男友偷食斷正 Miley Cyrus死啃 [忽然1周 - 1025] MW,

奸夫淫婦

日頭白白拖住第二個女人，你當我 Miley Cyrus死㗎！

歐洋風

男友偷食斷正　 Miley Cyrus死啃

Patrick你個正衰人！！！枉我堂堂天后 Miley Cyrus睇得起同你拍拖。你就恃住係阿諾舒華辛力加個仔，四周圍沙沙滾！

早排大學放春季假期，你應承過我會乖，點解呀——點解你趁我出外公幹嗰陣，一個屈尾十走咗去玩，仲要同第二個女仔摸身摸勢。你究竟當我係咩？

放心，我唔會由 20樓跳落去，最多都係喺 Instagram發洩下，或者學木村思貝 Kero Kero Kero Ke死你！

你當我呢個正印盲㗎！（設計對白）

當初同 Patrick一齊，其實都係諗住玩玩下。 Patrick老竇阿諾舒華辛力加（ Arnold Schwar zenegger）係大明星兼過氣加州州長，老母則係甘迺迪家族後人，假假哋都係名門望族， Patrick自己又高大靚仔，筍就筍嘞，不過點會唔花心呀！

愛情嘅嘢好奇妙，明知係個氹，但偏偏踩落去。上年 11月我喺球場上啜爆 Patrick，將戀情公開。我哋好夾㗎，佢 21歲我 22歲，同樣鍾意劈酒夜蒲 clubbing……

談婚論嫁

當初只係想拍下散拖，估唔到愈踩愈深。佢仲介紹晒佢老竇、阿媽俾我識。雖然有傳伯有唔係好 like我，嫌我形象 cheap，但為咗 Patrick BB，我已經冇以前玩得咁癲，最近仲得到佢首肯，去到談婚論嫁嘅地步。

攬頭攬頸

有圖有真相，正常男女朋友分分鐘都冇你哋咁激，太過分！

向弟弟進擊

拖到實一實

女體盛飲酒

網上扮無事

唉，點知臨門一腳撻 Q。早排我去德州做嘢， Patrick咁啱放春季假期，但佢竟然冇交帶一聲，就自己飛咗去墨西哥同班同學疏乎。

男人嘅「浪漫」，女人有時都要隻眼開隻眼閉，但背住我溝第二個女仔，勢係假囉！啱啱過去嘅周日（ 15日），你同個妖精攬到罅都冇條，你口口聲聲喺 twitter澄清：「只係普通朋友」，乜「普通朋友」會攬頭攬頸繑埋手㗎咩？乜會「女體盛」喺人哋肚臍度飲酒㗎咩？

點都好，我會忍你。維穩騷唔止 CY識，我最多喺 Instagram post下同「普通異性朋友」嘅相單打吓你，再唔係搵阿媽飲下酒訴下苦，一日未埋單一日都唔知邊個輸贏， Patrick BB，你因住嚟！

Patrick老竇係阿諾舒華辛力加，媽媽係甘迺迪後人，希望未來老爺奶奶今鋪撐我

諸多藉口

喺 twitter話個女仔係朋友個女友，又話唔會做任何嘢背叛我，其實統統都係 Patrick嘅藉口！

報復貼合照

既然你堅稱同相中女仔係普通朋友，好，我有樣學樣上載同鬍鬚男嘅合照。上面寫住「世上最好嘅就係友誼」，不過我專登串錯晒啲字。發脾氣嘅人就係咁任性！

事發後 1日（ 16日），我仲同媽咪飲酒。

鍾意就快D Share啦！

下一篇 》