細仔 Quintus病咗入院，霆鋒就算忙到踢晒腳都要抽時間探病，最後仲同前妻栢芝短聚咗 30分鐘，父母同場，最開心嗰個實係 Quintus
多得栢芝媽懂人情世故，特登製造機會畀栢芝同霆鋒相聚，講到尾始終都係一家人嘛！
封面
冇同王菲慶生 陪高燒細仔 霆鋒栢芝養和團圓
老竇謝賢 79歲仲有火，係火爆爺爺，阿仔謝霆鋒就賣溫情，做暖男爸爸。鬼叫強國呢期興！
有見《 12道鋒味 2》大把觀眾受，霆鋒強力打造療愈系暖男形象。上週獨自留港陪完謝賢過大壽，戲肉係上週三為高燒細仔上演過氣夫妻醫院大團圓！現任女友王菲 8月 8日一個人歐遊過生日好大件事咩？
呢個 8月，謝家最忙！謝老四發老火宣傳《四個小生去旅行》、謝霆鋒出盡力拍《 12道鋒味》第二輯、仲要 8月集齊爺孫仔三代生日，難怪一樣喺 8月生日 46歲的女朋友王菲，都要被霆鋒擺埋一邊，自己約閨蜜趙薇飛去法國、意大利搞親子慶生團。
病房共度半小時
難得留港、女友歐遊，又撞啱栢芝三母子帶仔回流升學，鋒芝離婚 4年來首遇破冰良機。月初(6日)為反駁週刊報導，自 11年離婚後再度發出聯名聲明；上週三(12日)，即是《四個小生去旅行》記招謝賢火滾出手摑曾江當日，霆鋒靜靜雞現身養和醫院，探望因為氣管問題而發高燒入院的細仔 Quintus。你以為咁就叫慈父？原來都未算！為個仔肯同火溝油前妻同一屋簷下至叫能耐！中午時份，栢芝自駕從梅道寓所趕到醫院，呢頭上房同霆鋒共處，嗰頭就見柏芝媽識做落樓，成功爭取過氣夫妻與 Quintus共處將近半粒鐘！
芝媽識做落樓煲煙
晨早流流入院照顧外孫，適當時候離場為鋒芝製造機會，栢芝媽為個女在養和大樓外煲煙煲足半個鐘，認真唔話得！《 FACE》仲聽到芝媽興奮告知友人：「佢見到碗叉燒飯幾開心吖！」睇嚟 5歲 Quintus病情已經好咗大半，食慾亦都返晒嚟！煲煙吹水直到點半，霆鋒離開病房在助手表哥陪同登上保姆車，芝媽才識趣回到病房。不過，兩家水溝油又點只霆鋒栢芝吖？晚飯後霆鋒帶着拉姑再次折返醫院，今次栢芝一早車埋芝媽離開，又一次避免兩位前親家、及前婆媳產生磨擦。
王菲孤獨慶生
都係為咗搞食搞上癮，開完曲奇店又搞網購刀具，霆鋒為生意難得留港，趁機做孝子，陪 8月 9日 79歲的謝賢切完蛋糕、又再做慈父入院探發燒 Quintus，分身無術難免冷落同樣 8月生日的王菲。
復合一年，竟然不在正日 8月 8日滿 46歲的女友身邊。好彩大日子有人陪，王菲被發現同閨蜜趙薇帶埋囡囡搞親子團歐遊，繼生日前後現身巴黎羅浮宮後，最新動向已經同團友移師至威尼斯。個幾月冇得見一樣自在享受行程，而霆鋒又玩緊同前妻大團圓，呢段世紀三角戀，睇怕都有排糾纏！
單親遊學團
自從 11年栢芝同霆鋒兩公婆離婚，一對囝囝 Lucas同 Quintus就跟住媽媽做咗遊牧民族，一時去加拿大買屋探路、一時又話移民新加坡落地生根，話就話想對仔避狗仔隊開心成長，其實咪又係因為父母水溝油、栢芝又同拉姑冇兩句！今年暑假三母子回流搬返世紀大廈，表面上話因為成功考入基督教國際學校，實情就係兩公婆關係緩和，返香港近爸爸多啲，點都好過一個人帶住兩個留落異鄉！
感情線上
分分合合、結完又離，邊個話離咗婚就再冇下文？霆鋒同栢芝呢一對，離婚後四年嘅感情走勢一樣貼住大市上落不停！
回暖跡象
周旋四年總算有定案，夫妻協議俾兩個仔仔回港入學，亦為反駁報導再度發出聯名聲明，首次站在同一陣線。
採訪、撰文：娛樂組
攝影：娛樂突發組
|
鍾意就快D Share啦！
|
|
|