謝賢：我呢世都未打過交
謝賢怒摑曾江成全城熱話，無綫前晚在節目《超強選擇1分鐘》內食正條水玩自抽，即場投票結果顯示約64%觀眾認為爆「江」事件屬宣傳居多。昨日謝賢「出關」行山，談到曾江多次扯火！
提到被指是夾宣傳，謝賢即時扯火手指指說：「我使唔使做呢啲嘢呀！」
謝賢怒摑曾江一事成為全城熱話，《超強選擇1分鐘》食住上邀請Joe Junior及李漫芬上節目，讓觀眾為爆「江」事件投票！
謝賢到山頂行山，邊行邊講。
謝賢被途人認出，有人舉機拍照。
採：影視組、追蹤組
文：專案組
早前謝賢在《4個小生去旅行》記者會上爆粗怒摑曾江引起哄動，全城猜測爆「江」真偽！無綫在前晚播出的直播節目《超強選擇1分鐘》食正條水玩自抽，除邀請當日目擊事發經過的Joe Junior及無綫娛樂主播李漫芬亮相外，又大玩即場投票，請家庭觀眾選出心目中認為衝突事件的起因，最終有21萬名觀眾參與投票，33,307人選擇謝賢是「一時衝動真打鬥」，138,808人選擇「為宣傳」，44,101人選「有積怨」。換言之，約64%觀眾覺得爆「江」事件是博宣傳居多。
扯火否認夾宣傳
火氣十足的謝賢昨午4時戴上鴨嘴帽及黑超獨自「出關」，由司機送往山頂行山，即引起大批傳媒追訪。他全程塞住耳機，但記者談到爆「江」被指是夾宣傳，他即扯火說：「我使唔使做呢啲嘢呀！梗係有人有咁嘅思想，人哋講咩冇所謂。」問到有否嬲無綫在節目中抽水？他說：「冇！點會，我都唔嬲人嘅。我呢世都未打過交。」問到他有否搵曾江？他又激動扯火：「我冇嘢爆呢啲咁嘅人，爆嚟做咩。（聯絡曾江？）黐線(口架）！仲聯絡佢！（婷婷有冇搵你？）冇！佢開工呀！」
問到下周一（17日）的《4》飯局安排？他說：「取消咗，因為佢哋唔得閒。（請晒台前幕後？）咩話，我請幕後咋！」記者再追問飯局時間，他則沒有回答。不過，之前曾江表示謝賢只是沒有請他，而如今謝賢又指只請幕後，二人「口供」不一致，到底邊句「先真」？而《4》監製蘇敏儀透露原定下周一謝賢請食飯兼一齊睇第一集，但最後因為一班幕後要趕後期製作而取消：「我親自打咗畀四哥（謝賢），會改期再食飯，佢暫時都喺香港，配合到。」
被問寶貝孫疑爆粗
提到有張栢芝粉絲質疑Quintus當日因發燒入院而沒有與他同場慶生，並在微博鬧爆謝家，謝賢未聽完問題即躁爆連講3次：「唔好嘈！（孫仔有否與他慶生？）我唔答你呢啲嘢。」問到他否因被質疑而不開心？他扯火兼疑似爆粗說：「你邊度？喺度X咩啊你！（有冇去探病？）冇，冇事呀，發燒咋嘛，返咗屋企啦應該。（同孫仔玩視像？）有機會咪去，我想你哋睇我多啲。」因為天雨關係，謝賢行山之旅歷時約1小時便結束，沿路不少途人認出他，舉機拍照之餘，更上前與謝賢握手表示支持，令他十分開心！
另外，早前曾傳出謝賢做「通波仔」手術，昨日他接受本報電話訪問時直認出發前一周做了：「因為血管塞，即照即做。」談到在第一集《4》中，當地醫生幫他做Body Check後，讚Very Good，他說：「係呀，因為要扮太空人，玩離心力，一定要Check，但如果我個醫生喺度，唔會畀我玩。（唔聽話？）係呀！你話我大唔大膽？」問到對收視的期望？他說：「關我咩事。」而談到曾江指想見他，他即勞氣地說：「我唔識呢個人，我唔鍾意聽到呢個人！」
提到被指是夾宣傳，謝賢即時扯火手指指說：「我使唔使做呢啲嘢呀！」
謝賢怒摑曾江一事成為全城熱話，《超強選擇1分鐘》食住上邀請Joe Junior及李漫芬上節目，讓觀眾為爆「江」事件投票！
謝賢到山頂行山，邊行邊講。
謝賢被途人認出，有人舉機拍照。
|
鍾意就快D Share啦！
|
|
|
