2015年9月15日星期二

《進擊2》香港首映好墟冚三浦水原引千人迫爆apm

2015-09-15 20:39:00

三浦春馬同水原希子入場。

日本漫畫改編電影《進擊的巨人2：End of the World》將於本周六喺港日兩地同步上映，今晚男女主角三浦春馬同水原希子就去到觀塘apm出席電影全球首禮。

現場早已迫滿近千名影迷，仲設置咗一個大型巨人，同埋扮成戲中角色嘅cosplayer撐場，場面好墟冚。為咗配合呢次電影全球首映喺香港舉行，水原就特意着住旗袍，以具中國色彩打扮現身，佢同西裝骨骨嘅三浦一齊行紅地毯，佢哋浴途不停為夾道嘅影迷簽名又握手留念。全程水原都表現得好風騷，不時喺紅毯上擺甫士，又同影迷攬攬，仲大派飛吻。

除咗巨人，大會仲安排咗兩隻醒獅喺現場助陣，三浦同水原就為醒獅點睛，令到首次睇醒獅嘅佢哋都覺好新奇，水原仲摸吓個獅頭㖭。

三浦同水原為咗今次香港之行都練過廣東話，三浦就全程以廣東話、普通話及英語三語打招呼及跟影迷互動，佢先以廣東話自我介紹：「大家好，我係三浦春馬，好開心嚟到香港見大家，多多指教。」其後佢繼續以普通話回答提問，佢話因為電影係由人氣漫畫改編而成，所以有壓力同好緊張，講講吓就突然無厘頭話：「我想去洗手間。」但又講來講去講不出「洗手間」三個字，要由影迷幫忙糾正，原來他係因為自己太緊張。

水原就以廣東話同英語自我介紹：「大家好，我係Kiko，好開心嚟到香港。」佢仲好多謝大家嚟到現場，佢都同樣表現得好緊張，不停喺台上不停講：「Oh My God!」

今次水原係再度到訪香港，佢大讚香港係個有活力同浪漫嘅地方，仲話希望可以揸車帶首次來港嘅三浦周圍去玩。