記住嘅嘢，人啦、環境啦。我唔想自己去咗咁多地方、做咗咁多嘢，你叫我諗番轉頭，乜嘢都係模糊嘅……
成姐之路
影相中途轉髮型，埋位未夠兩分鐘，娜姐個已經舂吓舂吓自動補眠，聽說這一天又像她的每一天一樣，朝九拍到晚九，然後又要趕回公司 fitting。
這一天，她這句話特別讓我感觸：「好多嘢係我自己一廂情願以為冇變，但係所有人都覺得我變咗，呢樣嘢係呢幾年最大改變。」
勞勞碌碌趕頭趕命，這個女孩每天努力在改變自己，卻又希望別人覺得自己沒變，何其矛盾？
|
鍾意就快D Share啦！
|
|
|