《小飛俠–魔幻始源》雖然由里維米勒飾演的小飛俠先係主角，但拍住巨星曉治積曼即被搶晒鏡，今次曉治仲自己設計奸角黑鬍子的形象，點會唔成為焦點？
西區
狼人變海盜 曉治積曼惡鬥小飛俠
大家對 Peter Pan小飛俠呢個名一定唔會陌生，呢個家傳戶曉的經典故事，多年來無論電視劇同電影不斷翻拍又翻拍，最新版本就有本週四香港上畫的《小飛俠–魔幻始源》（ Pan）。
今次《小飛俠–魔幻始源》由 13歲童星里維米勒（ Levi Miller）孭飛演出，不過最搶鏡始終係飾演奸角黑鬍子海盜的曉治積曼（ Hugh Jackman）。曉治今次由 Marvel大英雄狼人化身海盜，奸到出汁。早前曉治積曼更專程飛來香港宣傳，同港人慶中秋兼且舞火龍，唔知佢有冇靈感拍番套《火龍傳奇》呢？
曉治積曼演開英雄，點解挑戰奸角？
曉治積曼在《變種特攻》系列扮演超級英雄「狼人」，正面形象一早深入民心，但今次在《小飛俠》中卻反傳統演大奸角，早前他在訪問中解釋：「我由細到大已看過唔同版本嘅《小飛俠》，加上我家小朋友亦曾以《小飛俠》參加天才表演，好有親切感。我呢把年紀好難扮小飛俠，所以今次導演祖韋特搵我演奸角海盜黑鬍子，我真係好開心，因每個男仔都曾幻想過做海盜，所以即應承。」
同童星里維米勒合作有乜趣事？
46歲曉治積曼與 12歲飾演小飛俠的里維米勒， 2人正邪對立所以有大量對手戲，曉治講笑話：「唔知點解里維好似好驚我，可能我個樣生得惡，佢每次見到我都尊稱我做 Mr. Jackman。最難忘係我哋拍完煞科戲後，我發現佢偷偷地喊，於是我上前安慰叫佢唔好唔捨得大家，點知佢竟澄清唔係唔捨得大家，而係拍完戲就要返學，佢真係好可愛。」
點解里維米勒會被導演重用？
澳洲出生的萊威米勒， 8歲開始做童星，由 2010年前開始已在澳洲拍過 6部電影。 5歲時曾演《小飛俠》舞台劇得獎的萊威，今次在電影《小飛俠–魔幻始源》的全球招募選拔中，憑演技及正氣樣打低超過 200名對手，最後被選飾演主角小飛俠，據知導演祖韋特十分欣賞他，更大讚他前途無可限量。
《小飛俠–魔幻始源》
上映日期： 10月 8日
撰文：何家文
|
鍾意就快D Share啦！
|
|
|
