【本報訊】「香港人似曱甴，到哪都能適應，但鍾意台灣生活真係講唔上，有啲文化上或其他差異，始終覺得香港好少少。」在香港做物業管理的30歲OL Cynthia，前年8月嫁到台灣，不甘做家庭主婦，與香港朋友合資在台北車站旁開旅館，她負責營運。
開旅館遭無理投訴
富藝術氣息的小旅館開業8個月，生意很旺，但講到台灣創業經驗，Cynthia說：「港人特色，急囉！慣咗快啲快啲，但喺台灣有時你急唔嚟嘅，好似一啲部門間審批係要個半到3個月先做得成。」從找舖到開業歷時1年，她事事親力親為，看得台灣裝修師傅好驚訝：「可能台灣男女平等觀念冇香港咁強，佢哋會話你一個女仔，點解咁搏日日踩地盤監工。其實我想多啲交流，睇下點互補不足更完美。」
Cynthia說在旅館林立的台北車站，港人以外來者身份插旗不易：「我哋開張至今不斷俾人無理投訴，雖然無犯法，但成日俾人查影響到啲客。」Cynthia同區內消防管已成熟人：「上來嘅消防，警官都覺煩！」
遇到丈夫前，Cynthia從未想過要移民台灣。做了過埠新娘後食不慣、朋友少，她一有機會就飛回香港：「買嘢食嘢探屋企人，掛住茶餐廳啲檸檬茶，黃色檸檬果隻。」直到懷胎6月不宜再飛。
人人說台灣較有人情味，她有不同體會：「我大肚喺台灣從未試過被讓座。反而返香港佐敦，某間繁忙且經常被指服務態度好寸嘅老式茶餐廳，未排隊就有人話『小姐你大肚啊！』安排4人卡座畀我一人享用。香港人內裏係友善，只係環境所逼，自我保護意識較強，同躁少少。」
■記者楊倩
|
鍾意就快D Share啦！
|
|
|
