真人騷
最憎回帶嘟姐 16年情 呂方：解釋完當我放屁！
53歲，呂方下月紅館的演唱會，原意是在兩年前舉行，慶祝 83年攞新秀冠軍、 13年剛好入行三十周年，可惜紅館爆期，一等就等到 2015年。
我的理解是，呂方一向怕見記者，其實遲開也有遲開的好，能把避無可避的宣傳期再推推。
「做咗咁多年，點會唔慣記者嗰套，係咪啲話題真係好冇新意？」
隔幾年呂方就俾人無限 loop的話題有二，其一是 92年被指高攀鄭裕玲，十六年情分手時呂方被指食軟飯、炒股輸晒女友身家；其二是他有班神枱級好兄弟，大家一樣入行三十年，相比之下星運着實爭得遠。
呂方班 friend，講緊係朝偉同學友，老實講有邊個拍埋朝偉同學友，唔係暗星？
呂方個前度，講緊係高佢三吋，一年到尾活躍於電台電視台嘅鄭裕玲，偏偏你又低調唔肯解釋，被人覺得高攀，可以怪誰？
「唔係我唔肯解釋，當年我記者會開過，律師信又出過，但係有用咩？
咪又係俾人當放屁？我知呢行就係咁，會講一世，咁我唔去記一世咪得囉！」
聽起來豁達，實情係有火。有些話題無論遠射定曲線，我試過，唔俾掂就係唔俾掂。
十年冇出新歌，今個月推出〈偶像荒〉，下個月開個唱，呂方說，最放唔低就是站在台中央的感覺，和大家一起集體回憶回下帶唱〈不捨得你〉同〈你令我快樂過〉。
之但係，呂方同嘟姐，又何嘗唔係好多人嘅集體回憶呢？
你可以講一世，但我唔會記一世。
習慣嗎？出返嚟見記者？
做咗咁多年，唔會唔慣。上一次都係四年前開演唱會啫。
你覺得煩唔煩？每次出嚟都係答嗰幾條問題？
係呀，你講得啱！嗰啲問題好似三十年前都問過，點解咁得意嘅？
好似呂方嘅字典除咗鄭裕玲就冇其他嘢一樣？
重覆都係嗰啲話題……係囉，冇新意梗有，你哋冇新意，但係我唔鍾意望返轉頭。成日問我舊陣時段感情……話到明舊陣時，仲講嚟做咩？
但呢行的確係咁，啲嘢興講一世！
冇錯，呢行就係咁，啲嘢會講一世，你唔好記一世咪得囉！通常都係啲人搵嘢嚟講，日常生活我都唔會同朋友講呢啲。
除咗上一段戀情，鍾唔鍾意人哋成日攞你同學友、朝偉比？
大家做咗幾十年朋友，你話有咩好比？你會唔會同屋企人比？同朋友比？大家做得朋友，就唔會比身家、比地位，啲人咁問，係佢哋唔了解我、唔了解我啲朋友。
有冇一個階段真係嬲，好介意人成日都講呢啲？
啲傳媒係咁，專寫負面，詆譭人，有一段日子梗係會好嬲。我都話過，好彩香港唔同美國，唔係周街都買到槍……
係唔係真係因為同鄭裕玲分手，形象一落千丈？
梗係真，根本啲媒體變晒，唔使你寫得好，你照事實報導就得㗎喇，當時好多新聞都係作出嚟，你話點解？就係啲人心地唔好囉。你話個人會唔會開心？你明明唔係呢啲人，人人寫到你係呢啲人……
你以為解釋有用咩？
係唔係因為你唔肯解釋？
我以前都覺得自己性格缺陷，唔鍾意解釋、朋友淨係幾個就夠、見到人影就會唔自然、唔想講！但嗰次之後，講真，你以為解釋有用咩？我開過記者會、發過律師信，話我炒股票輸身家，其實識我嘅朋友就知，我連股票係咩都唔知！你話解釋嚟做咩？人哋當我放屁咋！
自此以後你就好抗拒記者？
唔係話抗拒，係𠵱家嗰套真係唔同以前。我搭過機鐵，幾個人追住入車廂影相，個個部機都黐住我塊面，我真係怕咗佢哋……唔只我怕，連車廂其他人都睇唔過眼，問我使唔使幫手打佢哋……我話打還打，等我走咗先好打。
講下演唱會，今次係同管弦樂團合作？
係，五十人大樂隊，我都未試過，幾 grand下。出唱片機會少咗，開演唱會係歌手必然要做嘅事，原本諗住早啲開， 13年入行三十週年，但申請體育館太難。我都離唔開呢一行，想俾自己一個紀念。
為咗演唱會目標減幾多磅？
咁我又唔使好瘦，我太瘦唔好睇㗎！個人已經唔高，要有番啲重量至壓到台，如果唔係企上台成粒骰咁，觀眾好易搵唔到我。我平時好為食㗎，尤其係雞翼，我雞翼王嚟㗎，一餐 BBQ可以食廿幾三十隻！
除咗冇機會出碟，所以要開演唱會，上台嘅意義仲有乜嘢？
企喺個台中間嗰樣嘢，我唔捨得……𠵱家除咗演唱會好少呢個機會。唔只香港，仲有美加同內地，對我𠵱家呢個年紀嚟講，係一種享受。唔會諗賣票、場數，完全冇嗰啲壓力，淨係 enjoy嗰兩個鐘同觀眾一齊，所謂集體回憶。你知啦，𠵱家啲人唔係叫你聽歌就會聽歌，做完隻碟仲要夾啲贈品落去，人哋都未必肯買，𠵱家做碟嘅樂趣比起以前真係爭好遠。
記唔記得第一次開演唱會係點？
唔記得喇……淨係記得第一次踏上舞台，係參加新秀、喺利舞台，好緊張、不知所措，到𠵱家，我先至知個舞台係攞嚟享受。嗰陣時喺《歡樂今宵》有個打擂台唱歌節目《 Sing Sing Sing》，輸咗都有五百蚊獎金。我真係輸咗，但之後收到黎小田電話，問我有冇興趣參加新秀。當時一月，新秀係七月，我嗰年 20歲，諗住有排，係阿媽同我講真係參加不如搵個老師……就係嗰陣時，開始跟戴思聰學唱歌。
呢個媽媽唔話得！
係呀，佢知我冇嘢叻吖嘛……讀書唔叻淨係唱歌叻。嗰陣時我做暑期工，做過蘋果牌牛仔褲負責車個袋、做過快餐店，跟住參加新秀贏咗冠軍，咁就簽咗華星七年。
始終唔係高大靚仔，有冇諗過紅唔紅到？
冇諗咁多嘢㗎，冠軍就係冠軍，簽咗華星，就係一張合約。華星嗰陣時仲有小虎隊，個個六呎高，仲同佢哋一齊出碟，出完碟就有得拍《新紮師兄》，跟住就一舉成名。咁至發覺，原來都唔係一定要高大靚仔嘅啫。
有乜好自卑？唔高都紅咗囉！
覺唔覺得一切嚟得好易？你嘅走紅係異數？
唔係啩……咁睇低我？你嘅意思即係我好差啦？做咩要靚仔啫？荷里活都有唔係個個高大靚仔㗎我嗰陣時企埋喺小虎隊隔籬，都冇話自卑。
真係冇自卑？
真係冇！有乜好自卑啫？係唔夠人高就係唔夠人高呀嘛，唔高都紅咗囉！嗰陣時我真係多咗好多戲拍、電影，仲有登台。實力當然都有啲，但的確覺得自己行緊運。
除咗紅星朋友，同上一段戀情，呂方平時係咩人？廿四小時點過？
我鍾意做運動，鍾意煮嘢食，請十個八個朋友嚟食都冇問題。鍾意睇戲、鍾意揸車，電台𠵱家好少聽，但係夜晚會聽陶傑《光明頂》，口才好犀利。
你自己鍾唔鍾意傾埋一份？有冇啲維園阿叔嘢走咗出嚟？
冇冇冇……我未係住，除非好大單嘢，我哋班朋友又好少講呢啲。
聽講你同杜德偉有個朋友早排突然過身？
係……好突然，啱啱去完旅行返嚟，返嚟踩踩下單車心臟病發，佢同我哋差唔多年紀。
到咗 53歲，你會唔會怕老怕死？你對開心嘅定義有冇唔同？
呢啲嘢冇得諗，冇得好驚。我從來唔會諗呢啲。我係一個普通人，我嘅開心好簡單，後生嘅時候成日拍殭屍戲、日夜顛倒，淨係想瞓番覺好啲；到𠵱家呢幾年，我嘅開心就係食下好嘢，同朋友飲杯嘢傾下偈。
上次拍完十六年拖，需唔需要長時間恢復？
其實我都真係好多年冇拍拖，雖然之前成日俾人影到，但冇個係真……大佬吖，我都有朋友，都要約人食飯，唔係食餐飯就係女朋友㗎嘛……唔係話之前嗰段感情有咩陰影，有啲嘢係真係急唔嚟。直到最近，當嗰個人出現，你就會知道係佢。
真係怕行差踏錯，諗住一世不娶？
我以前會問自己，做人係唔係一定要結婚，但係到咗𠵱家，我覺得可能唔結婚仲適合我。
變臉
時代不同，現在做訪問例牌要行部攝錄機拍攝全程，偏偏呂方話平生最怕對鏡頭，一開機就唔識講嘢，於是訪問下半部，我聽佢話熄機齋傾偈。
係就係健談咗，不過唔提得嘅一樣唔俾提，無嗱嗱同我講星座，話山羊座同金牛座其實不打不相識好啱嘴形……係咩？
撰文：朱小博
攝影：范仲良
化妝： Ding Yip@KINGS MAKEUP
髮型： Gary Sun@Hair Corner
場地提供： Zense(銅鑼灣)
|
鍾意就快D Share啦！
|
|
|