王宗堯：
Hair:Hei@Xenter
Make-up: Aster Pang
Styling:DKNY, Ted Baker
方健儀：
Hair Vincent Yeung@Rvsstyling
Make-up: Katherine Lo
Styling:Ziztar
U人攻略
講毒宣言
今時今日做藝人，淨係出騷跑通告唔夠嘅。要個個認得你，叫得出你個名，夠「毒」都好緊要！講緊嘅「毒」當然唔係對住部電話轉珠嗰種，而係要緊貼 fb、 ig各個社交平台，成日有嘢 update比人睇。
自從「淡定姐」方健儀離開大台同廉署後，又教書又做皮革，幾乎日日 fb都有嘢更新，多 job多到接唔停，仲忙過以前做主播。
同方健儀不遑多讓的王宗堯一樣接 job接到手軟，加上男神撐佔中 po fb唔怕被封殺，想做就做，有樣有諗法，被封為新一代男神是常識吧。男神對才女，梗係最好互問互答
唔扮 做自己
方：方健儀 王：王宗堯
方：點睇香港嘅 YouTuber？
王：其實香港 YouTuber幾得意，佢哋每個都好有特色。有教美容、講時裝、或者專搞爛 gag， YouTuber Ming仔、小花都係我啲朋友，我都有訂閱佢哋嘅 channel，間唔時開嚟睇，不過都係娛樂性質為主，因為其實入面都無聊嘅，冇咩資訊攞到嘅，但就可以笑一餐，放鬆一下！
方：睇到負評會唔會難過？
王：我咩網都睇，（包括高登）包括對我嘅正評同負評，最好笑係有人會問點解呢個人會突然彈起，話我平平無奇亦都冇睇過我嘅作品，唔明點解要識王宗堯呢個人，睇到啲負評，我又唔會唔開心喎！我又唔係奧巴馬同習近平，不過佢冇睇過我嘅作品，應該好少出街，話晒最近我出街都經常撞到我自己，巴士、港鐵、行過街燈箱都會見到自己，其實幾開心，以前我會覺得我只係個演員，有角色我就做，成日會匿埋喺角色後面，𠵱家就多咗要面對自己，不過我依然係我，會繼續踢拖、着背心短褲行銅鑼灣食魚蛋粉。
活到老 學到老
王：做老師要上高登？
方：高登我都會睇，起碼知道啲潮語係咩，不過有時都好 out，最近拍政府宣傳片，要用啲高登潮語，書面語係「是咁的」，高登真係講「是咁的」，我自己就懶叻就講「係咁嘅」，之後人哋就會話我講錯咗，正讀應該「是咁的」，嗰一刻我覺得好瘀！以𠵱家做老師都幾辛苦，唔可以好無知，所以會要用好多時間備課，上網搵番啲新聞片，上 YouTube睇番啲同行值得學生學習嘅片。
王： 90後嘅學生有咩特質？
方：𠵱家啲學生互動性好強，同以前好唔同，佢哋唔單單聽你講嘢，仲會問番你問題，有時候可能問到一啲你唔識嘅。以前我哋對住教授，閒閒哋大你十幾年人，人生經驗豐富你唔敢挑戰佢。但𠵱家資訊太發達，雖然我都後生，但我冇佢哋咁快，有時都畀佢哋大到，所以每次教書我備課都備得好足。
撰文：葉浩婷
攝影：崔百祥
|
鍾意就快D Share啦！
|
|
|