今日JC同男友安志杰一齊到尖沙嘴出席一個醫學美容活動，JC肚凸凸現身，孕味特濃。好喇，問JC，咦，肚凸凸，係咪就快報喜？佢笑笑口話:「我喺上面工作，需要好多energy，因為每日都要做十四個鐘頭，食多咗嘢。」
睇嚟好似冇破綻，但當再問安志杰:係咪因為未滿三個月，所以唔公佈得？佢就答:「係。」
恭喜晒啊!即連隨問兩人是否已有結婚計劃？安志杰承認係有呢個想法，點知JC即刻叫停——叫男友唔好再講，因為佢想要有驚喜呢。佢又話下周會一齊旅行，慶祝拍拖一周年，共度二人世界。咁呢個trip會否順道結婚？安志杰即又爆響口:「都有諗過，但係我未求婚。」此時JC又再出手——掩住佢個嘴猛話:「唔好講唔好講，我想要驚喜。」
老老實實，其實兩位有冇心理準備為人父母？JC話相信男友將來會係一個好爸爸，安志杰即謂:「我哋都視對方為理想對象。」真係又要用多次子華金句:甜親自己呀!
問JC依家身體狀況是否有變化？安志杰再次搶答:「佢依家食多咗好多嘢。」仲話佢喺大陸照顧女友期間，整咗好多芝士俾佢食添。問番JC懷孕期間會否停工？佢就表示:「希望有一日可以平衡到愛情同工作家庭嘅生活啦。」想做媽咪先定太太先？佢話:「Both啦。」安志杰話:「兩樣都冇所謂。」咁幾時可以公佈喜訊？佢就話:'After the trip.'等你好消息!
至於安志杰舊愛謝婷婷，就透過助手，於凌晨回覆有關安志杰與JC傳有BB嘅新聞，婷婷表示：「會了解咗先，如果係的話，一定會恭喜佢哋。」
|
鍾意就快D Share啦！
|
|
|