年多前，張氏夫婦出席美容公司活動時。輝嫂戴上一 set價值千萬嘅翡翠首飾，雍容華貴。
娛樂喧
老婆打骰 張兆輝三千萬開珠寶店
52歲的張兆輝，唔止拍戲撈得掂，美容生意亦做到有聲有色，全因他有個識做生意的賢內助。最近他以 50萬月租喺中環威靈頓街地舖賣珠寶，一樣是老婆打骰，瓣數多多！
據知輝哥為慶祝同太太郭碧妍結婚 18周年，今年與幾位友人合資近億元開珠寶店，全因張太醉心翡翠，店名「安碧」更以太太的碧字命名，原來錫老婆真係會發達㗎！
正在廣州為杜琪峯新戲《三人行》開工的張兆輝，自去年憑《恐怖在線》成為雙料影帝後，年初片酬升至 130萬，片約仍然接到冇停手。近年密密賺的他除了拍戲、拍大台及內地劇，更狂跑登台賺真銀，兩年穩袋千五萬。
財來自有方的張兆輝，除了娛圈事業成功外，美容生意亦愈做愈大。去年在美容展中，他以近 50萬貴租百多呎攤位，證明生意有巿場。「舊年市道咁差，輝哥兩公婆喺美容展嘅生意竟然好好，三日執咗幾百萬！」知情者說。
拓展生意王國
張兆輝想拓展生意王國，上月逆市中擲三千萬開舖，「輝嫂好鍾意翡翠，啱啱又有朋友撩輝哥做翡翠生意，佢見係老婆嗜好，咪當結婚周年禮物送俾老婆囉！千金難買老婆心頭好嘛！」知情者說。
本周一（ 30日），本刊記者到「安碧」珠寶店視察，裝修極具氣派，有不少富婆揀選心頭好。店內所賣的翡翠、珠寶均是價值甚高的罕有品種。據知鎮店之寶是老坑玻璃翡翠吊墜，周邊鑲有四十多卡鑽石連鑽石鏈，叫價 2,800萬，真係唔係人人買得起！
張兆輝：咁先有動力做嘢
記者致電張兆輝，問到擲三千萬開珠寶店是送給太太做結婚周年禮物時，輝哥笑笑口話：「其實主要係我太太家姐夫婦做開呢啲。做生意要熟先好，我不嬲都唔識呢啲嘢嘅，咁咪嘗試吓！（投資成三千萬喎？）係呀！勁嘢嚟㗎！唔係我一個人投資晒嘅，樣樣嘢都嘗試吓囉！（近呢兩年搵好多？）我使好多錢你知唔知吖！你睇我好，我睇你好啫！咁樣先有個動力去做多啲嘢呀！（舖租要 50萬？）冇辦法喇，你知嗰度係咩地點但係依家呢啲首飾都好渴求，出產量唔多，值得投資㗎！」
鎮店之寶
翡翠鑽石雙面吊墜 2,800萬
張兆輝的珠寶店收埋唔少價值連城嘅珍藏品，大家記住這句口訣「種、色、透、瑩、花、大、工」，就能挑選一件靚嘅翡翠。
|
鍾意就快D Share啦！
|
|
|