暑期第一擊《侏羅紀》贏晒 [忽然1周 - 1037] 侏羅紀,MW,

樂園為吸引更多遊客，特意創造一隻混種暴龍，又聰明又兇殘。

歐洋風

暑期第一擊《侏羅紀》贏晒

我頭先去食碗，見到對面戲院張電影海報係咁嘅（當然要誇張小小啦），我每食一啖我對嘅視線都要望住呢棚咁污糟但又型到裂嘅牙，我嘗試食多三啖，但係我真係堅持唔到我宣布投降，即刻撲定《侏羅紀世界》嘅戲飛，同埋睇晒未來 1個月嘅暑期猛片。

《侏羅紀世界》

上映日期： 6月 11日

導演：哥連卓法羅

演員：基斯柏特、拜絲黛麗侯活

劇情： 2年前侏羅紀公園發生慘劇後，原有嘅公司遭到收購，並重新建立恐龍主題樂園。不過人類總要重複同樣的錯誤，班恐龍又走失嘞，嚇到啲人雞飛狗走。

忽評：喺一個講求創新嘅年代，電影竟然敢用番 22年前嘅舊橋，人物設定仲要係細路+專家+樂園負責人，同舊時倒模咁滯。不過對 80後舊一輩嘅我嚟講，依然都會追捧，記得 22年前第一次去環球片場，買咗件侏羅紀 T-shirt，呢啲情意結，無價。

基斯柏特飾演動物行為專家，同樂園女經理一齊搵失蹤咗嘅細路仔。

樂園為吸引更多遊客，特意創造一隻混種暴龍，又聰明又兇殘。

基斯柏特憑《銀河守護隊》廣受歡迎，仲 hit到過斷背界，成為新一代男神。

《賤熊 2》

上映日期： 6月 25日

導演：薛夫麥克法蘭

演員：麥克華堡、雅曼達施菲

劇情：賤熊同女友拉埋天窗，並決定搵人捐精生 BB。

忽評：導演薛夫憑自導自編自行聲演《賤熊》，大獲好評，但上次現真身做《奪命西》，口碑票房皆仆。演技嘅嘢都係交番俾麥克華堡啦（雖然佢都演技麻麻），只要「賤熊」夠賤夠口臭，票房不成問題。

賤熊同女友結婚，仲打算搵人捐精生 BB。

不過前提係要證實賤熊有做爸爸嘅能力先獲准生 B。老友麥克華堡於是搵埋靚女律師幫手打官司。

第一集女主角美娜古絲因懷孕而辭演，曾做過《孤星淚》嘅雅曼達補位同麥克談情。

《未來戰士：創世智能》

上映日期： 7月 2日

導演：亞倫泰勒

演員：阿諾舒華辛力加、李炳憲

劇情： John Connor叫 Kyle Reese（即係佢未來老竇）回到過去保護年輕時嘅阿媽 Sarah。點知時空出錯， Kyle、 Sarah同 Terminator要聯手對抗 Skynet。

忽評：拍過 4次電影、一套電視劇，講真，成個系列抽乾抽淨，疲態盡現，須知道唔係個個觀眾都記得所有情節，時空穿梭又鬼咁混亂。唯一比較吸引，係阿諾舒華辛力加 is back，講完。

角色 T-800今次由後生做到老，後生版借用替身 body再 key阿諾個頭上去，老版則由阿諾自己演出。

李炳憲飾演《未來戰士 2》經典奸角 T-1000，大家認唔認得出？

Sarah Connor同 Kyle Reese呢兩個角色，喺電視、電影都被 N咁多個人飾演過，講真，邊記得咁多。

《巨揪舞壯士》

上映日期： 7月 2日

導演： Gregory Jacobs

演員：卓寧泰坦、祖曼堅尼路

劇情： Magic Mike上一集脫離舞男行列， 3年後被舊隊友邀請短暫復出，進行最後一次告別表演。

忽評：賣肉都有高低手之分，毫無意義硬唧事業線落得封胸下場；脫衣舞男晒肌好正常喎。你唔係要我扯高底褲當工人褲吖？而且電影講嘅係兄弟情，係人性，純睇肉又得，當劇情片睇都 OK。

大量露肉，正呀！

未入行做演員之前，主角卓寧泰坦真係做過舞男。而第一集《 Magic Mike》係源自佢自身經歷。

《迷你兵團》

上映日期： 7月 9日

導演：皮爾哥菲、凱爾巴達

英語配音：珊迪娜布洛、米高基頓

粵語配音：楊千嬅、林曉峰

劇情：迷你兵團為尋找邪惡新主人四圍「騰」。點解唔嚟香港呢？

忽評：將《壞蛋獎門人》最受歡迎嘅角色抽出嚟做番外篇，聰明。之前 tic tac咪出咗迷你兵團特別版嘅，搶嘅大部分都係大人。我敢擔保，即使電影唔係暑假黃金檔上映，都必定大旺收場。

《壞蛋獎門人》嘅人類主角麻麻吸引，都係班迷你兵團盞鬼啲。

迷你兵團今集會跟史上第一女壞蛋搵食，角色分別由珊迪娜布洛同楊千嬅配音。

鍾意就快D Share啦！

下一篇 》