媽咪姐
致我們終於摺埋的亞視
唉，勢估唔到，我媽咪姐竟然有機會見證一個電視台嘅結束。係，實不相瞞，當我睇電視直播，聽到阿蘇局長宣布亞視冇得續牌嘅一刻，噢！ Yeahhhh，我真係嗌咗出嚟（嘩，你唔係唔深感興奮極歡欣呀嘛？）
不過，靜咗落嚟，又諗起那些年嘅亞視都俾咗唔少歡樂我哋㗎！好似《我和殭屍有個約會》咁，勁科幻嘅殭屍古仔配上最 low tech嘅布景，加一班大家唔多叫得出名嘅藝員（依家紅晒）。當時邊有人諗到套劇會咁高收視，拍足 3輯。 16年後嘅今日，大台仲抄緊人哋呀陰功！
再講《今日睇真 D》呢？《百萬富翁》呢？嗰時嘅亞視節目真係有新鮮感，敢去試敢去搏㗎！黃麗梅追住問竇唯同王菲係咪離婚？仲俾竇生潑可樂，你估好似大台嗰啲慌張西望嘅主持淨係識笑騎騎讀維穩稿咩！退一萬步講吖，就算之前亞視喺收台前播《魚樂無窮》，都有創意喎！唔使睇播到爛嘅粵語殘片，對住魚缸無限 loop，睇得人幾身心舒暢㗎。有觀眾見到有條金魚反肚，仲「嗱嗱聲」打去亞視總台救魚㖭！呢啲咪叫互動囉。當你用心去做好一件事，全世界都會支持你㗎！即使有時嗰件事睇嚟有幾咁唔可能。
之但係，王征一出，乜都冇嘞！得番日日自 high嘅《 ATV焦點》、「低智森」個個星期歌頌祖國。好嘞，依家亞視終於冇得續牌，王征仲夠膽死話：「呢日係香港最黑暗的一天！」吖，荒謬嘅嘢，真係無極限。你唞吓王生。 Thanks God！
哥哥係先鋒
當年參加《亞洲業餘歌手大賽》入行嘅哥哥張國榮，好快被公司安排同鍾保羅拍亞視前身、麗的電視嘅《甜甜廿四味》，成為經典作之一。而呢套劇重播又重播，喺 2013年仲整個 cut短版，改名《浪漫二重奏：甜甜廿四味》。
醉爆《不設防》
89年嘅《今夜不設防》，可以講係亞視開台咁多年，有最多紅星亮相嘅節目。梗係有黃霑、蔡瀾同倪匡做主持，晚晚開 XO，傾到醉晒（通常倪匡最早瞓低！），幾正呀！ 86年，亞視已經開創男士選美嘅先河，搞咗個電視先生選舉，孫興（中）攞冠軍，吳聲發（左）係亞軍，依家喺影壇翻生嘅姜皓文（右）得季軍。
89年嘅《今夜不設防》，可以講係亞視開台咁多年，有最多紅星亮相嘅節目。梗係有黃霑、蔡瀾同倪匡做主持，晚晚開 XO，傾到醉晒（通常倪匡最早瞓低！），幾正呀！ 86年，亞視已經開創男士選美嘅先河，搞咗個電視先生選舉，孫興（中）攞冠軍，吳聲發（左）係亞軍，依家喺影壇翻生嘅姜皓文（右）得季軍。
|
鍾意就快D Share啦！
|
|
|