現年53歲的錢國偉與33歲陳宛蔚前晚在尖沙嘴擺酒，群星撐場，惟尾段爆出一幕不愉快事件，林盛斌爆醉踩台，辣㷫同樣有醉意的陳小春，小春火起爆粗掟咪，還追打Bob，台上一班「古惑佬」幫拖平息風波。Bob昨午酒醒後，即向錢國偉及小春道歉，更在facebook貼文表示要反省。
前晚開席不久，約9時許，Bob在微博貼相兼留言：「大鑊，已經醉咗。」估不到兩小時後果然大鑊。兄弟團鄭伊健、錢嘉樂、陳小春和曾志偉等上台高唱《友情歲月》，Bob離奇踩上台兼搶咪。有指小春不滿Bob失控而爆粗掟咪及追打他，眾兄弟見狀即阻止。至於Bob被拉走下台，之後卻折返欲向小春耍冧，兄弟們怕再爆爭執，刻意分隔兩人，小春似仍一臉不滿，最後還點煙。
至昨日凌晨1時，Bob在梁烈唯傍實下離開，被大批記者包圍的他，強調沒有飲很多酒，但他眼鏡放額頭，腳步輕浮，問是否有被人粗口問候？Bob反問：「我俾人問候？」可有向小春道歉？他說：「兄弟嚟嘅，冇事。」記者再三追問，Bob竟捉住唯唯嘴對嘴三次，認真失儀。
宿醉清醒的Bob昨在電話中說：「噚晚啲嘢完全斷晒片，可能真係失控咗少少，我要同小春哥講唔好意思。今次係好大教訓，真係唔可以去到咁盡，會令屋企人同朋友擔心。」問有否聽到被小春爆粗鬧？他說：「完全feel唔到，我印象中自己有啲失控，令佢（陳小春）唔開心，如果因我醉咗，做咗啲令佢覺得唔尊重嘅嘢，我呢度誠心同佢講對唔住，希望佢大人有大量。」Bob承諾好好管理自己，同時歉疚失態令錢國偉的婚宴留痕：「今日醒咗都打咗畀Wilson道歉。」
錢國偉前晚離場時被追問場內起衝突？他說：「我唔知事情經過。」會否做和事佬？他說：「和咗啦，已經冇問題。」對於小春發火掟咪，錢國偉維護說：「冇事冇事，呢啲係表現出我哋歲月友情嘅氣氛。」至於爆粗，他又說：「平時都有啦。」昨日錢國偉直認接到Bob道歉電話：「佢開心得滯，有啲激動，佢哋好似細路仔玩得開心都會嗌一兩句交。」
此外，范振鋒和李思欣前晚赴宴，但提早離場，未目睹爭執經過，范振鋒昨在上環說：「Bob係搞笑，我哋私下同小春都好熟。」李思欣則爆Bob有衝上台前科：「我哋結婚嗰陣，佢都衝上台。」
另一賓客蘇永康昨晚出席慈善活動時說：「小春係炮仗頸，兩嘢就冇嘢。」
| (攝影：仇志德、陳志嵐、楊浩賢、畢紹基、陳辰) |  醉爆的Bob離奇上台攝位，身後的小春即輕拍其背示意。 |  |
 |  |  Bob失控後，即被兄弟幫手隔開。 |
 醉爆的Bob（左）離開時忽與梁烈唯嘴對嘴。 |
|
鍾意就快D Share啦！
|
|
|