憑《導火新聞線》發圍 周家怡梁小冰捱出頭
用二十年光陰，去換取一個夢想，你說很儍？在娛圈浮沉多年的周家怡與梁小冰，近日終於憑香港電視新劇《導火新聞線》捱出頭，二人的演技均獲激讚。光輝背後，小冰試過三年沒有拍劇，自嘲幾乎與香港脫節。至於十優生的周家怡甚至放棄當律師機會，堅持她的演藝夢，終於有回報。話說回頭，這份執着，不正是她們在劇中對新聞理想的堅持嗎？
撰文：嵐山
周家怡於一九九八年藝員訓練班畢業，入行近二十年，一直苦無機會，多演護士、同事等閒角，但她永遠覺得是一個機會，仍繼續落力去演，周家怡日前與梁小冰接受本報專訪時說：「好多人都話我係捱，其實我真係唔覺，即使我演過十幾廿次護士角色都好，但我從來未試過推劇，因為每個故事背景、環境、導演、監製都唔同，我可以從中學到好多嘢。」
■梁小冰（左）和周家怡日前接受本報專訪，二人憑《導火新聞線》的角色成功發揮，如打了支強心針。攝影﹕沈健程
讀法律十個A畢業
周家怡曾試過自薦做無綫親生女，可惜被拒，之後一邊打無綫工、一邊苦讀港大法律高級文憑，終以十個A佳績畢業。雖然成績理想，但周家怡仍未打算放棄演藝工作，她說：「做咗咁多年，最失落係港視唔發牌，因為今次係我第一次做女主角，但就好似過山車一樣，以為自己今次行運行行到最頂啦，幾難先有人肯掟錢畀我做女主角呀？但上咗去又落番嚟，所以做呢行一定要好有韌力！」
周家怡直言港視冇得續約，令其前路更難行，她說：「如果要做律師就一定要繼續讀上去，唔發牌時，屋企人都有再問我打算點？但我真係好鍾意演戲，所以決定留低。屋企人見我今次部劇出街有迴響，佢哋都好開心，絕對係一支強心針。」
■周家怡（左）多年前因在《火舞黃沙》飾演兔唇女而冒起。資料圖片
唔會妒忌佘詩曼
與無綫一姐佘詩曼是多年的好朋友，周家怡與她所演的角色卻差天共地，還經常成為被忽略的一個，她說：「以前試過畀狗仔隊鬧，話我阻住佢影另一個人，但我冇嬲，可能我冇乜新聞價值啦。」但周家怡從來沒有對別人產生妒忌，她說：「試過一次拍劇做阿佘妹仔，我從來唔會比較，因為每個人際遇唔同。朋友間冇高低之分，平時我都係叫佢家姐，喺工作上佢亦畀咗好多鼓勵我。」
未來周家怡又要再重新出發，除接拍港台劇外，還有《我的女兒》和《方言》兩部電影，雖然要重回配角位置，但她一點也不介意，她說：「我唔係一定要做主角㗎，對我嚟講每個位置都好重要，只要能繼續有角色去演，已經好幸運。」
■劇中梁小冰（右）與周家怡經常為新聞取向有磨擦。劇照
|
鍾意就快D Share啦！
|
|
|