霍啟剛早前透露，同郭晶晶協議不設防，為小中曦添個弟妹。
探熱針
兩文三語行超市 郭晶晶谷歲半囝囝做尖子
去年底霍老爺（霍震霆）出席公開活動時，踢爆孫仔（霍中曦）只得一歲多，已經密集上 playgroup，霍啟剛同新抱郭晶晶怪獸家長，原形畢露。做人父母，都想仔女贏在起跑線，連日常生活，也不疏於學習。早前霍啟剛一家三口加埋外傭姐姐出動到渣甸山的超市入貨，負責湊 B的郭晶晶，全程廣東話、英文、普通話三語同眼大似爸爸的囝囝傾偈，化身人肉快譯通。
老豆倒模
週末黃昏六點，霍啟剛揸車載住郭晶晶、歲半大的囝囝中曦，連同外傭姐姐，舉家同到名人明星熱選的渣甸山 Market Place by Jason上糧。壯丁霍啟剛負責揀罐頭，媽咪郭晶晶就忙於搵心水廚房用紙巾，安坐在手推車中的霍家第一 B霍中曦，則緊握着扶手，興奮地不停「吔！吔！」叫。眨吓眼已經歲半大的小 Lawrence，梳了一個超人頭，圓碌碌的大眼睛，同老豆霍啟剛倒模一樣，相當精靈。
兩文三語對話
郭晶晶見到囝囝開始興奮失控，於是上前細細聲以普通話跟他說：「不可以那麼吵的！」小朋友隨即安靜下來。安撫完寶貝仔，轉身走去揀韓式即食麵的郭晶晶轉 channel，以廣東話問：「媽咪攞呢個好唔好？」小 Lawrence似懂非懂的點頭，跟住繼續 BB話：「吔！吔！」
兩母子之後去買生果，郭晶晶拎起一梳香蕉，小 Lawrence二話不說伸出小手想要，郭晶晶今次講英文：「 No la, no la, no cannot！」
跟住去到凍肉櫃位，小 Lawrence開始大聲吔吔叫，左扭右扭表現不耐煩，醒目外傭姐姐搵到架兒童版迷你購物車，郭晶晶以廣東話問囝囝：「你推推好唔好？」在外傭姐姐協助下，小 Lawrence落地自己推着購物車，全程在旁邊𥄫實的郭晶晶，笑到雙眼成一線，甜到漏說：「係啦，乖！」
抱 B遮面閃
一家三口在超市玩足個多小時，離開時記者上前拍照，霍啟剛先笑笑口，然後輕聲說：「俾啲空間我！」至於郭晶晶則發揮母親本能，一手抱 B兼遮面，再一支箭飆上車。
去年底，霍老爺出席公開活動，被問到希望孫仔成為「地上最強」還是「水上最強」，霍老爺唔覺意踢爆霍啟剛同郭晶晶好怪獸。「而家啲家長好奇怪，年紀咁細就要上好多課堂！」今時唔同往日，含住金鎖匙都未必可以贏在起跑線！霍啟剛同國寶太太苦心一片。
|
鍾意就快D Share啦！
|
|
|
