10年慶！ SJ唔怕新沙士 [忽然1周 - 1039] 新沙士,Super Junior,SJ,MW,

韓氣逼人

10年慶！　 SJ唔怕新沙士

韓國爆 MERS（中東呼吸綜合症），搞到當地少咗 8成遊客。總統朴槿惠為安撫民心，連口罩都唔戴，就去醫院探訪，冒險做公關騷。既然總統都唔驚，韓星照舊出國賺外匯，錢總係要搵嘅。

好似人氣男團 Super Junior（ SJ）小分隊 SJ-D&E兩位隊員東海同銀赫已經 29歲，今年被召去服兵役機會率好高。所以喺 MERS影響下，佢哋照嚟香港開騷。唔講你可能唔知， SJ話咁快出道 10年喇，下個月中會喺首爾開演唱會㖭。有錢搵，真係唔要咩？

上年 9月， SJ喺首爾為演唱會開記招。呢次已經係近年最齊人嘅一次，只爭藝聲未退役。

早前南韓總統朴槿惠喺完全冇任何防護裝備之下，去咗有 MERS患者入住嘅首爾大醫院探訪。咁似前衞生署署長陳馮富珍喺禽流感期間，日日食雞嘅。

D&E揀咗香港亞洲博覽館開騷，貪企到 8千人。但淨係企位都要$1,680一位，好貴呀！

始源都喺兵役名單內，但佢就揀嚟香港發展，經常出席品牌活動，最近上映嘅《赤道》，都見到佢㗎！

搵埋今年

東海同銀赫喺香港亞博開騷，俾粉絲嗌佢哋做「 30代大叔」（即係年屆 30），佢哋即刻扮嬲話年紀大冇體力唔 encore。轉頭仲紮孖辮出嚟扮 cute。

同係 86年出世，東海同銀赫最遲拖到年底就要服役。咁勤力去海外開騷，為咗積穀防饑，搵定未來兩年嘅使費。

玩多兩年

SJ雖然喺海外好紅，但小分隊 K.R.Y.全靠圭賢撐住咋。

SJ小分隊 K.R.Y.由圭賢、厲旭同藝聲組成，前幾日去完日本開巡迴騷。雖然藝聲已退役，但厲旭已經 28歲、圭賢都 27歲，賺埋呢 2年，輪到佢哋去報到喇！

主攻海外

希澈喺 2013年退役後，主攻強國市場，仲參與過國產綜藝《一路上有你》，同偶像邱淑貞見面。

自從 SJ隊員分批服兵役，佢哋就開始獨立發展。好似始源同希澈咁，前者主力拍中港戲，後者就做綜藝節目。話晒人仔好搵，仲要唔使同隊友分錢，點計條數都有 so。

現役新兵

神童原本喺上年就要服役，但因腰盤突出嚴重，延遲服役。咁啱就同剛剛新婚嘅晟敏，喺今年 3月底一齊入伍，無得慶祝出道 10周年。

當緊兵嘅神童咁啱路過綜藝節目喺軍營入面嘅拍攝場地，同長官打招呼，就俾電視台影咗佢嘅新 look。

晟敏喺上年 12月同音樂劇演員金思垠結婚，新婚唔夠 4個月，就被召去當兵。

鍾意就快D Share啦！

下一篇 》