全知言
睇路呀！ 丁蟹又出山
港股連日升幅強勁，人人爭住入市乘機撈番筆！不過大家咪開心得太早，事關大台宣布本週一開始重播經典劇《大時代》，「丁蟹效應」次次準，唔少股民都有怨言㗎！全知言今個星期就問咗唔少藝人，最鍾意《大時代》邊個角色兼最難忘邊一幕，大部分答案都係離唔開「丁蟹」兩個字；至於阿澤仲話因為丁蟹一句：「我有殺人，但我冇罪！」對佢最深影響喎！
杜汶澤 秋官演技「癲瘋」
我主題曲都識唱，「滔滔的感觸…」，至於最鍾意嗰個就梗係丁蟹秋官嘅演技已經去到「癲瘋」，尤其係法庭嗰幕對我啟示好大，「我有殺人，但我冇罪！」，呢一句嘢對我本人一生影響好大，導致我成日「瀨嘢」！代入我嗰度，就係做乜嘢都好，我冇罪！我𠵱家講番都爭啲想喊出嚟！
李逸朗 方展博有超能力
《大時代》係細個時候睇過，印象唔係好深，記得劉青雲係演方展博，方展博會攞啲汽水罐定雜物砌個三角形定金字塔，成日都會呆望嗰堆嘢，之後就會預知股市係升定跌，呢一幕好深刻，好似有超能力咁。
林二汶 掟仔落街好勁
我睇《大時代》嘅時候就仲係好細個（ 9歲），最經典就有劉青雲同郭藹明，兩個都係我好喜歡嘅演員，唔知係咪呢套戲而兩個走埋一齊，對我嚟講最經典都係有呢對情侶喺度。印象最深刻嗰幕就係丁蟹將四個仔逐個推落街，我細個睇就唔明，但大個諗番就覺得呢個橋段真係好勁！
林家棟 慳妹好鬼慳
我鍾意丁蟹同「慳妹」，「慳妹」真係好鬼慳囉！丁蟹成日自說自話，講嘅嘢就係真理。印象最深嗰場（跳樓嗰幕），自己冇份拍但喺現場（當年戲中做聯交所職員），嗰陣趕廠期，三十六個鐘冇出過錄影棚，我未見過啲經理、高層會買早餐畀我哋食，嗰陣開廠開咗三十個鐘，去厠所都要申請。咁趕係因為我哋拍完廠景後，丁蟹連埋嗰四個仔就要出去拍跳樓戲，所以印象非常深刻，睇番出嚟效果都好震撼！
卓韻芝 全港睇跳樓
我好鍾意《大時代》！細個已經睇到目定口呆，最記得嗰個一定係「慳妹」！好記得佢嘅一舉一動，電視見到周慧敏真係一件好重要嘅回憶！同埋方展博，方展博就係青雲哥哥，佢演出嚟嘅角色好似從來都未係電視見過。最難忘一幕就係丁蟹跳樓，呢個係全香港人嘅共同回憶！因為喺電視出現電影感畫面係好勁，感覺到好似係全香港靜咗落嚟睇嗰幕咁！
街坊回憶《大時代》對白記到今日
一班街坊都對《大時代》嘅丁蟹念念不忘，印象最深刻一幕亦離唔開天台掟仔落街，愈重口味就愈多人記得！
知無不言 言無不盡 我係全知言
|
鍾意就快D Share啦！
|
|
|