掃呢頁CODE去手機

2015年10月8日 星期四

包片瀨尿淋雨 鄭中基搵錢乜都得 [壹週刊 - 1335] 中基,鄭中基,M1,



有一仔一女的鄭中基,早前著住尿片拍廣告,有錢搵,冇計!

娛樂偵訊

包片瀨尿淋雨 鄭中基搵錢乜都得

婚後四年抱兩,鄭中基無賴變慈父,修心養性有回報,被廣告商睇中拍尿片廣告。開工由朝踩到晚,仲要扮 BB包住尿片埋位,熱到鄭中基不停匿埋換片;之後再淋雨兩粒鐘,底面都濕晒。奶粉錢唔易賺,但有老婆余思敏落場探班,放飯時陪撐枱腳,補番數!

噴濕屁股

周柏豪 sell衞生巾,鄭中基就包住尿片,著住條貼身長褲,屁股上濕了一大笪,扮騎呢 BB,賣尿片。

拍攝當日,鄭中基同小演員在佐敦谷公園拍外景,劇情講小演員笑他瀨尿,所以工作人員要不停用水壺將鄭中基的屁股噴濕。

三十幾度又曝曬,著住尿片埋位的鄭中基拍唔夠一陣,已經大汗疊細汗,不時要走埋公園暗角,搵助手做人肉圍牆換尿片。

工作人員用水噴濕鄭中基屁股,扮瀨咗尿。

天氣又曬又熱,鄭中基時不時要匿埋一邊換尿片。

老婆余思敏現身探班,放飯時兩公婆坐埋一邊撐枱腳。

開遮食煙

有一女一仔的鄭中基,對住小演員父愛氾濫,撩小朋友玩,又緊張地吩咐工作人員幫對方抹汗。唔想在小朋友面前做壞榜樣,鄭中基匿埋食煙,兼搵助手開遮擋住。

拍到中途,基嫂余思敏突然現身,老婆探班陪曬,唔使埋位,鄭中基即刻上前傾偈。放飯時間,兩公婆坐埋一邊撐枱腳,就連老公換衫,余思敏都做「跟得老婆」,寸步不離。

影硬照,當然唔少得主角,我係話啲尿片。

行到邊跟到邊,余思敏跟埋老公入更衣室換衫。

拍攝現場有小朋友,鄭中基識做匿埋食煙。

淋雨兩粒鐘

黃昏時間,余思敏先行離開。鄭中基換第二個造型繼續開工,恤衫西褲變身上班族的他,孭住一大嚿道具雲,工作人員再駁上水喉拍落雨戲。

連拍多個 shot,鄭中基被人造雨照頭淋,搞到全身濕透,助手要用大毛巾不停幫他抹身。淋雨兩粒鐘,導演終於收貨。

接戲拍廣告密搵奶粉錢!早個禮拜,冇通告的鄭中基終於可以做番住家男,拖埋老婆同四歲餅印女到銅鑼灣利園 shopping家庭樂。其間遇到朋友,兩公婆停低傾到雞啄唔斷,直到囡囡 Emma扭計要走,一家三口才上保母車離開。

唔使開工,鄭中基做住家男,拖住囡囡同老婆到銅鑼灣 shopping,仲買咗袋大閘蟹,其間撞到朋友(箭嘴)傾咗陣,四歲 Emma唔耐煩,兩公婆惟有同朋友 say bye!

直踩十二粒鐘,晚上拍落雨戲時,鄭中基被人造雨照頭淋,由頭濕到落腳。

搞笑食胡

充滿喜劇細胞的鄭中基, 96年入行做歌手,但多年來卻靠搞笑食胡。 03年拍電視劇《皆大歡喜》、電影《龍咁威 2003》等,奠定喜劇演員地位,其後參與節目主持《美女廚房》、《爆笑急轉彎》,搞笑形象受家庭觀眾歡迎,節目收視高企;近年更憑《低俗喜劇》的「暴龍哥」一角,奪得第 32屆香港電影金像獎「最佳男配角」。

13年,鄭中基憑住《低俗喜劇》奪得金像獎「最佳男配角」。

同方力申、梁漢文主持《美女廚房》,鄭中基搞笑形象深入民心,節目收視理想。

撰文、攝影、攝錄:娛樂組

nextplus.nextmedia.com

鍾意就快D Share啦!