熱爆娛樂: 不忿母親全天候監控　龐景峯怒啤郭秀雲 [忽然1周

2015年7月3日星期五

不忿母親全天候監控　龐景峯怒啤郭秀雲 [忽然1周 - 1040] 郭秀雲,MW,

郭秀雲對兒子龐景峯的控制慾極強，多次搶答，搞到囝囝怒啤，擺明唔 like。

娛樂喧

不忿母親全天候監控　龐景峯怒啤郭秀雲

郭秀雲兒子「錢景峯」，最近簽了 East West Artist，成為吳建豪及蕭亞軒的師弟，進軍樂壇。近日，郭秀雲與前夫錢小豪因為兒子入行掀罵戰，令囝囝慘變磨心。

上周六，奉母之命改姓的「龐景峯」，在媽咪郭秀雲監控下召開首個 MV記者會。本刊記者訪問他，惟每每他想回答時，郭秀雲都不停搶答，令在旁的龐景峯十分冇癮，多次怒啤母親，以示不滿。不過，對於生父錢小豪，他卻處處維護。

其他影片：>>龐景峰 5度改名兼換姓

近日忙於錄音的龐景峯，上周六為首個 MV召開記者會，明明是當日主角，不過，風頭卻被星媽郭秀雲完全蓋過。

13年

一年前龐景峯仍然是肥仔一名，經由韓國經理人狂操之後，現在已操到一身肌肉，跟韓國男星無異。

媽咪事事搶答

當日本刊記者亦深深感受郭秀雲的霸氣。每當記者詢問龐景峯，郭秀雲總一手攔住，令他即時收聲。記者問龐景峯對生父錢小豪的感覺，兒子未開口，郭秀雲已經搶住話：「我哋根本冇罵戰，所以佢（指兒子）亦冇需要答！」連問題都未聽清楚，就截停個仔，十分霸道。

記者再問龐景峯：「你同公司幾時簽約？」郭秀雲馬上說：「間公司係我搵到嘅，好好㗎，但未方便透露太多。」被截停幾次的龐景峯，曾多次以「怒啤」眼神作無聲抗議，但郭秀雲卻一於少理。最後龐景峯終於忍不住投訴：「阿媽，你俾我講啦，我好似乜都冇講！」此時郭秀雲才肯收聲，但未幾又再故態復萌。郭秀雲硬搶兒子風頭，又滿場飛「招呼」各傳媒記者，令記者議論紛紛：「乜郭秀雲搞到個仔成個裙腳仔咁㗎！」

對母親黑面的龐景峯，談到生父錢小豪時，語氣當堂冇咁忟憎：「爸爸是很少見，因為我成日唔喺香港！」原來兩父子上一次見面已是半年前，但龐景峯仍大讚父親︰「佢係非常好嘅演員，好專心去做佢嘅工作！我冇嬲佢冇時間陪我，佢始終係我爸爸。」

記者會當日，龐景峯送給 MV女主角、前韓國女子組合 After School成員嘉熙的禮物，也是由郭秀雲負責揀的。

錢小豪與郭秀雲最近為了龐景峯進軍韓國的事吵架，郭秀雲大鬧前夫抽水，更插爆對方冇俾贍養費。而錢小豪則反指郭秀雲霸住個仔。

不介意幼弟得寵

對於錢小豪偏心同父異母的弟弟，龐景峯絕無呷醋，更趁着霸氣阿媽不在旁，悄悄對記者說：「細佬仲細，爹哋俾多啲時間照顧佢係應該。我都大個， 24歲可以獨立了。」對於父母罵戰，他無奈說︰「之前我不在香港，否則都會做和事老。」

對於改了五次名同姓，龐景峯不置可否，只謂：「無論人點叫我都好，我都係我自己，而且我依家已經行緊我自己路（指簽約韓國經理人公司），唔想再講以前有關屋企人嘅嘢」

儘管 24歲的龐景峯已成年，郭秀雲仍對他全天候監控，令兒子慘被嘲「裙腳仔」。知情人說︰「阿峯好遷就媽咪，但其實係怕咗佢。因為佢媽咪日哦夜哦，所有嘢都要插手，尤其關於事業嘅嘢特別緊張。阿峯雖然唔鍾意，但一直都是敢怒不敢言，因為之前試過同媽咪撐，不但冇用，仲俾對方省到一面屁。早排佢媽咪同錢小豪公開罵戰，佢好唔開心，私下都叫過佢媽咪收口。佢同老竇雖然見得少，但關係唔差，兩仔爺有偈傾㗎！」

家和萬事興，誰欠誰都過去了。為了兒子，郭秀雲似乎應該學懂放下，對前夫的怨懟也好，對兒子的控制慾也好。