靚抽王
大台+阿里巴巴=?
所謂創意，就係將兩樣九唔搭八嘅嘢撈埋一齊，成就一件極品。近日有消息指大陸企業——淘寶總公司阿里巴巴將會同大台合作，拍啲適合強國人睇嘅劇。本人覺得非常驚訝，呢件事大台其實已經做咗好多年，乜你哋唔知咩？佢連新聞都調度到啱你哋睇㗎喎！大家唔使驚，其實呢兩間大大大公司合作，係真係會有好多正嘢拍到出嚟，以下係我哋嘅建議：
劇集系列
《咕嚕傳奇》——《魔戒》入面嘅角色咕嚕，佢嘅外形據說係搵馬雲嚟做藍本嘅。貴為原版咕嚕兼阿里巴巴嘅老闆，應該以馬雲為主角，拍番套《咕嚕傳奇》，講述咕嚕點樣俾魔戒折磨到變成咁嘅靚仔樣。
《淘寶風雲》、《淘寶天地》、《淘寶風暴》——呢 3套劇嘅內容，主要係圍繞爭產、家族鬥爭、三角戀等。而劇入面會充滿「淘寶公司」、「淘寶貨」、「淘寶蟹」、「淘寶水」、「淘寶烏龍茶」等等嘅植入式廣告，畫面將會非常豐富，唔會有冷場。
廣告雜誌
《淘寶易》——基本上同《宣傳易》一樣，不過主要係叫你買淘寶嘅嘢。當然佢唔會話你知淘到啲廢物返嚟應該點算。
《馬雲時尚坊》/《馬雲飯局》——網上面成日睇到啲轉貼係「馬雲說 XXXXX」、「馬雲說 YYYYY」，好似馬雲咩都識，講咩都啱咁。咁不如參考友台嘅《慧珊時尚坊》，等睿智嘅馬雲教吓大家婦女心得，人善人欺天不欺嘅做人道理，同埋 CEO之道。另外亦應該參考《志雲飯局》，邀請城中名人上去同佢吹水，然後大家可能會發覺，馬雲其實冇乜嘢講。
免費創意
幫啲冇能力搞搞新意思嘅人度橋，係我哋聰明人嘅責任。
|
鍾意就快D Share啦！
|
|
|