熱爆娛樂: 結怨 38年　阿姐發功《風雲》加戲　趙雅芝變客串 [忽然1周

2015年6月26日星期五

結怨 38年　阿姐發功《風雲》加戲　趙雅芝變客串 [忽然1周 - 1039] 阿姐,趙雅芝,汪明荃,MW,

阿姐出席《風》劇宣傳時全程面黑，並沒有回應記者的提問。

滾熱辣

結怨 38年　阿姐發功《風雲》加戲　趙雅芝變客串

王晶一手打造的無綫新劇《風雲天地》，周一首播有 29點最高收視，算有交代。連王晶都說：「我好滿足！」雖然唔少網民鬧爆膠劇，但因為邀得退隱多年的趙雅芝出山，夥拍當年傳不和的汪阿姐，甚具噱頭，加上兩位姐級已三十多年沒合作，難怪萬眾期待。

據知《風雲天地》最初劇本是以《溏心風暴》作藍本，描寫大婆汪阿姐與二奶趙雅芝鬥生鬥死，不過後來阿姐發功，要求戲份集中在她身上，劇本改完再改，趙雅芝由主角淪為客串。

其他影片：>>爆汪明荃趙雅芝 38年宿怨
>>趙雅芝主角變客串
>>《風雲天地》很膠

據幕後人員透露，王晶最初度《風雲天地》劇本時，一心力邀沒演戲多年的趙雅芝出山，重拾 77年《倚天屠龍記》趙明（汪阿姐飾）與周芷若（趙雅芝飾）惡鬥的經典，故事更以《溏心風暴》兩房爭產為骨幹。而新劇的宣傳片亦以「兩個阿姐以前爭仔，依家仍然爭仔」作招徠，將不和是非擺上枱。

突然關注

周日（ 21日）記者問完汪阿姐微博沒有關注趙雅芝後，阿姐即時做嘢，在微博關注番對方。

阿姐的微博不時宣傳新劇《風雲天地》，更關注各演員，連內地演員都 add埋，卻獨欠趙雅芝。

黃德斌與兩位阿姐有唔少對手戲，他表示：「我同佢哋有同場。（兩位阿姐冇偈傾？）大家時間咁趕，要做準備，佢哋掛住睇劇本，冇時間傾偈㗎！我收工會同阿姐消夜。（趙雅芝有冇去？）佢咁忙，梗係冇」

晶哥表示兩位阿姐在劇中不是由頭鬥到尾，更強調兩人是善良的。

趙雅芝拒做奸

可惜最後因為阿姐發功，趙雅芝又唔想做奸，最終劇本改到面目全非。「阿姐梗係唔想同芝姐（趙雅芝）戲份平起平坐，佢俾咗好多建議晶哥（王晶），又話想多加幾場內心戲，有人更提議將芝姐的角色變成大奸角，增加火花。但趙雅芝講到明唔想演奸角，佢同晶哥講寧願戲份少啲。晶哥左右做人難，最後將芝姐的戲份大大刪走， 32集長劇只得 10集戲份。

「其實芝姐依家有老公（黃錦燊）錫，仔又孝順，唔志在拍戲，肯演都係俾面晶哥，加上佢個仔黃愷傑喺呢行，為咗個仔，多個朋友好過多個敵人吖！所以，女主角變特別客串都唔計較。」知情人士說。

除了趙雅芝和阿姐外，其餘劇中主要女演員全部來自內地，例如飾演阿姐養女，晶女郎童菲，飾演黃德斌太太的趙曉璐，以及劇中大奸角莫小棋，全都不是香港觀眾熟識的面孔，完全不入屋。

片場冇偈傾

據知，拍攝《風雲天地》期間，汪阿姐同趙雅芝同場亦冇偈傾，經常各據一方。

同劇演員爆料︰「幕後已經慣咗阿姐 cool爆，冇人敢撩佢，反而趙雅芝就對個個都客客氣氣。第一日入劇組就『萬歲』（請工作人員食嘢），又有禮貌，唔該前唔該後，成日有講有笑。佢拍晒戲份退出劇組嗰日，大家都話好唔捨得。

「有時拍外景遇到啲 fans，芝姐都好 nice，肯同 fans傾偈，影相簽名都有求必應。但阿姐就成日話要睇劇本、要拍嘢，比較嚴肅。」

一個霸氣，一個識做，難怪趙雅芝甫出現即成為焦點，搶去阿姐唔少風頭！

記者發現，自從拍攝《風雲天地》後，趙雅芝的微博已關注阿姐，反而阿姐的微博則關注大部分的同劇演員，唯獨沒有關注趙雅芝。

周日，《風雲天地》開記招，本刊問趙雅芝與汪阿姐的不和傳聞，她避重就輕說︰「冇（不和），我哋好好。佢（阿姐）係前輩，當年好肯教我哋。（阿姐微博冇關注你嘅？）係咩？我唔知呀，可能佢同我助手聯絡多啩！（阿姐當年唔鍾意你嗌佢做前輩喎！話嗌老晒！）咁佢比我早入行，係前輩吖嘛！（會唔會嫌新劇戲份少？）嗯……我今次都係俾面晶哥咋！戲份多少冇所謂啦。」

《風雲天地》講啲乜

《風》劇講述關若男（汪明荃飾）二子曹志遠（劉愷威飾）因女友車禍離世，寄情事業，更和長子曹志宏（黃德斌飾）起了紛爭。後來志宏得知自己是二奶莫雅文（趙雅芝飾）親生，在宋子樺（莫小棋飾）教唆下，合謀將志遠陷害入獄，還將公司據為己有。志遠出獄後，誓要跟志宏及子樺決一勝負。

由於又是豪門恩怨的故事，女角幾乎清一色是內地演員，網民均對《風》劇反感，加上另一線劇又是內地劇《武則天》，唔少網友留言插爆。

劉愷威和黃德斌在劇中飾演同父異母的兄弟，本來關係一直不錯，直至黃德斌知道自己身世，兩人便反目成仇。

童菲在劇中暗戀無血緣關係的二哥劉愷威，兩人到最後都無法走在一起。

趙雅芝和阿姐由戲外鬥到戲內，在戲中爭奪兒子黃德斌，其中不乏互窒場面，句句有骨。

網友插爆

阿姐再關注闢謠

之後記者再問阿姐上述問題，阿姐沒有回應，只是面黑黑離去。不過翌日，記者發現阿姐微博已關注番對方，可見阿姐的闢謠行動十分迅速。

至於劇集監製兼編劇王晶，則強調兩位阿姐都是忠角。他說︰「唔係《溏心》咁鬥到七彩，佢哋兩個都係善良㗎。（趙雅芝得十集戲咁少？嘥唔嘥啲呀？）佢都係俾面我至拍。你睇啦，第十集之後嚟料㗎嘞！」不過，問到點解汪阿姐戲份重過趙雅芝咁多？他腦子轉了轉，然後打圓場：「咁戲份同角色嘅嘢梗有分輕重嘅！」。

爭秋官鬧不和

其實，兩位阿姐不和要追溯到 77年開拍《倚天屠龍記》開始。正如宣傳片所言，當年她們不但戲內爭仔（鄭少秋飾演的張無忌），加上導演及秋官對趙雅芝照顧有加，一度令阿姐眼紅。「趙雅芝好識做，見到阿姐前輩前、前輩後。但阿姐其實唔 like人哋咁叫佢，因為佢大趙雅芝 7年，佢覺得有人有心玩嘢寸佢老囉！」

趙雅芝當年憑《倚》劇大紅，搶盡汪阿姐風頭之餘，話咁快變成四大當家花旦之一，與李司棋、黃淑儀及汪阿姐平起平坐。本來阿姐與秋官乃古裝劇最佳熒幕拍檔，但隨後趙雅芝反而拍秋官更多。據知有次阿姐向秋官詐型話：「你成日掛住照顧趙雅芝，唔使理我」但秋官明顯同趙雅芝更合拍，除經常讚趙雅芝外，仲公開講笑︰「我愛趙雅芝」，因而令兩人緋聞一度甚囂塵上。

對於與趙雅芝因為爭劇爭秋官屢傳不和，阿姐當年曾表示︰「有好多嘢係冇得爭嘅，想爭亦爭唔到！」咁阿姐又講得冇錯！阿姐在大台四十年，由「鎮台之寶」變成「鎮台至尊」，地位誰與爭鋒！不過趙雅芝則樂於相夫教子，不再戀棧娛圈，主角定客串，其實對她來說不重要。