掃呢頁CODE去手機

2015年8月20日 星期四

天造地設:征服碩士港姐岑杏賢 袁偉豪同居做煮飯公 [壹週刊 - 1328] 港姐,岑杏賢,M1,



港男配港姐,袁偉豪同岑杏賢靜雞雞拍拖大半年。

探熱針

天造地設:征服碩士港姐岑杏賢 袁偉豪同居做煮飯公

○七年港男冠軍入行的袁偉豪,捱咗八年,在最近出街的新劇《拆局專家》終於擔正男主角。事業有起色,感情同樣如魚得水,靜雞雞同港姐岑杏賢住埋大半年,甚至公開表明對方是結婚對象。

成事的話,將開港男娶港姐先例。

密密換畫

先後跟胡定欣、林夏薇傳過緋聞的袁偉豪,一三年曾與舞台劇演員馬沛詩拍拖,也是他入行以來唯一半公開的女友,不過這段情已成過去,早在大半年前,袁偉豪秘密撻着一二年最上鏡小姐岑杏賢,並極速發展至同居關係,唔少清水灣半島的住客,都見過袁偉豪同岑杏賢在屋苑會所做 gym, sweet爆。

去年十一月,已經搞掂岑杏賢的袁偉豪,拖埋女友出席黃長興的萬聖節派對,將她介紹給陳敏之、 Neway大少薛世恒等朋友認識。三十四歲的袁偉豪更被碩士港姐征服,修心養性戒蒲,還向身邊友人認定岑杏賢是結婚對象,希望儲到錢兩、三年後結婚。

「阿 Ben(袁偉豪)同 Jennifer(岑杏賢)一齊後,個人定性咗好多,以前有局佢例到,但而家就匿埋玩煮飯仔。 Jennifer有學識又有修養,有時同阿 Ben一齊出席朋友飯局,佢都好靜咁坐响男友身邊,唔會巴巴閉閉又唔會事事管住。阿 Ben話自己都三十四歲,搵到個啱就結婚,佢真係有好大改變,見女友鍾意食甜嘢,仲專登學整甜品,成個住家男人咁。」袁偉豪友人說。

兩個經常孖住去飯局,袁偉豪更為氹女友學煮甜品。

去年底兩個拍拖冇耐,孖住去黃長興間餐廳搞嘅 party。

捱咗八年,佢終於拍住錢嘉樂,喺《拆局專家》擔正。

公開落訂

致電袁偉豪求證跟岑杏賢拍拖一事,當事人大方承認,還公開「落訂」。

「佢(岑杏賢)係個好女仔,我希望大家都互相視對方為結婚對象,同居嘅事就唔方便講。」

至於雙方已經見家長,為將來一家親做好準備,袁偉豪說:「見過都係好平常啫!總之有信心可以去到結婚地步。不過呢幾年會專注工作,感情事唔想太高調,到真係去到成家立室嗰步,我會大方公開講。」

12年選港姐時,岑杏賢唔算大熱。

已經是碩士生的她,當選後再讀諮商及輔導文學碩士,去年畢業,同屆的朱千雪、湯洛雯及合作過的許奕妮有觀禮。

07年

選港男時,任私人教練的袁偉豪身體頗健碩,但近年勤操的他,身形仲有睇頭。

溝女簿

98年拍過維他奶廣告,故選港男時被冠以「維他奶仔」稱呼的袁偉豪,當日以大熱身份勝出。入行後雖一直徘徊配角位,但憑健碩身形甚有女人緣。

港姐邱詠恩

07年袁偉豪選港男時,被踢爆跟 06年落選港姐邱詠恩拍拖,女方還在 blog透露擔心男友當選後多女埋身,但袁卻否認情侶關係。

胡定欣

09年同胡定欣合拍劇集《古靈精探 B》,有指他力追對方,但最後輸俾上緊位嘅馬國明。

林夏薇

11年與林夏薇拍《結分@謊情式》時,指他倆拍嘴戲戲假情真,袁不理林夏薇有正印男友楊政楠存在,開工管接管送,又被拍到撐枱腳。但呢段地下情只得幾個月貨仔。

馬沛詩

10年參演舞台劇《我不要被你記住》,跟肉搏對手馬沛詩撻着,拍拖多年,一度分手轉追林夏薇, 13年復合後公開表示希望儲到老婆本迎娶對方,可惜講完冇耐散埋。

撰文、攝影、攝錄:娛樂組

nextplus.nextmedia.com

鍾意就快D Share啦!