Mr.最後一次在香港合體出席公開活動已經係一個月前粵語歌頒獎禮，而 Mr.官方 fb就形容 10月中廣州演唱會：「不管怎樣，這場演唱會將會是我們最難忘的演出之一」，似乎有啲弦外之音！網上圖片
真面目
合久必分 為王宗堯同環球反面 Mr.內訌散 band
邊個話〈不屈〉兩個字易唱難做？咁你就錯喇！當現實世界 MV胎死腹中，連唱都唔俾你唱，咁仲屈唔屈好？
樂隊 Mr.新歌〈不屈〉一早出晒 YouTube預告，一早揚晒請王宗堯操刀拍，亦都一早傳出因為男神黃絲身份太敏感俾唱片公司叫停！兩個月後新歌就冇得聽喇， Mr.則有新動向，大有機會為啖氣、為撐男神老友拒絕與環球續約！老老實實，不屈精神與其用把口講，不如做出嚟更實際。呢鋪 Mr.就真係型喇……如果五個人一條心，仲有 Mr.的話。
𠵱家到底係 Mr.拍新 MV定王家衞拍新戲？〈不屈〉由三個月前開始講起，兩個月前推出製作花絮，搞搞吓兩個半月過去都未有正片上畫，連 Mr.都絕跡香港公開活動成個月，說好的新歌去咗邊？學似老夫子話齋，件事真係好耐人尋味！
兩個月冇搵王宗堯
其實打從兩個月前開始埋班拍 MV，事實已經擺在面前，玩音樂絕非純音樂咁簡單； Mr.決定將新歌 MV交俾老友王宗堯執導、演出，不過所屬唱片公司環球就驚死男神黃絲形象深入民心影響 Mr.北上搵銀，下令飛起王宗堯另覓團隊完成拍攝。
表面上 Mr.死撐老友、對外宣揚王宗堯依然全程參與，實情 7月 22日推出嘅製作花絮，就只得一秒男神側面同把聲咁大把， Mr.唔只同環球週旋失敗，連新歌新碟都推出無期。
據悉， 13年被環球擺上枱參加澳門七一維穩騷，已經內裡分裂亦同環球現分歧，再加上今次〈不屈〉導火線，大有機會唔同環球續約。對外同唱片公司反面被雪，對內亦分成兩派各有立場， Tom與 Dash流住黃絲血，其餘 3位則唔想阻住搵食囉！週一，《 FACE》致電主音 Alan長期電話關機，反而敢言王宗堯答得最爽快：「件事（ MV被飛）之後大家都有幾個月冇聯絡，咁我都好關心佢哋去向，希望唔係因為我影響到佢哋同唱片公司嘅關係同前途」乜係因？乜係果？
新歡登場
旗下歌手樂隊走一個少一個，環球冇有怕，皆因新一年有新歡 Gin Lee登場力捧。今時唔同往日， Gin Lee玩到《中國好聲音》黐到周杰倫，雖然去到十強出局，不過成個強國都知佢唱得、再加埋周董啲群帶關係，捧紅喺強國大把前途嘅 Gin Lee實際過留住唔多聽話嘅 Mr.多多聲。
採訪、撰文：娛樂組
|
鍾意就快D Share啦！
|
|
|
