2015年4月16日 星期四

強國代言韓星醜爆 [壹週刊 - 1310] M1,



日韓到會

強國代言韓星醜爆

韓星喺亞洲爆紅,尤其強國,個個都進軍內地市場,最快嘅賺錢方法,必定係拍廣告做代言人!

有錢賺當然開心,不過要拍個靚嘅廣告真係唔容易,何況喺大陸?全智賢喺大陸拍隱形眼鏡廣告,就俾人話拍到成個大媽咁,真係陰功!

愈來愈多韓星拍內地廣告,以下幾個可以話係醜爆表表者,要影得靚,唔通真係咁難?

金秀賢

內地代言廣告:自然之寶保健品、愛瑪電動車、騰訊等等

憑住《來自星星的你》爆紅之後,金秀賢呢兩年賺到盆滿鉢滿,世界各地嘅廣告代言,差唔多有 50個,收入相當驚人。喺大陸,幾乎衣食住行所有嘢,金秀賢都有代言,雖然好多時只係一張相加一件產品,但係唔可以掉以輕心,好似上年佢同全智賢一齊代言礦泉水,廣告入面有一句「來自長白山」,就立即引來韓國輿論批評,最後兩個仲要解約,真係得不償失。

全智賢一向都係廣告天后,最新一季嘅 Gucci搵佢做代言人,高貴大方(上圖)。點似內地嗰個隱形眼鏡廣告,造型佢成個大媽咁,女神都降 grade!

雙賢食《星星》條水合作拍廣告,呢個礦泉水廣告就出咗事,因為長白山位於中韓邊界,一向有領土爭議問題,而家佢哋提出解約風波,可能面臨訴訟。

金秀賢個都敏俊頭係招牌 logo,不過當配上簡體字,立即變成薯仔,潮同娘真係只差一線。

李敏鎬

內地代言廣告:淘寶、愛尚薯片、錦湖輪胎等等

李敏鎬由《流星花園》開始已經喺內地走紅,去到《繼承者們》更加人氣爆燈,喺多個內地排行榜上,李敏鎬更加力壓金秀賢,成為第一男神,可見佢嘅號召力完全不遜於金秀賢。喺揀代言方面,李敏鎬比金秀賢更積極,好多廣告都係比較草根嘅產品,又或者因為咁,質素真係嚇親人,好地地一個靚仔樣,點解要印喺個薯片袋上面呢?

唔知點解好多大陸廣告,都創意欠奉,要男神擺啲咁滑稽嘅甫士,真係接受唔到囉。

將李敏鎬個樣印喺薯片袋上,本來問題不大,唔好似曾俊華咪無事囉。不過 fans開薯片嘅時候,一定會好小心,因為食完仲要收藏!

金宇彬

內地代言廣告:肯德基、水星家紡等等

金宇彬近兩年冒起,食住韓流強勢向亞洲發展,喺香港,佢賣道地綠茶,一句「少少甜」令香港 fans暈得一陣陣!喺內地,金宇彬一樣係廣告界寵兒,長腿 Oppa最好梗係做 model賣衫,連快餐佢都涉獵埋,不過叫佢拎住個雞包,成個鹹蛋超人咁,娘咗!

內地潮語我唔熟,乜叫八分青年?係金宇彬個髮型八二分界?

李鍾碩

內地代言廣告:森馬服飾、 BBQ Chicken等等

韓流新四大天王之一嘅李鍾碩,前年拍《聽見你的聲音》演技飛躍進步,之後密密拍劇,連續有《異鄉人醫生》同《 Pinocchio》,人氣同曝光率都 keep住高企,自然廣告密密接,不過亦由於忙住拍劇,似乎無俾時間拍廣告,多數都係室內景,簡簡單單幾張硬照就算,再加埋啲衫款,即娘爆。

李鍾碩係 model出身,影時裝硬照應該係佢強項,不過一落入大陸廣告手中,就係似買錯淘寶貨的苦主咁。

張根碩

內地代言廣告:統一鮮橙多

張根碩喺韓國因為逃稅傳聞成為眾矢之的,無工開唯有出走,去日本同內地搵食。可能因為有 job就做,無晒心理包袱,簡直去到盡!拍橙汁廣告,一身橙色加偶像笑容,差啲以為回到 80年代,呢啲咪專業囉!

鍾意就快D Share啦!