半年後造人！（真實對白）
打頭陣
7.11四季擺 30圍 拍拖 9個月閃婚 33歲葉翠翠出嫁零禮金
恭喜！娛圈又多個幸福人妻！
葉翠翠與建築師公司副董事周曉東（ Raymond）拍拖短短 9個月，下月 11日將修成正果，於中環四季酒店擺夢幻婚宴。一直被指拜金、釣金龜等上岸的葉翠翠，今次背道而馳嫁個中產打工仔，令外界不少人大跌眼鏡，據知今次她即使零禮金都照嫁。
本刊更得悉，這位年約 40的 Raymond其實曾結婚並有一名 11歲女，換言之葉翠翠婚後即當上繼母，就算招人話柄她都甘願接受。相信 33歲的她，今勻真的感受到何為真愛。
入行剛好十年的葉翠翠，前男友非富則貴，一直搣唔甩「釣金龜」三個字。她曾說：「我知道㗎！呢個稱號會跟我一世，做手術都切唔走，惟有做好自己。」似乎睇得好開。
未拍拖已知男友背景
葉翠翠經歷過多段感情，心知有錢未必買到真心，今次標到尾會，更極速當上羊年新娘。據知其未婚夫周曉東（ Raymond）祖籍上海，是「李景勳、雷煥庭建築師公司」副董事，算是一名高薪打工仔，但亦並非葉翠翠以往追求過的「富豪盤」。
經歷了去年媽媽患病去世打擊，葉翠翠開始追求真正的愛情。不過發展快過高鐵，去年 12月二人剛拍拖不久，本刊已獨家披露二人已計劃今年中秋前後拉埋天窗。周一（ 8日）女方更在微博上載請帖，鐵定下月 11日成為人妻。
每次談及未婚夫，葉翠翠不禁露出甜蜜笑容，但亦盡量低調及處處維護對方。據知 Raymond早年曾離婚並育有一女，女兒今年已 11歲，一直跟 Raymond的前妻同住，葉翠翠跟他開始交往便已知道。
一知情人透露：「 Raymond係一個好直接，好坦蕩蕩嘅人，唔鍾意講大話。啱啱識翠翠嗰時，都未追到手就同翠翠講明自己嘅背景。佢覺得女仔唔鍾意俾人呃，所以一定要清清楚楚，人哋接唔接受到就由對方決定。不過 Raymond今次落啱注，翠翠真係最憎男人唔坦白，佢反而覺得邊個人冇過去？最緊要雙方夾得到，呢啲就係佢追求嘅愛情。」
「佢無條件為我付出」
周一（ 8日），本刊直擊葉翠翠到中環試婚紗和晚裝。對於婚後將為人「繼母」，她表示對此身份絕不抗拒：「有所謂咩？人哋又唔會稱呼你做 step mother嘅！我哋（未婚夫女兒）見過好多次，當佢係朋友，只係年紀細啲。佢會同我分享點識男仔，俾啲相我睇。又叫我教佢化妝，幫佢紮辮。好似有時星期六，佢問佢 daddy出唔出嚟玩，如果佢 daddy話唔得閒，佢就會話：『咁我可唔可以約 Tracy（葉翠翠洋名）姐姐呀？』我覺得好開心，好 warm。（擺酒當晚佢會唔會嚟？）會。不過我係藝人，到時會有好多記者，真係唔想影響小朋友，始終佢跟媽咪住，想低調啲！」
對未婚夫的評價，更加「冇得輸」。「一直以來佢無條件為我付出，我係感受到嘅。佢開頭俾我感覺係踏實、專一，對我好，拍拖到依家佢對我愈來愈好，依家仲好過拍拖嗰時，所以嗰啲（失婚）根本唔係問題。」葉翠翠說。
Raymond與前妻離婚多年，據知他曾因考慮到女兒感受而不打算再娶。知情人續說：「你知大部分離過婚嘅人都唔想再結，貪過癮咩！ Raymond當初都係咁諗，唔想阿女唔開心。但佢同翠翠拍咗拖一個月，佢真係覺得好啱 key，於是就試下安排翠翠同阿女一齊食飯，估唔到佢哋竟然好好傾。當時 Raymond就知道要認定翠翠，冇幾耐就求婚，所以由拍拖到結婚一年都唔夠！」
慳家新娘
下月 11日，二人將會在中環四季酒店筵開 30席。始終葉家嫁女，擺酒地點要有體面，但其它細節不算太鋪張。據知除了每圍約 2萬元的無翅酒席及聘請婚禮統籌師的費用要真金白銀俾錢外，其他如印喜帖、影婚照等都有贊助，至少慳了十多萬。最難得是婚紗、禮服、兄弟姊妹團晚裝，都是好友 Pius無條件分毫不收替葉翠翠設計和縫製，送給她做賀禮。
為此葉翠翠說：「婚禮唔使豪華㗎！要開心，要回憶之嘛！我哋仲要儲錢生 BB嘛！嗰日我又唔想換衫、轉妝嘥晒啲時間。我想出去玩吓，同啲朋友開心吓！所以決定嗰晚一個頭（髮型）、一個妝直落。」據知婚宴當晚，葉翠翠和夫婿還會仿效外國人，在舞池跳舞助興娛賓。「嗰 part係跳牛仔舞，我搵咗老師上咗兩堂，其實好難學，依家我個雞翼位俾佢 fing到好痛。不過真係好多謝 Pius呀。佢一聽到我結婚，就話幫我造衫，仲要造埋姊妹裙，你話俾錢都買唔到呢啲快樂。」
半年後造人
下月便為人妻，翠翠亦有了為人母的心理準備：「我哋都想要小朋友，佢簡直超鍾意，有時喺街佢見到啲小朋友跳舞做動作，佢會跟住做喎！我有問佢使唔使依家造人？佢又話唔想，佢話：『梗係唔好我係想娶你做老婆，如果你生咗就會全神貫注放落佢（ BB）度，咁我咪排第二囉！』哈哈……咁我都覺得係嘅，一定係小朋友排第一。佢就係咁簡單、直接嘅人！所以我哋計劃咗半年後至開始造人，咁我都三十幾啦，差不多。」
慳家婚禮
不少女仔都夢想奢華、童話的婚禮，一生人一次，乜都要豪、乜都要貴。但排場與快樂，葉翠翠卻選了後者，更得到各方贊助，令到原本逾百萬的婚禮，慳番唔少。
使啲乜？
四季酒店 30圍酒席，每席約$2萬，酒水全包共約$60萬。
Wedding planner約$5萬（友情價）
場地布置約$3千（友情價）
印喜帖約$4千（友情價）
3卡求婚鑽戒約$15萬
共逾$80萬
慳啲乜？
禮金（葉父唔收）
婚紗相（贊助）
婚宴大會攝影（贊助）
Moirae婚紗、禮服及姊妹裙（贊助）
髮型、化妝（贊助）
釣金龜 10年多阻滯
眼角甚高的葉翠翠自當上 05年港姐冠軍後，所結識的男友大部分都非富則貴，情史一大籮。可惜釣金龜多年屢遇阻滯，想不到如今因為一個中產打工仔周曉東，尋求真愛。
圈中好繼母
做好繼母呢個角色並非易事，難得葉翠翠跟未婚夫的女兒十分投契，沒有隔膜。其實圈中都有不少稱職繼母，多年來對「子女」視如己出，關係融洽。
林青霞
林青霞在 94年與富商邢李㷧結婚，之後一直與丈夫跟前妻張天愛所生的女兒邢嘉倩生活，兩人關係猶如親生。月前邢嘉倩接受訪問時亦承認說：「好好彩，呢啲係緣份，我依家咁大個會識得 appreciate，呢個都係佢對我父親嘅愛。我同佢關係好好，我好多嘢唔使講佢都知。」
|
鍾意就快D Share啦！
|
|
|
