掃呢頁CODE去手機

2015年3月12日 星期四

阿信屋林偉駿:「已到極限焗住行!」 [壹週刊 - 1305 - 財經] M1,



經常皺眉的林偉駿,強調搵食艱難。開便利店是因為冇大鋪位及舊店人流下跌,並非為了賺更多錢:「我想賺多啲都唔得,因為一加價,識入貨嘅伙記就會自己出嚟開翻版阿信屋,到時阿信屋就冇人幫襯啦。」(林志謙攝)

大錢題

阿信屋林偉駿:「已到極限焗住行!」

究竟 CEC國際( 759)在過去幾年,開咗咩鋪?阿信屋零食店、麵包店、車仔麵、凍肉、化妝品、茶餐廳、女裝、家電、床上用品……咁究竟老闆林偉駿仲想點?佢話:「嚟緊有便利店、點心鋪、鰻魚飯、西餐廳……同埋政府話推美食車,我都會整一架,裝飾得好靚嘅!」

狂開分店,別人笑他太瘋癲,林偉駿今次訪問終於承認,是捱得好辛苦。「我睇到,阿信屋喺零食方面已到咗極限。如果唔喺其他零售層面發展,公司就會停低。所以新五年計劃,要繼續擴張,冇得停低。」翻開 CEC國際的中期業績,半年賺一千七百多萬,平均每間分店每月只賺一萬二千八百元,低過請一個文員!開得多、賺得少,林偉駿已耗費精力、四年無放過一日假。這次由他娓娓道出、好可能愈行愈危險的 759生意模式。

開得多賺得少

阿信屋在這四年來,不斷踩界賣非零食產品,最新是在大年初一開寢具屋,專賣床單被鋪,生意比想像好,令林偉駿深感興奮:「初一做咗七萬幾蚊生意,都幾得人驚!最好賣係印有英國國旗嘅被單。(冚國旗?)哈哈,又係喎。」

不斷而來的新鮮感,是阿信屋給香港人的印象。由零食到化妝品店、家電、雲吞麵等等。林偉駿坦言做到一開即賺,但他發現生意及人流已走下坡,「齋賣零食嘅鋪,雖然仲有錢賺,但人流少咗好多!啲客鍾意行有凍肉賣嘅鋪頭,如果間鋪有埋電器同家品賣,生意會好好多。」他一年前已發現客源流失的問題,於是萌生開便利店、甚至百貨公司的諗法,希望挽回人流。

零食到極限

林偉駿坦承,賣零食已到極限:「阿信屋已去到極限。賣零食嘅零售市場已無乜空間,咁公司仲有咩動力去推動呢?惟有將零售層面擴大去做,否則間公司就會停低,好危險。」另一個林偉駿要狂開分店的誘因,是維持入貨量。阿信屋零售價較其他對手平,全因大量從日本直接入貨;但問題是,入貨量大,平均來貨價才能壓到最低。既然零食店已飽和,林偉駿索性將來貨用來開麵包店、粉麵店等等。一來散貨、維持入貨量;二來開在屋邨鋪,貨價租金有得計,一開有賺。不過此生意模式,卻帶來不少危機。

其一,是耗盡了林偉駿精力。今年暑假,將是阿信屋成立五周年。這四年半以來,林偉駿無放過假,即使新年仍依舊上班:「每一日都要睇住盤數,要經常諗新嘢去變。」他用從前開工廠作比喻,公司發展就像工廠的產能一樣,要不斷增加:「例如一個大牌子今年賣一百萬元貨,你只能做到呢個數目。但如果人哋要增長,想賣二百萬貨,咁咪要搵其他廠去做,但品質未必做到兩間廠一樣,咁人哋為咗減低風險,咪可能將啲貨拎去一間大啲嘅廠做,唔俾你做啦。開零售店一樣,你分店少,接唔晒人哋啲貨,咁人哋咪拎去超市或其他鋪賣,咁你咪冇貨賣囉!」

去年林偉駿得一位地產公司高層提點,暫停擴充分店,幸運地避過租金高峰期,最近本港零售增長下降,租金回落不少,阿信屋便再大舉擴充,目標是要開夠三百間分店,並將部分轉為便利店:「好多員工都喺其他超市過嚟做,佢哋睇中阿信屋係增長緊,如果停落嚟,士氣低唔使講,供應商都唔會俾面你。」

為了避免封殺事件再次發生, 759便利店大部分會入日本的罐裝飲品,只得小量紙包飲品由維他奶提供。(林志謙攝)

麵包店一月開業,林偉駿透露開店是為了測試麵包製作及供應,將來主要會供應全港的 759便利店。(關永浩攝)

雲吞麵店是阿信屋第一間開的食肆,之後茶餐廳,咖啡店相繼開業,林偉駿謂之後會再開西餐廳、點心快餐店甚至鰻魚飯店,都是為便利店的熟食檔鋪路而設。

逼住面對現實

此路並不易行,一年前,林偉駿也說過阿信屋要走超市百貨路線,鋪頭要數千呎以上,但現實是,在寸金尺土的香港,要找到大型鋪位殊不容易。除了百佳、惠康、 Aeon、 city'super之外,有「阿媽」新鴻基地產「照住」的一田,亦是另一個崛起中的巨人。林偉駿坦言要開阿信屋超市好難,「我一直都搵緊鋪位,但大嘅已經俾百佳霸住,佢哋寧願交貴租都要霸住個位,啲業主又鍾意劏細鋪位收多啲租,我哋要搵位,都係搵華潤做唔起嗰啲屋邨鋪位咋。」

林偉駿只好變陣,轉攻面積較細的便利店:「五百呎就開到。六成做熟食,賣豬皮魚蛋、點心同鰻魚飯,全部自家製作。全間鋪二百樣貨,全部重點產品,有三成係本地貨,同而家嘅阿信屋係有分別的。」目前面積較細的阿信屋街鋪,會變成便利店,他更指出早前開設的茶餐廳及麵包店等,都是為便利店鋪路:「我要學識點整熟食,原材料控制同運輸,要自己搞過盤生意先至會識。」不過便利店市場更似打仗, OK、 7-11及華潤 Vango,全港總共已有一千四百多家店,幾乎隔幾個鋪就有。上週六 OK便利店特別舉行造勢大會,與日本熊本知事合作。利亞( 831)行政總裁楊主彬向本刊說,不擔心阿信屋挑機:「我哋舊年開設日本零食專區後,生意額升咗兩成,今年會開多廿間 OK分店。」據林偉駿所知,「七仔」上週一也舉行內部會議,迎戰阿信屋。

阿信屋在九龍灣國際展貿中心的鋪頭,有過萬呎,內裡開設 759時裝店,全部衫由韓國入貨,不過大部分顧客認為款式太少,價錢也不算特別便宜。(關永浩攝)

阿信屋近年改革,過千呎的鋪位都以超市模式經營,包括凍肉及家品,純零食的店鋪生意逐漸回落。(張國慶攝)

大超市留難

林偉駿為了阿信屋,四年來都無放假,年初一上午和家人在花園 BBQ後,下午便回公司,他謂很辛苦但無辦法:「零售店要有人喺總部睇場。」(林志謙攝)

要擴張版圖,人工是另一隱憂。阿信屋人工成本不輕,為留人才,不惜較市價高一成底薪請店員,一般底薪約一萬二千元。另有營業額的銷售佣金,林偉駿說:「好多鋪都想入多啲熱賣產品,因為多佣金。銷情好嘅鋪,人工可以達萬六元。」除了租金,薪金成本亦佔了阿信屋收入一成四。另外,阿信屋曾因拒絕加價賣可樂,而遭太古等本地供應商封殺,但今次開便利店,卻要有三成貨品由本地供應,林偉駿要在價錢及貨源上與本地供應商角力,頭痛不已。

「同維他奶傾,佢哋只肯供應大包裝 375毫升飲品,細包裝嘅只喺超市賣,如百佳、惠康。因為大超市有佢哋嘅要求。大佬呀,女士們點飲咁大包喎!」貨源要妥協,售價亦要妥協,不能像阿信屋般賣平貨,他無奈指出:「供應商話啲嘢,唔可以平過七仔,咁我唯有標個價錢跟市價一樣。但我一樣會做九折,個客照俾全數後,折完嘅一成錢會係現金積分,留番嚟可去阿信屋零食店用。咁樣走灰色地帶,供應商可以向七仔交代。」林偉駿說不斷變通是逼出來的;表面風光,內裡陰乾,記者識了他幾年,他幾乎都是著同一件衫,因無時間買衫襯衫。日瞓四小時,樣子也很疲累,不過他說:「焗住要行,唔行公司就會死。但見咁多人跟我,我都有我嘅滿足感!」

鍾意就快D Share啦!