含淚回應：結婚暫時唔再考慮！（真實對白）
探熱針
美國冷靜一個月 朱慧敏返港將 Eddie降呢變朋友
原本已在四季酒店訂下三十圍酒席，明年二月出嫁的朱慧敏，籌備婚事期間與未婚夫 Eddie（彭懷安）開拖，加上男方夜會𡃁模斷正，準新娘寧願撻訂，將婚事煞停並出走美國。
上週，已返港的朱慧敏含住眼淚話婚事繼續押後，還將 Eddie降呢為朋友。
Eddie冇接機
搞婚事搞到臨近分手的朱慧敏，上月遠飛美國散心，情傷未癒，還被無綫在傷口上灑鹽，在《愛•回家》大結局，重播數月前一集講及她向馬壯（黎諾懿）拒婚的情節：「你相信我，你仍然係我嘅終點，我哋會有結婚嘅一日，只係我想慢啲。」
上週二（六月三十日），黑色口罩加太陽眼鏡遮冚的朱慧敏由美國返抵香港，曾表示跟未婚妻保持良好溝通，有信心箍煲成功的 Eddie未有現身接機，出閘後，有朋友幫手拖行李的朱慧敏，急步行去上車返回清水灣半島，當晚亦未見 Eddie蒲頭。
含淚暗示分手
幾日後（七月三日），精神看來相當不錯的朱慧敏晨早出動到西貢拍微電影。問她跟 Eddie是否和好如初時，朱慧敏更將未婚夫降呢為朋友。
壹：壹週刊朱：朱慧敏
壹：同 Eddie關係有冇改善？
朱：有正面改善，溝通良好、開心。
壹：婚事照舊還是取消？
朱：（帶點難堪）唔……唔諗住！
壹：而家你哋關係如何？繼續係情侶還是朋友？
朱：知己囉！朋友……同埋係我好好嘅生意夥伴。
壹：算唔算係分咗手？
朱：（聽到分手兩字，朱慧敏開始眼眨淚光，咽哽說下去。）知己囉！感情事我唔係好想講太多，因為感情嘅嘢唔係三言兩語解釋得清楚，我哋仍需要啲時間。主要問題係行到婚姻呢步，以前唔係好發覺嘅問題出現咗，需要時間各自處理，所以現階段大家專心工作先。
再冷靜半年
壹：仲未原諒佢？
朱：唔係。我從來冇唔原諒佢，由始至終佢都好好，我好信任佢，因為我好清楚佢本質。
壹：當日答應結婚係一時衝動？
朱：唔可以咁講，我同佢係相愛
㗎嘛！
壹：最近佢為你改變咗好多！
朱：係！好感動，食咗十幾年煙都戒咗，以我所知，佢而家冇乜飲酒，不必要嘅夜間應酬亦唔去，變晒日間活動。
壹：咁 Eddie仲係咪你結婚對象？
朱：其實而家唔係佢問題，係我問題，我想專注工作多啲，結婚暫時唔再考慮。
據了解，在朱慧敏出走期間， Eddie為挽回未婚妻的信心，戒絕夜蒲，日間活動，也只是跟舊同學跑步、打網球，洗心革面守行為，但朱慧敏未有因此軟化，返港後更向對方提出再冷靜多半年。
「 Queenie知道呢段時間 Eddie為佢做咗好多嘢，但問題已經唔喺 Eddie身上，係佢發現自己好想過番單身生活，覺得一個人自由自在好輕鬆。不過佢哋仲未完全達成共識， Eddie仲係好努力箍緊煲。」知情者說。
朋友關係
男女分手，唔一定會惡言相向，反面收場，不少圈中情侶，就算其中一方犯錯導致分手，都可以好來好去，甚至做得番朋友。
|
鍾意就快D Share啦！
|
|
|