真人騷
中坑男神 玩得認真 王敏德：我淨係識揸真飛機！
49歲的王敏德，被本地起碼七成中坑奉作男神，因為大部份男人希望 40+能擁有的，他都有：
後生時靚仔，年長後型棍，拍戲專做警司富商；娶了 90年代超模回家，有兒有女，家庭和睦；有戲拍仲有老闆做，個人服飾品牌繼銅鑼灣門市後，就快在上海開分店；重點是識玩， 15年前玩飛機考獲直升機牌， 7年前夾 band玩到出 EP，失驚無神在隧道口立起巨型海報，話你知 49歲都可以出處男 EP。
來到 MW拍照，看到這裡既是店，也是王敏德的個人興趣陳列室，設計成頭等艙一樣的店面，裡面有自家設計的機師褸和烏蠅鏡，有飛機有電單車，有他自己做封面的月刊，還在櫃枱前放了他剛推出的 EP《 Airways of Love》。我問他，近年港佬都潮玩航拍，有冇玩埋一份？
他一聽，揦埋口面：「嗰啲 remote control我搞唔掂，唔識玩，我淨係識揸真飛機！」
就係咁簡單，其實能把興趣發揚光大變成生意，因為王敏德一向玩得認真：
直升機牌唔係玩，他用了十年時間儲飛行小時，最近終於被正式聘用，成為商用直升機機師；
出 EP亦唔係玩，佢隊十五人 big band已經成立七年，出碟前一早周圍飛接緊商演。
一個星期得七天，王敏德要保證有一天家庭日，一天履行機師合約飛上天，每週三至五晚同 band友練團，還要定期和生意拍檔開會巡鋪，表面看起來瀟灑又好玩，其實做王敏德，從來唔係講玩。
出碟前每年接三十場商演
點解會出碟？
我諗好多人都鍾意唱歌，所以呢個世界有卡拉 ok，不過可以出碟，就唔係人人做得到。其實我 93年都喺泰國出過碟，但係當時太多戲拍，我唔想喺唱歌度浪費時間。但係我對音樂好有興趣， 08年開始同朋友一齊玩，以前叫 Michael Wong Big Band，𠵱家叫 Michael Wong Rhythm& Blue，好多人請我哋去私人 party表演，所以我嘅音樂事業早過呢一隻碟，一直都做緊。
啲私人表演有冇酬勞？
有㗎，不過 big band至少十幾個人，有 Saxophone、有小號有鼓，仲有伴唱，酬勞計落唔係多，但係每年都起碼有二、三十個表演，我一早有音樂事業。我哋飛新加坡、大陸、澳門接 show，聽晚都有個表演喺君悅，係舊客。
俾人惡搞新歌 MV，你又會唔嬲嘅？
美國個個出名嘅歌手 MV都俾人惡搞過，我唔嬲，因為我見到佢哋真係好比心機拍，你要對一樣嘢有興趣至會擺咁多時間落去玩，佢哋無錢，但係每個鏡頭都諗過點拍，我覺得值得尊敬。反而係我睇番自己嗰首，仲唔好意思。我同老婆成日都係搭嗰架小巴落銅鑼灣，我唔知公司已經出咗首 MV仲喺嗰架小巴播，成架車啲人我都識，個個望住係有啲尷尬。
點解你會有時間做到咁多樣嘢？
呢啲又唔係朝九晚五，聽晚唱完，下個騷係十日之後，好多時會同隊 band週圍飛，走好多個城市，其實好好玩，仲有好多時間剩。通常我都會保證 weekend係 family day，但係聽日出騷， Janet（太太馬詩慧）同 Kyla（長女王曼喜）又會同我一齊去，係我同個客要求，所以又可以同屋企人一齊。
咁幾時練 band？
個個星期都要練，出騷前會再綵排。琴日我哋練完三個鐘，又開會，開完 band嘅會議再同生意拍檔開。因為唱歌嗰度，我哋有個新嘅女仔會加入，想俾啲機會新人，鋪頭今年又會喺上海開分店，好多嘢要傾。不過我係一個藝人，我所有嘅事業、行到今日，都係由藝人開始，有戲接我都一定會接，今個星期日仲要揸直升機，唔係玩嗰啲、唔係拍戲，係真係做嘢。
揸直升機做咩？
我同一間直升機公司簽咗合約，做 part time機師，直升機有任務有人租，就會搵我去揸。我係一個機師，公司叫到我返去至知嗰日係咩任務，可能係去半島酒店接人、可能係荷里活租嚟拍戲，唔知㗎。
咁以後星期日都會好忙？
未知係唔係個個星期日都有任務，但係呢個機會我等咗好多年。 98年我同 Janet講想去加拿大考直升機牌時，大女都係得四、五歲。
點解咁講？
呢個係俾自己嘅一個目標，就係得到一個商業機師牌照。考機師牌，有啲人係想參加飛行會，有啲人係想有專業資格可以做嘢。揸架飛機週圍玩週圍飛係幾好，但係我覺得用個牌嚟做嘢，特別啲。佢唔係我嘅興趣，而係一個挑戰。上個星期我至同間直升機公司簽約，行到呢個位置，用咗我十五年！好似我出 EP一樣，好多人以為我貪得意就出隻，其實我出呢隻碟之前，玩咗七年 band。唔容易㗎，唔係請咗我就俾架飛機我舞，公司嚟咗部新機 MD902，我都訓練咗幾次至有得出任務。
揸直升機唔係興趣
點解咁鍾意飛機？
唔知呢，就係鍾意！我細個第一次搭飛機，係七、八歲由美國飛返嚟香港探婆婆，我仲記得嗰架係 747，我已經覺得好靚、好大，好似一間大屋。跟住我爸爸安排我哋上第二層入機師室，爸爸唔係機師，但嗰個年代機長對小朋友好 nice，仲請我坐機師位。以前我唔識飛行原理，覺得一架飛機可以帶住我哋飛十五個鐘呢件事好神奇，但係我𠵱家識啲科技同原理，覺得對飛機更有興趣。
小時候嘅志願，到 49歲時終於達成，係唔係好滿足？
我見到機會就會去做，其實又冇睇自己𠵱家幾多歲、幾多歲至可以達到。反而係睇報紙，好似之前兩個 27歲嘅國泰機師撞車死，好可惜。因為我知道佢哋努力咗幾耐至行到呢一步，尤其係國泰，對機師要求好高，過去五至七年有幾辛苦工作，啱啱開始做機師就……
夏里遜福又係撞機！
Harrison Ford is ok， he made a good landing！我睇啲相同啲現場環境，嗰個哥爾夫球場我都去玩過，架機咁樣都 landing到，仲要係完整嘅添，冇人受傷佢又未死，其實 Harrison Ford已經做得好好。成日睇完報紙，見到咁多意外，我都覺得我好 lucky。
大女好彩喺香港 come out
你以前係唔係咁？唔怕死？
個個後生都鍾意冒險，我以前揸電單車都係揸得好快，我試過行……哈哈……都係唔好講，總之就係好快好快，危險嘅快。我成日週圍同人鬥快，試過一次，同另一個電單車司機鍊車，由九龍鬥到香港，出隧道時想贏、就喺架巴士碌側邊俾油過……𠵱家諗番起，真係好 stupid。
每個後生都有呢個唔怕死嘅階段。
係，我啲仔女都係。前幾個月我哋返美國過聖誕，細女喺美國讀書，佢啱啱 16歲已經揸到車，講好咗兩架車一前一後一齊去食飯，佢轉個頭已經快到唔見咗人。其實佢都未過個道路速度限制，我都即刻鬧佢。我好嬲，其實我咁嬲，係因為我擔心。我知，我後生都快過，但係作為爸爸，我一定要講，起碼佢哋想快嘅時候，會諗一諗爸爸講過啲乜。
兩個女一個仔，邊個性格最似你？
我諗係細女，幾幽默，幾 funny，會 get到我嘅笑話，我都喺佢身上見到有 passion。
每個父母都想支持兒女每個決定，但係當大女真係同你講佢係 lesbian時，容唔容易接受？
我成日問我自己一個問題，做父母，我係俾佢哋自己選擇，定係逼佢哋做選擇。我嘅仔女係好負責任嘅人，我知道佢哋有諗清楚揀條咩路行，我諗就算自己唔喺度，我都對佢哋好放心。大女已經係大人，如果佢天生係咁，佢有佢嘅選擇。我對任何選擇嘅人都唔會歧視，尤其，嗰個係我個女。我覺得好好彩，我哋生喺一個自由社會、佢係我個女，唔係生喺其他國家同屋企。你諗下，六十年前黑人連巴士都唔可以坐，其實人類進步得好慢，就係因為歧視令我哋進步得慢。
個個都羨慕你，應該有嘅乜都有，你仲有咩想做未做到？
好可惜，我諗每個演員都想有個 hit film，就好似每個歌手都想有一首 hit song，我做咗咁多年都仲未得到，所以再忙再多嘢做，有戲拍我都一定會接。
開鋪夾 band都係用 Michael Wong做品牌，你覺得你嘅名代表乜嘢？ Sell乜嘢？
係 passion，對生活有熱情嘅 life style。我啱啱開始呢個生意，明白要時間去 build up，但係我最終希望可以做到 MW會係全世界都識嘅香港牌子。
點解香港對你意義咁大？
因為我得到嘅所有嘢都係香港俾我，拍電影嘅機會喺香港得到，我喺香港住咗超過三十年，我嘅屋企喺呢度、仔女喺香港出世。我有得揀，但係我揀咗喺香港養大我嘅仔女，我唔係香港出世，但係我係香港人， don't call me鬼佬……哈哈，呢句係《飛虎》嘅對白。
|
鍾意就快D Share啦！
|
|
|