真人騷
揹起頭家 學識欣賞自己 趙頌茹：絕對唔會返轉頭！
這不是我第一次見趙頌茹，當年周永恒藏毒，行家都見識過她如何表面說分手，內裡其實偷偷還跟他在觀塘同居。
這也不是我第一次訪問趙頌茹，三年多前周永恒被無綫炒魷自資出碟，阿 Yu的角色是一個不論貧窮、疾病都不離不棄的好太太，靜悄悄陪在他身邊聽他受訪。
這郤是我第一次看到趙頌茹終於是一個個體。雖然一年來一個人帶着兩個五歲和三歲大的女兒，三個人一條命，但是阿 Yu自己也說，離婚這一役，對 33歲的她來說是一次重生：「總算樣樣嘢係自己行先，知道自己想要乜嘢，而唔係只去配合別人。」
藏毒、打交、刑毀、撈唔掂幕前退居幕後又被炒，炒完仲要聲大夾惡數前僱主死唔斷氣，出道 14年，周永恒有幾咁好事多為大家有眼睇，係唔明點解趙頌茹睇唔出。
我問她，是愛？是懦弱？還是因為害怕改變？她不假思索地回答：「怕改變！我成日覺得自己唔夠好、唔值得佢對我好，我怕自己冇咗呢一個，下一個可能仲衰……」既然不是愛到不能，發展到偷食小三打老婆鬧離婚這一步，我是真覺得不是不幸，反而該為及早現形及早甩身熱烈地彈琴熱烈地唱囉。
不瞞你說，這個訪問我約了一年才約得到，直到這一天見到她，我慶幸自己花了一年時間總算等到這個嶄新的趙頌茹。話說訪問前兩天，周永恒又嚟料，在面書上鋪完又刪，說甚麼掛住老婆同女、甚麼想要返個屋企乜乜物物，然後這個嶄新的趙頌茹說：「絕對唔會返轉頭！」
原來我唔係想像中咁差
一年過去，係唔係唔想諗番起最壞嗰段日子？
呢個過程，我覺得我係重生。最壞嗰一年，我會相信一啲謊話：「你唔夠好、你唔值得人哋對你好！」我真係有一段好長嘅日子，覺得自己唔夠好、做得唔夠好，聽到好多謊話。到 14年，我覺得最大成長位，係當我一個人揹起頭家，發現自己做到嘅嘢比我想像中多好多，我學識欣賞自己。縱然未必做得好好，但一定唔係諗得咁差。
一個人揹起頭家，的確會發現自己原來都有小宇宙！
我最記得屋企個水喉壞咗……哈哈，當然唔係我整，但係係我一手一腳喺佢噴緊水嘅時候走去㩒住佢閂咗個總制……嗰下有個位係：唔係我係邊個呢？有啲位係理所當然去做……講慘，大把人慘過我，但係我真係好欣賞女性，更加尊重女性。
你唔係慘，其實呢種男人越早現形，會唔會對你嚟講反而係好彩呢？
我咁睇，過往嘅人生，我都係一個懦弱、唔出聲嘅自己，反而係呢件事，令我覺得自己有生命。就算係有壓力、就算係今日唔知聽日事，但我覺得自己係一個人囉……每朝早起身，我覺得係開心㗎。當然每日遇到嘅嘢有好有壞，但你可以選擇睇好嗰方面㗎。
尤其係你點睇世事直接影響到兩個女？
冇錯，呢樣係我最關心嘅，就係我貫輸俾佢哋嗰套，點樣令佢哋三十歲嘅時候可以攞出嚟用……因為我以前都冇自信、覺得自己好差，喺工作上成日碰釘。𠵱家諗番起，如果嗰陣時個人唔係咁，做嘢個結果會唔會唔同呢？
04年拍《青出於藍》同 Roy撻着，十年嚟你都唔走，係懦弱？係太愛佢？定係唔想改變？
我係唔鍾意變嗰種人，我試過無數次諗下變都驚：我會遇到咩事㗎？會唔會仲衰過𠵱家？唔係怕下一個男人差，係我覺得自己太差唔值得俾人愛，連諗都唔敢諗。
發生咩事 兩個女有眼睇
點解你會覺得自己差？喺 Roy之前你有冇拍過拖？
冇㗎，佢係我第一個男朋友……哈哈……我嘅成長造成我咁啩，屋企得我同妹，普普通通爸爸做裝修、媽媽打工，喺新界長大，可能我嗰代父母唔同𠵱家，唔會多鼓勵多讚賞建立自信。連入呢行同做 model都係，得個高字，成日覺得父母生成，又唔係我自己叻，趙頌茹，你真係好渣囉。
頭先我問你個問題，你諗都唔諗就答係怕改變，個答案竟然唔係愛？
係呀我好清晰㗎……呢一年我要思考、有諗嘢、有問得自己好清楚，有幾愛呢？唔同過往難受起上嚟淨係識得喊：「我唔可以冇咗佢……」，從來冇問過自己一齊到底為咩呢？𠵱家我教個女都係，當你唔清楚咩係愛，就問下自己先，佢係唔係尊重你、會唔會聽你講、又係唔係可以帶俾你開心呢？
同周永恒打過幾次交道，我諗我對佢嘅印象係，佢冇是非黑白，佢嘅成長冇人教佢咩係是非黑白。
我只能夠話，教小朋友身教好重要。我成日同兩個女講，媽咪係因為愛你，所以要教你，如果媽咪睇住你錯都唔出聲……嗰啲唔係愛……
幾咁矛盾，如果唔係呢個男人，你又唔會有呢兩個女？
我覺得係兩個小朋友嘅出現，令到我呢個人更完整。因為小朋友我先至會識承擔責任，因為小朋友我先至有推動力去自己揹起咁多嘢，因為小朋友出現，我先至知我媽媽幾愛我……以前啲人淨係做，唔會講，我生完小朋友，先至知道以前我稱之為煩嘅嘢，其實係母愛嚟㗎。所以我成日同啲女講「愛」，但係大女好搞笑，話我喺條街度咁講好醜怪喎……佢生日嗰朝我都同佢講：「多謝你喺我生命出現。」佢話肉麻到佢啲腳趾都乸埋喎……你明唔明？如果唔係佢，我嘅婚姻出現問題我可能會繼續逃避。就算離婚，都可能收埋自己好長一段日子，慢慢企返身，𠵱家唔係，我想佢哋睇到一個心靈健康嘅媽咪。
佢哋會唔會問，爸爸衰啲乜？
由當初一開始，到事情發生，佢哋一直知咩事。我會同佢哋講，爸爸媽媽分開住，但佢依然係你爸爸。
佢哋知咩事？係知佢打人，定係知第二個女人？
我諗佢哋有啲嘢有眼睇，所以知……但係其他女人，我唔知佢哋……我唔想影響佢哋對男女關係嘅觀念，我生兩個女，我都想佢哋將來婚姻美滿，呢樣嘢我好小心。
佢講乜都唔會再影響我
一個人養家，工作方面有咩安排？
我想拍多啲嘢，但最想，係做一啲關懷女性嘅工作。唔知自己做到啲咩，對女性我覺得有個責任，𠵱家身邊都有好多女性，我會去聽佢哋講嘢……我好記得自己最難過嘅日子，身邊有人願意陪我、願意聽我講嘢，喺我身上面感受到嘅，我都想俾其他人。
有冇諗過點做？開節目？寫專欄？定成立一個基金？一間宿舍？
太表面嘅嘢我唔會做，開宿舍真係有諗過，但係需要太大一嚿錢，要搵多啲志同道合嘅女性一齊做。
呢件事以後，你覺得自己可以做到嘅事多咗好多？
係㗎，仲有就係做自己品牌嘅衫。
你好注重教育、會講俾兩個女聽是非黑白，我想問周永恒呢？佢教唔教？
過往爸爸都係負責玩多，家庭嘅角色，我係做嚴嗰個。
佢陪玩陪得盡唔盡責？做得好唔好？
過去嘅嘢我覺得無謂講，我寄望佢將來可以做好爸爸，我都唔想我兩個女成長有缺失。
錢嗰方面呢？你係完全靠自己養家？
係，完全靠自己，香港地，要陪養兩個小朋友，你話難唔難？但係我會慳自己，啲錢寧願使喺佢哋身上。
點慳自己呢？其實你咁多年都唔係章小蕙嗰種，飯可以唔食，但衫唔可以唔買？
不嬲都唔係，最重要係，我𠵱家欣賞自己嘅位唔係靠興緊嗰啲嘢，唔係擺上身至覺得自己好睇……因為我嘅價值觀扭轉咗，唔係靠堆上身嚟認同自己。
呢件事以後，你仲信唔信自己睇男人嘅眼光？
我真係冇諗過，成年都冇諗過第時拍拖定結婚，淨係覺得冇嘢重要得過小朋友……如果我第時嘅伴侶會影響小朋友、佢哋反應唔 ok，咁呢個伴侶我寧願唔要。我咁多年冇單身過，𠵱家反而好享受一個人，因為我唔係以前嘅我，我識得欣賞自己，亦都唔再需要配合其他人，好耐冇試過喇，正喎！
我覺得當你唔係以前嘅趙頌茹，你下一個伴侶亦都會 upgrade，唔會咁爛！
我諗我識揀，唔會再同價值觀唔同、話題傾唔到一齊嘅人一齊。
循例都要問下，周永恒之前喺面書鋪完又刪，話掛住老婆同女，想有番個家？
其實嗰番說話，我覺得個時間性唔係好 make sense，成年喎，先至講啲咁嘅嘢……
係唔係好冇新意？甚至覺得好笑？當一個人日日道歉當食生菜？
不如咁講，呢一刻我太清楚自己心意，就算對方講任何嘢，都唔會影響到我。
你嘅心意係咩？一定唔會返轉頭？
係，唔會返轉頭！佢講咩，我都係「哦」……過去呢一年我終於了解自己，鍾意啲乜、唔鍾意啲乜。我鍾意一個人去睇場戲，去睇本書，帶兩個女行下圖書館，我想兩個女有啲修為囉……
而唔係好似以前咁家嘈屋閉？擔驚受怕？
係喇！我鍾意呢一刻嘅自己，嗰啲令到我唔開心嘅嘢，我唔想再要。
醒晒喇！
特別記得有一次，藏毒案上完庭，和大班行家追到去天水圍周永恒老家，這個 20歲剛剛闖了禍的男孩子一點不慚愧、一點不後悔，倒是得意洋洋的和表弟一人一架單車和記者在屋邨玩捉迷藏，一個字，好威威。
聽了這段往事，有個人附和我：「係呀，佢真係唔知錯，真係覺得好威威。」
說到那誰隔幾日又搞下事認下錯發下癲，有個人又說：「我唔怕啲咩，淨係怕兩個女慢慢大慢慢知咩事，佢再咁落去會影響個女。」
係囉，唔為自己着想，都要為兩個女，施主，醒喇喂！
撰文：朱小博
攝影：范仲良
形象： Bryan@the Flaming
服裝： N12H場地提供： ZURRIOLA(The One)
|
鍾意就快D Share啦！
|
|
|