現年47歲的陳國邦，演技雖然出色，但卻一直苦無機會發揮，多年來屢被派演行行企企第三、四線角色。為免自己長此下去變成「一潭死水、發黑發臭」，阿邦上周五在網上貼出一封「給無綫電視的公開信」，宣佈不與無綫續約。這封公開信，大大感動了觀眾、網民甚至幕前幕後，反應之熱烈，連他本人也始料不及。
昨午阿邦與恩師鍾景輝在台灣演出完舞台劇《相約星期二》返港，太太羅敏莊專程往接機，也有市民認出阿邦，主動邀合照與他打氣。問阿邦發公開信後心情如何？他說：「冇乜點，封信唔係因衝動而決定。考慮咗幾年，點解家先寫？真係時間惹的禍，因為喺加拿大演出有好多時間，思考好多嘢，自己真係應承咗簽約，唔想傾約同事受責罰，希望高層唔好怪佢。呢個念頭孕育咗一段時間，諗吓應該幾時，定係等吓再抱希望呢？諗完之後就決定做呢件事。」
發公開信後無綫高層可有「打鑼」找他傾約？阿邦支吾以對，身旁的羅敏莊代答說：「冇打鑼，但有搵囉。」問是否無綫高層樂易玲時，阿邦只笑而不語。對於樂易玲謂會極力挽留，阿邦說：「佢講嘅說話好似無綫同演員有事發生，佢都會出嚟講說話，好似公司一個橋樑，唔通佢話陳國邦你應該走咩！」羅敏莊亦忍不住插嘴問阿邦：「你係咪覺得好官腔呀？」阿邦又笑而不答。
是否與無綫沒彎轉餘地？阿邦說：「自己有同太太傾過，太太都話既然決定咗就咁啦，唔係有冇彎轉，自己都唔想有彎轉。好似一對情侶，我已經單方面講咗分手，對方一定做番相應嘅嘢挽留。」樂易玲表示會再與阿邦再傾，看看他有甚麼想做而未達到，對此阿邦說：「自己想做嘅嘢，喺封信嘅文字已經交代得好清楚，呢封唔係勒索信，唔係封信出咗之後，你講乜嘢條件就喺番埋一齊。唔係話留喺TVB就錯，走喺啱。」
信中阿邦謂不想自己作品變作一潭死水及發黑發臭，莫非他見到現時有此情況？阿邦謂：「唔關人哋事，只係自己等咗咁耐、盼望咗咁耐，但隨住年月，心智會被磨滅，唔係公司或邊個令我變成咁。好在自己每年同老師演舞台劇，唔同地方演出，觀眾畀我嘅反應，維持咗演戲衝動同熱誠。」說話至此，阿邦顯得有點口窒窒相當感觸。之後阿邦說：「呢封唔係要脅信，係求職信，等外界知道我係自由身，可以嘗試好多唔同嘅嘢。」可有後着？阿邦說：「真係冇，可能試吓教學，做舞台劇同湊女。」
問羅敏莊可擔心老公前景？她說：「冇㗎，佢演舞台劇之後冇乜大project，不過我又唔介意，我都有工作能力，如果人生唔開心，即使賺幾多錢冇用，不如轉換環境。老公演舞台劇返嚟開心好多，我鼓勵佢喺舞台劇發展，雖然唔係搵好多錢，但都夠使啦。」訪問後，羅敏莊還與阿邦咀嘴打氣，給老公無限量支持。
陳國邦昨由台灣返港，多次強調公開信不是要脅無綫，其實是他的求職信。 
羅敏莊錫錫老公陳國邦打氣。 
陳國邦昨與恩師鍾景輝返港，對陳國邦決定，鍾景輝不欲多言。