真人騷
拳頭交玩死自己 《玩爆你個腎》 Kevin Boy：我唔會衰咗就走去信耶穌！
時代變了，𠵱家 hit rate才是王道，套用 Kevin Boy李健宏的原話：「你估班師奶咩？以為上電視至係明星？」
20歲從澳洲回流，幫 LMF打鼓起家，夾咗十幾年 band行出街都冇人叫得出佢個名，直到 37歲人至靠 YouTube玩人系列《玩爆你個腎》，獲黃柏高賞識簽約做藝人， 39歲人至唱咗首〈我也是歌手〉話俾人知佢都識唱歌，遲雖然係遲咗啲，不過 Kevin Boy可能是娛樂圈靠 hit rate自救的最成功典範。
簽約主流娛樂公司，由地下走上地面，即係話自由咗十幾年嘅 Kevin Boy係時候跟地面嗰套規則做人，問題來了：話說一頭金毛、成身紋身， Kevin Boy外型臭寸，做人曾經亦的確衝動愛搞事， 04年在夜店出手得罪同行，今時今日都被杯葛緊。理得你喺 YouTube有幾紅，理得你老細係 Paco，首新歌係唔播就唔播，吹咩？
「係，錯就係錯，最緊要有錯就要認，我唔似啲人，𠵱家好興㗎嘛，個個一有啲咩冬瓜豆腐就走去信耶穌。我成日都回帶諗，其實嗰下喺夜店碰撞，爆完粗行咗去咪得囉，唔郁手咪乜事都冇囉……但係老老實實，做人唔衰過，又邊知錯呢？」
嬲足 11年，係就係耐咗啲，不過聽 Kevin Boy原原本本講番事件始末，的而且確，呢條金毛仔郁手郁腳，連隔籬睇唔過眼做證人嗰啲都兇埋話要打埋一份，又係面目可憎唔抵幫。換着你，又會唔會原諒佢先？
就嚟四張，先有人簽。
點解由鼓佬去咗唱〈我也是歌手〉？
舊年夾咗隊 band……你知啦，咁大個人要去夾班小朋友係難啲，夾夾下夾唔到落去都唔奇。但我舊年又拍咗 now嘅旅遊特輯《玩 X爆台灣》，主題曲本來諗住隊 band唱，既然冇咗隊 band，惟有自己唱。
你話啲新 band友係小朋友？
廿七、八歲嗰啲。你知我哋以前夾 band，幾經辛苦先搵到公司簽，但𠵱家啲小朋友好擔心，以為簽咗公司就要逼你拍戲、上電視……
算唔算係諗多咗？
佢哋真係未出嚟捱過，坦白講，你估拍戲、上電視想上就有得上咩？真係諗多咗太多顧慮。我龍年出世，今年已經 39，唔係好多時間再湊啲細路，不如仆 X就仆 X啦，自己頂硬上。
當初點解會做鼓佬？
我半歲由香港搬去澳洲，爸爸係廚，技術性移民。我喺嗰邊讀寄宿學校學識打鼓，然後二十歲返香港，就唔捨得再走。我唔可以話坎坷，澳洲屋企咁舒服都唔返，條路係我自己揀……返嚟做過酒店、做過紋身店接待，夾完 LMF夾 King Ly Chee夾 Hardpack，然後識咗梁翹柏帶我入 TVB、出去接騷接演唱會，直至 10年 Hardpack同吳雨霏 crossover，我諗到條橋玩佢，開始有《玩爆你個腎》系列……拍到兩年前，人生第一次有人賞識，太陽娛樂話簽我。
做到成 37歲先有人覺得你值，感覺係點？
好多人叫我諗清楚……我覺得，喂，嗰個係黃柏高喎！我 37歲有咩未試過？型又型過喇， inde又 inde過喇，有咩輸呢？你知唔知以前我同隊 band敲咗幾耐門都冇人想理？《玩爆你個腎》都係㗎，開頭試過 book晒場、演員、車，前一日至話唔玩，原來開會有個唱片公司阿姐話唔知我係邊個喎。中國人就係咁，白鴿眼，之後個阿姐咪自己打俾我，嗰日我仲記得我屙緊屎添：「喂， Kevin仔，幾時得閒玩下我啲 artist吖……」
啲酒好貴，唔好益佢！
你？
你講開呢句我又醒起喇……我哋呢啲幫演唱會打鼓，都知咩事唔太鍾意黐人玩。係有一次做完演唱會，個歌手自己打嚟堅持叫我哋落 K，無謂掃興落去坐下，點知支酒斟到去我面前，俾個宣傳㩒住斟酒嗰個話：「做咩要益佢啫？」係做咩要益「我」，兜口兜面喺我面前，講到明係我囉……
你同超儀、 Eason咁多大星 friend，唔講仲以為你好過癮添。
實際上係咁，啲星係無分彼此，但有時啲唱片公司職員仲巴閉過星。但真心話， Paco間公司無論大細，無分彼此。坦白講，我非主流，又唔係咩大星，啲師奶係咁諗，要喺電視見到至叫做星，所以我幾時都好感恩，無論遇到咩機會、咩訪問都係。我係咩呢？本來就係一個小小小小小鼓手。
你後生時咁火爆，點解俾人兜口兜面咁講唔發火？
其實佢冇錯，每個人都有權選擇佢做邊種人，佢想做小小冇禮貌嘅人，佢開心咪得囉。人大個，就知火爆解決唔到問題，我呢幾年俾人害咗都唔同佢計較。
幾時俾人害？
話說我好多工作機會係 LMF班兄弟、係 Joey Tang帶俾我，我哋嗰代啲人係咁，有機會就會諗下可唔可以彈俾兄弟。有一次帶咗隊 band去 TVB開工，有人想頂我個 band leader位嚟做，去 TVB投訴，又話 check數又盛話我遲出糧，結果搞清楚，咪就係 TVB未過數俾我囉。原來我今日俾飯你食，你聽日想食埋我碗飯，咩好兄弟咩撐你，全部 bullshit，真係兄弟，根本唔使講咁多廢話。
年少無知，遺害 11年。
屋企兩個妹似唔似你？點解你會變咗咁？
佢哋好乖，一個做銀行，另一個係 housewife。我唔係曳，係唔正路啫，由我 20歲紋第一個身開始，代表嘅係我行一條咩路，而條路冇得返轉頭。既然冇得搵正職，我就要自己打鼓打得再好啲，要可以維生。
喺澳洲讀書有冇俾人蝦？
一定有種族歧視，尤其係中學入咗寄宿學校，好多鬼仔喺郊外大，一世未見過亞洲人，好仇視，粗口、侮辱大把，試過成櫃啲衫俾人掉咗出街，成日打我。以前細個我都好多鬼仔 friend，一路去到嗰陣時，至知道，原來無論喺嗰度住咗幾耐，我喺佢哋眼中都唔係自己人。開頭我都硬食，跟住發覺唔得掂，我塑造個「癲佬」形象俾自己， locker擺晒 cutter、鉸剪、郁啲發癲掃冧成枱嘢、臨瞓去兇啲同學……直至老師發現，咪講晒俾佢哋聽點解要咁做囉。
十年前夾 LMF夾 band同去年隊 band，真係可以爭咁遠？
真係爭咁遠……唔怪得佢哋，𠵱家啲小朋友屋企環境太好、聽得故仔太多，以為入咗間公司就係公司想你點就點。地下同地面點都有差別，地下嗰班人係覺得自己型啲，啲小朋友話：「我唔想做 artist喎！」，我真係照直講：「放心啦，你有排都未係 artist囉！」。我唔係冇原則，唔係傷天害理咪得囉，我喺呢行一早已經明白一個道理，唔係自己想點就有得點。好似最簡單一樣，啲人話首歌喺電台播又點又點……你估你首歌有得喺電台播真係咁易吖？講好多人際關係，啲嘢嚟得唔易㗎。
後唔後悔？
我成日都回帶諗，其實嗰下喺夜店碰撞，爆完粗行咗去咪得囉，點解要郁手？但係我又會諗番，如果唔係嗰一次，我又唔知衰，可能會仲大鑊。人係需要挫折嘅……每個人都有過去、都犯過錯，當個教訓。
同你喺寄宿學校道理一樣，喺呢行要有生存方式？
我呢啲喺煮到埋嚟食，好食咪食囉，唔好追，最緊要自己覺得好玩！《玩爆你個腎》我都係為咗自己 high咋嘛。回報對我嚟講唔重要，我哋係想俾多一個選擇香港人，呢個係趨勢，唔係個個想睇電視嗰啲一早夾好晒度好晒嘅嘢。百萬 hit rate又點？多過我哋點擊嘅大把，如果每次睇點擊做人，點會開心？有得做音樂，都係做咗先，難得有公司支持，享受咗先，唔好諗會得到啲咩、又會失去啲咩！
|
鍾意就快D Share啦！
|
|
|
