掃呢頁CODE去手機

2015年9月10日 星期四

巨肚盈盈隨時生得 細女個樣似大女? 盈盈,湯盈盈,



【今月底生B】巨肚盈盈隨時生得 細女個樣似大女?

2015-09-10 13:34:00



(資料圖片)

湯盈盈今個月底就生第二胎,話晒盈盈同老公錢嘉樂2013年結婚,話咁快就三年抱兩,目前有咗9個月嘅盈盈,雖然陀住個巨肚,不過,照顧大女錢凱晴(Alyssa)亦親力親為。

今日有周刊指,盈盈今胎堅持要順產生B,老公錢嘉樂亦趕住完成工作,就全心陪產,兼陪老婆入產房剪臍帶,報道又指,錢嘉樂早前同老婆去照4D超聲波,想睇吓細女個樣,發現細妹同家姐凱晴都幾似樣,即係似爸爸錢嘉樂多啲!

報道上周六影到盈盈同Alyssa去培僑中學游水,未入學校大門之前,囡囡Alyssa要媽咪抱,盈盈亦一手抱起超過30磅嘅囡囡,原來盈盈陀B都重咗成50幾磅,唔怪之得咁好力,盛傳盈盈早前去睇產前檢查,醫生已經叫過盈盈要控制體重,如果胎兒超過8磅,媽咪順產會比較辛苦。

據知情者講,盈盈唔止陀第二胎冇戒口,鍾意食咩就食咩,盈盈陀B六個月已經比正常孕婦重咗30幾磅,報道又話盈盈上個月去做產檢,醫院有提議開刀,因為BB體重比較重,而頭圍又比較大,不過,盈盈仍然堅持順產,認為咁對BB係最好,其實囡囡Alyssa出世都有成七磅三,估計細女隨時重過家姐。

周刊都問過盈盈,佢都話今胎好大隻,又指醫生講BB個頭已經轉咗,胎位好低,隨時生得。目前盈盈嘅父母已經由加拿大返咗嚟香港,幫手湊孫,盈盈亦搵咗陪月,請多一個外傭,歡迎錢家二公主出世!

鍾意就快D Share啦!