約埋做 gym，小環同大佬孝友誼突飛猛進。
娛樂偵訊
又做大佬 邵仲衡操 Fit譚小環
人妻譚小環早前與大佬孝邵仲衡合作拍港台劇，竟然一拍即合，近日更經常孖住對方做 gym。上週五（十月二日），二人前後腳上健身室跟私人教練健身，其間大佬孝不時走埋小環身邊做埋助教，又遞水俾佢飲，相當殷勤。
一拍即合
冇埋位做戲五年的譚小環，今年七月接了港台劇《獅子山下 2015》其中一個單元，與劇中做老公的大佬孝邵仲衡合作，兩個唔同年代的前無綫人，一劇投緣。
「雖然只係拍咗三日戲，但全部都係佢兩個嘅對手戲，由朝對到晚，就算唔使埋位，都坐埋傾偈，話題講極唔完。」小環友人說。
一拍即合，人妻同大佬孝三日就成為密友，就算一杯酒兩份飲，都毫無芥蒂。「大佬孝好健談，佢喺美國讀政治，又做咗生意廿年，人生經歷好豐富，話題又多，小環都話最欣賞係佢見識廣，同對方傾偈學到好多嘢。」
拉完筋叫攰
在大佬孝的影響下，近日小環經常孖住對方一同去做 gym。上週五（十月二日），二人前後相差五分鐘去到趙勁皓的 King's Fitness。
「小環本身唔鍾意做 gym，佢比較鍾意做啲有互動嘅運動，好似打羽毛球，佢肯做 gym都係受大佬孝感染。」
因為是新手，小環做每個動作，都有教練在旁指導，做完連串拉筋動作後，她已大嗌好攰，大佬孝即時遞水，十分體貼。
炒車撻落地
至於邵仲衡，操完手臂又練腳，對不同的健身器械都瞭如指掌，又不時走埋小環身邊做指導，玩了差不多兩個鐘，二人換衫離開，再到隔籬的 coffee shop繼續傾，一傾又兩粒鐘。
記者致電小環問回應，她說：「佢（邵仲衡）真係叫咗我好多次！成日話我太瘦，想我練大隻啲！我本來真係無興趣，但兩個星期前玩漂移車，我一時失平衡炒咗，成個撻落地，當時好驚，兩分鐘都唔敢郁，我最驚係斷骨，好彩無事，只係右邊手臂、手掌同 pat pat瘀晒！所以我先的起心肝，去練番啲肌肉！」
防老有術
同譚小環啱 key，連人哋老公都 friend埋的 51歲邵仲衡， 87年參加《超級新星大賽》入行，當年被無綫捧為「銀河十星」，曾經拍過不少經典劇集，如《大地飛鷹》、《大時代》、《水滸英雄傳》等，其時，邵仲衡已邊做藝人邊兼顧裝修公司生意。 95年同李添勝鬧不快後離開無綫，轉投亞視，之後便正式淡出娛樂圈從商。除了做越野車生意，亦曾在東莞成立 IS Sports Marketing公司，以仲介角色在內地搞方程式賽事，近年更將全盤生意轉手套現。
早前大台重播《大時代》，當年的「大佬孝」被網民讚有型靚仔，令他人氣反彈，再復出幕前，接拍葉念琛新戲《紀念日》，同李麗珍做情侶，又和譚小環合作拍港台劇，明年一月將演出舞台劇《火鳳燎原外傳》。已與 now簽了部頭約的他，加埋廣告、登台，做到冇停手，幾乎紅過以前。
天生防腐的邵仲衡，亦唔敢放肆，勤健身 keep住 body。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
