全知言
MISS MO返嚟喇 最愛 Do姐乜乜乜
由《大時代》開始，大台最多人談論嘅時段梗係深夜最近翻播《男親女愛》呢套經典處境劇，唔少網友都寧願瞓少啲追睇，當年 Do姐同子華世紀一吻，創下４５點最高收視。
15年後子華變男神，而 Do姐亦攞過影后同視后，到𠵱家都冇變耆英食老本，大騷係必然正選司儀，主持嘅電台節目《口水多過浪花》亦高收。 58歲 Do姐呢把刀依然鋒利，似乎仲未有生銹呢一日喎！
張智霖
《親情》經典
我最鍾意 Do姐嘅當然係《表姐》系列啦，因為 80年代陪伴住我哋成長，令我哋對電影更加多熱情。對 Do姐最深刻嗰場戲，應該係《親情》，佢同發哥㗎，佢哋喺球場度狂吻，鍚咗成 30秒至 1分鐘，唔好話當時，就算𠵱家都唔係咁多囉，呢個係好經典。
魯芬
肯教新人
我有睇《男親女愛》，見到佢同子華鬥窒，我就知好好玩，好多金句撞出嚟。我啱啱入行時，同佢拍《女子監獄》，佢好肯教新人，佢教我哋點睇攝影機位，應該點行位，好記得同佢浴室嗰場戲，好易就令我入到戲。
連詩雅
有娛樂性
以前都有睇過嘅，我最記得佢同子華咀嗰一幕，喺好尾先有呢一幕嘅，我記得當時大家都好期待嘅！我非常欣賞 DoDo姐嘅口才，知識啦，覺得佢做節目係非常有娛樂性。
蘇永康
世紀 Kiss
梗係有睇《男親女愛》啦， Miss Mo嘅角色係好啱 Do姐做，呢套劇選角係一流。最有印象係衝破４５點嗰下世紀 kiss啦，因為我老友張衞健當年有套《小寶與康熙》去到４３點，諗住攞到 TVB最高收視，實食啦，點知……哈哈…… Do姐係一個全方位嘅藝人嚟，拍戲唔使質疑啦，同發哥拍電視劇已被肯定，拍電影又有鄭九組稱號，跟住司儀界甚至廣播界，佢喺每一瓣都咁專業同出色。
趙學而
口才好
欣賞 Do姐嘅地方就一定係口才，轉數快，我最愛佢同發哥主演嘅《我愛扭紋柴》，造型突出啦，台詞又好笑啦，角色係好典型香港打拼嘅女仔，佢做得好強捍同好委屈。
街坊： Do姐唔 Out喎！
58歲 Do姐的專業程度，一眾明星都大讚，後生仔未必個個有睇過《男親女愛》，但就有睇過佢做大騷同電台節目，年輕人仲讚 Do姐口才好，最緊要係覺得佢唔 out。
即時報料 facepop
熱線： 9222 0828
電郵：facenews@nextmedia.com
facebook： Face Magazine inbox
line、 we chat id： facemagazine
|
鍾意就快D Share啦！
|
|
|