嘉穎問陳嘉寶男友禁欲心得
無綫女神陳凱琳被踢爆與鄭嘉穎撻着後，身為基督徒的她被指是TVB處女，婚前禁慾成為話題。緋聞男友鄭嘉穎被爆曾跟堅持禁慾的陳嘉寶及其男友討論婚前性行為問題，昨日嘉穎對此直認不諱，表示尊重每個人的宗教信仰，談到與陳凱琳的緋聞，他更豪言：「啲人點寫我唔理得咁多！」
鄭嘉穎、謝安琪（Kay）、陳凱琳（Grace）、陳山聰、黃又南等一班無綫電視劇《殭》的藝人昨晨於機場出發到荷蘭拍攝外景，之前Grace被《好報》拍到上嘉穎家而踢爆二人暗撻多個月，上次出外拍劇時，Grace的父母亦有前來送機，母親更隨隊出發照顧女兒，不知是否知道愛女戀情剛萌芽，故都很「通氣」，其父就算有前來送機，都沒有現身。當記者要求嘉穎及Grace二人合照時，嘉穎顯得相當避忌，最終要跟Grace的另外兩位緋聞男友陳山聰、黃又南作「四角戀」才肯合照，不過嘉穎與Grace就各自企一邊，笑容尷尬，不過嘉穎事後堅稱「冇尷尬」。
異口同聲唔使避忌
被封為「新處女黨」成員的Grace，昨日受訪時被問到抵達荷蘭後會否與嘉穎避忌一點？她甜笑謂：「冇乜嘢就唔需要去特別避忌。」至於嘉穎亦似乎想盡量了解Grace的睇法，令二人相處時更有默契。昨日他直認曾向身為基督徒而禁慾的陳嘉寶及其男友談論過有關婚前性行為的話題，他嚴肅地說：「有一晚放飯同嘉寶去食拉麵，佢男友都在場，傾起啲宗教問題，點解傾起呢樣嘢？就係早排有雜誌影到嘉寶同男朋友有關宗教嘅嘢，所以大家就講起。我哋係有提到婚前性行為嘅話題，咁我就問佢男友點算？其實段說話唔係唔見得人，不過小弟非常尊重每個人宗教信仰，唔好拎嚟做新聞，呢樣嘢可大可小。」對於他與陳凱琳的關係有說是「父女戀」，他認真地說：「啲人點寫我唔理得咁多。」陳嘉寶表示的確大家曾以此作話題，更指她與男友都會堅守原則。
Kay愧對老爺奶奶
Grace對於「父女戀」一詞則回應說：「呢個Term有啲古怪，自己身邊一直都有朋友同佢哋嘅男朋友年紀差少少，兩個人嘅關係最緊要係舒服同夾得埋，年齡唔係咁重要，就算女仔大過男仔都冇乜嘢。」問她有否再上嘉穎屋企借碟？她笑謂：「冇喇！」
另外，Kay直言有很多朋友居於荷蘭，更笑言他們曾說會拉橫額熱烈歡迎她，她又透露此趟到荷蘭18日，出門時都感不好意思：「返嚟都已經係下個月，老公去咗上海拍《葉問3》，好在我同老爺奶奶住，佢哋照顧得囝囝好好。」
文：影視組
|
鍾意就快D Share啦！
|
|
|
