娛樂喧
買生果籃提親 鄧健泓明年娶石詠莉
鄧健泓的感情生活向來精采，女友一個接一個。當大家都認為他是無腳雀仔的時候，原來他正打算為真命女友停下來。
去年初鄧健泓與石詠莉合演舞台劇，公開情侶關係後打得更火熱，早前已經承認同居。據知兩人對結婚一事早有共識，鄧健泓打算明年便會迎娶女友。日前本刊更目擊他到九龍城細心挑選果籃，向未來外父外母提親。人生大事喎，當然不能馬虎。
今年 41歲的鄧健泓出道 18年，緋聞不斷，歷任女友皆為索女，包括原子鏸、李詩韻及龔嘉欣，卻甚少傳出婚訊。但自去年初他與石詠莉合作舞台劇《大酒店有個荷李活》撻着後，感情發展迅速，不時被影到出雙入對。
自資搞製作
鄧健泓多年來事業不算順暢，年底更與大台滿約，不過他未有續約之意，反而決定自己開創事業。據知他與數名音樂好友合資，開音樂製作公司做老闆，公司第一擊就是自資 6位數字為女友出發燒碟。正所謂夫妻同心，其利斷金，上月 19日石詠莉的專輯推出不足一個月，火速打入 HMV唱碟排行榜及 IFPI香港唱片商會銷量榜，成為雙料亞軍。
不過鄧健泓似乎想喜上加喜，出碟當日，本刊發現他到九龍城街市購買生果籃，所送的生果亦經過精心挑選，全部日本進口，保守估計花了近千元。知情人士指：「 Patrick（鄧健泓）一直都視 Sukie（石詠莉）為結婚對象，佢嗰日去買果籃係探 Sukie父母兼提親。 Sukie都知道男友好錫佢，之前已經口頭應承咗嫁俾 Patrick，決定下年結婚。雖然 Sukie冇強求男友做啲咩，不過 Patrick明白結婚始終係女仔終身大事，唔馬虎得，所以佢都 plan緊正式求一次婚。」
揼錢為女友出碟
為了冧女友，鄧健泓不單出錢出力，更以情打動。早前石詠莉到電台宣傳唱片，訪問現場忽然播出鄧健泓特別錄製的聲帶。內容雖是指女友蠢鈍，但會撐她一世，做她喜歡做的事，情深錄音令石詠莉當場感動到眼濕濕。知情人士指：「 Sukie近呢幾年主力都係做主持同拍戲，出過兩隻唱片，不過冇乜 noise， Patrick知道女友真係好鍾意唱歌，想大家留意佢嘅歌聲，所以明知做發燒碟一定貴，都大拿拿拎幾十萬出嚟。」
就求婚一事，本刊記者致電鄧健泓，他承認快將拉埋天窗：「拍咗拖咁耐，雙方家長梗係見過不過求婚好講 timing，所以唔會刻意去做！今次幫 Sukie出碟係為咗完成佢一個夢想，完咗呢個計劃，就到準備到下一個計劃！（即係準備結婚？）係呀！我年紀都唔細，一早視佢（石詠莉）為結婚對象，會喺呢兩年完成埋呢個計劃。」
石：佢係好老公
男友承諾結婚，石詠莉又點睇？她回覆本刊記者時笑笑口說：「我哋一早有呢個計劃， Patrick係一個肯為朋友、身邊人付出，好有責任心嘅男人。佢見過我屋企人，爹哋媽咪都好滿意佢，佢絕對係一個嫁得過嘅好老公。」讚到男友天上有地下無，一顆恨嫁的心表露無遺，似乎距離鄧太之路不遠矣。
男女食神
鄧健泓多年來無寶不落，圈中索女友一個接一個，全都是合作拍劇擦出愛火，因此被宅男視為「高登公敵」，同時亦有「港姐殺手」之稱。不過其現任女友石詠莉都不相伯仲，入行 8年的她多年來亦不乏緋聞。
|
鍾意就快D Share啦！
|
|
|