熱爆娛樂: 拒拍劇即入雪櫃　胡鴻鈞出碟無期 [忽然1周

2015年6月12日星期五

拒拍劇即入雪櫃　胡鴻鈞出碟無期 [忽然1周 - 1037]胡鴻鈞,MW,

胡鴻鈞 2012年簽約星煥，頭兩年係威係勢，兩年出兩專輯。前年翻唱何韻詩的〈化蝶〉爆紅，攞獎攞到手軟！

娛樂喧

拒拍劇即入雪櫃　胡鴻鈞出碟無期

大台旗下藝員相繼離巢，花旦小生走完一個又一個，就連二線藝員亦青黃不接。冇人用，惟有動用附屬的「星夢娛樂」的歌手拍劇。

星夢旗下歌手無論舊將吳若希，或是新加盟的何雁詩亦不能幸免。不過日夜顛倒的拍劇生活並非人人接受到。本刊收到消息，由星煥過檔星夢的胡鴻鈞，早前拍畢台慶劇《殭》後，唔想再淪為大茄，希望專注發展音樂，遂向大台提出拒絕拍劇，點知隨即被雪。現時其所有工作已被煞停，就連年底出碟的計劃亦被擱置。

已榮升星夢一姐的吳若希（左），去年開始接劇，拍了 4套，現正趕拍《實習天使》。至於巨聲幫的林師傑與何雁詩，近年亦被安排入劇組，林拍過《愛•回家》及主持《勁歌》，何日前更連接《殭》及《愛情食物鏈》兩劇。

現年 25歲的胡鴻鈞（ Hubert）， 5年前參加《超級巨聲 2》獲得亞軍，成為大台合約男藝員。同年他參與《全球華人新秀歌唱大賽》摘下冠軍， 12年正式加盟星煥即被力捧，首兩年都有推出新專輯。

由力捧變大茄

去年胡鴻鈞跟隨老闆何哲圖（ Herman）過檔星夢娛樂後，公司轉為力捧吳若希及 Herman老婆余詠珊愛將鄭俊弘。資源分薄下，胡鴻鈞近年都未見有新碟出。知情人士指：「 Hubert簽星煥傾約時表明向歌手方向發展，仲要年年有碟出。佢諗住跟 Herman過檔，都係同一個老闆，應該冇咩分別啫。點知佢等咗年半都冇碟出，依家仲要做埋演員同主持，工作唔同晒。」

大台鬧藝員荒，旗下的附屬唱片公司「星夢」亦要幫手救亡，歌手相繼為大台拍劇及主持節目。當中 Herman愛將吳若希劇接劇，主題曲、插曲唱完一首又一首，就連新加盟的何雁詩都要接劇。而胡鴻鈞繼去年《衝線》後，早前再被安排參演台慶劇《殭》。大台拍劇出名日夜顛倒，令胡鴻鈞甚為反感。據知上月尾拍畢《殭》，他膽粗粗向公司提出拒絕再拍劇。

「對 Hubert嚟講拍劇只係玩票性質。之前嗰幾年佢都只係客串過一集咁多。上年拍《衝線》做大茄冇對白唔使點捱，依家拍《殭》做配角有對白，要捱更抵夜，公司先至肯放聲氣話年底幫佢出碟。佢覺得自己好似要用拍劇嚟換出碟。前排佢同公司傾呢個問題，話想專注做番音樂。不過唔聽話嘅小朋友又點會有糖食吖。依家上面落晒柯打，暫時唔俾嘢佢做，《勁歌》主持冇得撈外，仲將佢出碟嘅計劃押後！佢依家啲 job都係之前接落咋！」知情人說。

今年 4月，大台台慶劇《殭》開鏡拜神，飾演大茄的胡鴻鈞亦有出席，企後排的他明顯悶悶不樂，唧都唔願笑。

新劇做阿仔

劇中胡鴻鈞飾演關禮傑之子， 53歲的關禮傑 keep得好，拍埋胡鴻鈞度，似兄弟多過似父子。

有離心辣㷫公司

冰封三尺非一日之寒，星夢將胡鴻鈞放入「雪櫃」，亦與去年盛傳許廷鏗帶胡鴻鈞一齊過檔太陽娛樂有關。知情人士又指：「上年 Alfred（許廷鏗）想拉埋 Hubert過檔，不過最後唔成事。 Alfred唔做歌星都有得做牙醫，佢又受歡迎，公司點會放佢走吖。傾掂數唔夠半年，佢即刻有碟出。但 Hubert本身已有離心，依家又話唔拍劇，公司決定雪一雪佢，等佢自己開竅囉！」

本周二（ 9日），記者致電胡鴻鈞，對於拒拍劇被雪一事，他只說：「我唔方便回應。」至於星夢老闆 Herman聽到本刊記者問及有關提問，即以事忙為由表示稍後回覆，惟截稿前仍未獲其回電。