轉做 YouTuber又翻身 甜筒輝：叫我改名同你死過！ [FACE - 413] 甜筒輝,鄭文輝,MF,

甜筒輝立志做 YouTuber，去年參加咗「香港最強 Creator新秀戰 2014」拍片參賽，仲攞咗第 5名。

爆 Like王

轉做 YouTuber又翻身　甜筒輝：叫我改名同你死過！

由《喜劇之王》開始大家認識甜筒輝，自此甜筒輝就同周星馳永遠扯上關係，其實甜筒輝真名鄭文輝，十幾年嚟從事過電影編劇、傳媒等工作，同星爺嘅關係令佢經常有機會喺幕前演出，甜筒輝好老實咁答：「我接受唔到第二個代號！」

當然 37歲甜筒輝每次演出都好努力，又唔怕蝕底，最近同小花（譚杏藍）、恆仔拍 YouTube片《得唔得「假」？》，扮天使叫「甜筒 fighting」， 4日就超過 40萬點擊，真係咪當佢食甜筒！

F：你每次造型都好出位，其實你有冇底線？

喺《得唔得「假」？》入面，甜筒輝着上全白天使衫跳 K-Pop，帶小花譚杏藍穿越時空，騎騎呢呢已有 40幾萬點擊。

輝：扮女人我都 ok，其實冇乜底線可言，除非你叫我裸露喺《男人如衣服》裡面，我係底褲 model，呢個係我底線，露 pat pat應該難，因為唔靚！喺《喜劇之王》星爺叫過我除晒衫剩係披件嘢，呢度露晒兩點，嗰下我好唔願意，可能嗰時我年青啦，對裸露有啲抗拒，星爺見我面燶燶，就唔使我除喇！

F：鍾唔鍾意甜筒輝呢個稱號？

輝：我諗用一世，我好鍾意呢個名，我接受唔到第二個代號，夾硬改我都唔肯，我同你死過！其實呢個名唔係出自《喜劇之王》，係出自《十兄弟》，嗰時我做場記，實在太懵、太傻，啲人話我「 XX懵懵食甜筒」，就叫我甜筒輝，但我覺得呢個名幾可愛。星爺拍《大內密探零零發》時我去探班，佢叫我做臨時場記，都係叫我輝哥咋，唔熟嘛；套戲開場嗰啲剪影，原本係星爺，但佢叫咗我代佢，係呀，要拎住把大關刀，好攰㗎！唔會佢做囉！

星爺搵甜筒輝喺《喜劇之王》飾演收數佬，甜筒輝覺得好啱自己：「我就係咁戇居嘛，星爺唔需要我做戲㗎，佢話做番自己得喇，你就係咁戇居！」

電影畫面

F：係咪要靠星爺至有作為？

喺《男人如衣服》內扮 model，仲要係內褲 model，已經係甜筒輝最底線喇！

電影畫面

輝：可以咁講，只要同星爺合作過，呢件事就永遠存在，我覺得係好事嚟，起碼出嚟做嘢都多個 icon吖！亦從來唔介意啲人諗起我就諗起星爺！我同星爺相處咗 3年，關係唔錯，冇同佢嗌過交或者駁佢嘴，佢亦有聽過我意見，喺《食神》瀨尿牛丸標水出嚟嗰下係我諗嘅，佢 buy咗，我係好開心！

F：點解會做埋 YouTuber？

甜筒輝每次拍完片都會畀 4歲囡囡睇，令囡囡都有興趣拍片，甜筒輝話考慮緊拍父女情，更話唔會反對囡囡入娛樂圈。

輝：我鍾意做編劇，將來想做電影導演。早前去咗做啲 social media嘅嘢，至接觸到 YouTube，嗰刻司徒夾帶、 Bomber我都唔知乜水，老闆話我要識吓呢啲 YouTuber喎，將來可能有合作，咁我開始睇佢哋，佢哋經常自編自導自演，我諗我都可以吖。同好多資深嘅 YouTuber傾過，開頭唔好諗錢先，燦哥（廖偉雄）教我，先做有興趣嘅嘢，做得好自然有人知道。𠵱家 YouTube界好多都係鍾意做導演嘅人，呢步係 step one！

鍾意就快D Share啦！

下一篇 》