第 6屆 UStar校花校草得咗 [FACE - 443 - 大專校園] :),UStar,MF,

U Star 第 6屆 UStar校花校草得咗 經過個多月嘅才藝訓練，第 6屆 FACE UStar大專校花同校草大選喺上週二（ 10日）正式落幕，當晚 10位 UStar爆發小宇宙，搏到盡都係想得到台下觀眾以及兩位評判王喜同黃紫盈嘅認同。結果 Pony憑住強勁澎湃嘅舞技成功突圍，力壓其餘 4位校花成為冠軍。另外新樂王 ...

U Star

第 6屆 UStar校花校草得咗

經過個多月嘅才藝訓練，第 6屆 FACE UStar大專校花同校草大選喺上週二（ 10日）正式落幕，當晚 10位 UStar爆發小宇宙，搏到盡都係想得到台下觀眾以及兩位評判王喜同黃紫盈嘅認同。結果 Pony憑住強勁澎湃嘅舞技成功突圍，力壓其餘 4位校花成為冠軍。另外新樂王 Zelos，上台表演唱歌當足自己個人騷，亦憑住一曲清新又好聽嘅〈 Best Of Me〉成功搶分，不過除咗當晚台上片段值得回帶，兩位新鮮出爐嘅花草冠軍嘅內心感受都值得同 fans分享一下，即睇！

UStar圓滿卒業

Ustar校花　知專賈曉晨(2)蔡寶欣 PONY

20/162cm/52kg

知專　時裝品牌及採購高級文憑 Yr.2

2號 Pony話即使呢 2個幾月幾乎冇時間拍拖，不過男友都絕無「詐型」，當晚仲帶埋鮮花到場支持兼上台獻吻，全場即刻起哄，甜到漏呀！

其實初初報名參加 UStar冇乜信心，尤其海選面試時，個個參賽者唔係做開 model就係有出鏡經驗，相反自己就淨係識跳舞，仲要好懶冇 keep住練習嗰隻。記得有條 UStar片要拍自己擅長嘅才藝，但大會揀咗我冇咁擅長嘅滑板，展現唔到自己最有把握嘅跳舞一面，心諗應該提早畢業！

入到 UStar 10強，已經覺得超額完成，不過又好想證明自己係得嘅！因為我細細個讀書唔叻，跳舞又唔出眾，難得入到決賽，唔想再浪費機會。因為真係付出咗好多，尤其係休息嘅時間，臨決賽嗰 2個禮拜，我幾乎每晚瞓得 4粒鐘，因為練舞之餘，又要兼顧返學、考試、趕 project，好彩最尾都能夠成為冠軍。

當宣佈冠軍聽到自己個名，啲眼淚真係忍唔住，覺得啲壓力一下子釋放晒出嚟！男友係我比賽嘅提名人，好多謝佢一直咁支持我，雖然中間都有介意過我同其他靚仔校草日見夜見，不過委屈咗佢 2個多月都要聽我呻，又陪我練舞，真係好多謝佢！

Ustar校草　中大新樂王(19)黃凱逸 Zelos

21/176cm/66.8kg

中大新聞與傳播學系學士 Yr.4

父母除咗喺背後無限量支持 19號 Zelos，決賽當晚亦有到場為囝囝打氣， Zelos仲大爆爸媽為咗些牙佢啲參賽相同短片，仲特登學玩 facebook！

由細到大，我覺得自己做嘢都係諗吓就算，又或者得把口，不過到咗 final year，我決定唔可以再維持呢個心態，要說到做到。我玩音樂玩咗 4年，亦夢想能成為歌手，但其實我一直冇同任何人提起（包括父母），甚至行動！我知如果我乜都唔做，唔會入到樂壇，所以一見到有 FACE UStar比賽贏咗有試音合約，我就即刻報名參加！

去到 UStar 10強，知道自己有機會踩入九展喺台上自彈自唱，感覺好真實又好夢幻！揀歌時有諗過唱〈高山低谷〉，但諗一諗當晚歌唱主題係鬥清新，我就覺得〈高山低谷〉太悲，最後轉咗〈 Best Of Me〉，想俾觀眾及評判認識同欣賞最好嘅我。

贏咗嗰一刻，我最想攬住爸爸媽媽，因為佢哋從來唔會過問我想做嘅嘢，兩老只會無限量支持我。亦知道原來有好多朋友都好愛我，佢哋有啲仲特登出深水埗買料整塊特大燈牌幫我打氣，真係好感動！

決賽當晚，王喜同黃紫盈擔任 UStar評判，王喜仲送咗個小貼士俾一眾 10強花草：「如果你冇信心成為當晚嘅第一，就請你成為當晚嘅唯一！」，而黃紫盈更加大搞氣氛，話 UStar嘅粉絲們嘅現場打氣聲愈大，佢就會愈俾得高分喎，搞到全場觀眾即刻瘋狂尖叫！

今屆 UStar競爭激烈，由 5位 UStar瓜分 6個獎項，校花校草冠軍仲會獲得 1萬蚊獎金，不過(2)Pony同(19)Zelos都話會拎出嚟同 fans和屋企人食大餐慶祝。

才藝 UStar Girl　(10)城大易佩詩

(10)Cecilia才藝表演環節個人 solo唱歌好聽，跳舞賣萌又得，熱情澎湃亦得，得咗！拎到才藝 UStar Girl完全係實至名歸。

才藝 UStar Boy　(19)中大黃凱逸

(19)Zelos貴為大專聯校歌唱比賽亞軍，上台自彈自唱呢啲基本嘢嚟嘅啫，憑住一曲〈 Best Of Me〉，成功冧掂兩位評判及台下一大班觀眾為佢歡呼。

網上人氣 UStar Boy　(14)知專劉頌鵬

(14)Enson拍住 2號 Pony出戰才藝比拚，點知喺後台綵排時 Enson為咗增強視覺效果，苦練後空翻卻不慎整親左手食指至甩臼，但佢為免拖累 Pony，仍然堅持忍痛「扎住」上台表演至完騷先去睇醫生，結果成功取得網上人氣 UStar Boy，正宗真男人！

網上人氣 UStar Girl　(5)珠海林映蔚

(5)Bie雖然唔識跳舞，但樣靚聲甜，決賽騷更加決定突破自己，挑戰出晒名高音到離譜嘅〈感應〉！結果成功奪網上人氣 UStar Girl。

熱跳開騷　才藝大對決

為咗呢隻 opening dance，每位 UStar足足苦練了 1個月，每逢放學就立即到排舞室，由晚上 8點跳到 12點，決賽前夕更加排到深夜都唔捨得走，為嘅只係俾最好嘅舞觀眾睇，抵讚！

決賽當晚，一眾 UStar都俾足心機及汗水演出，將全場氣氛推到最 high，如果想重溫開心片段，可以登入 FACE UStar YouTube頻道！

(3)城大 Audrey(15)港大保良局 Jason辣身舞

跳開鋼管舞嘅(3)崔嘉怡 Audrey為決賽騷，夥拍(15)李展樑 Jason苦練足足 1個月， Audrey仲講笑話已經當咗 Jason係鋼管！不過佢哋隻舞貼身又火辣，會唔會跳出愛火花㗎？

(9)浸大 Megan豪邁唱

(9)黃雪瑩 Megan，決賽當晚走「烈女」路線，獻唱 Rihanna嘅〈 Diamonds〉，盡騷豪邁一面。

(13)理大 Danny唱到跳起

(13)Danny無論唱歌、跳舞或者俊俏嘅面孔，都係冠軍大熱門。入到最後 2強仍不敵另一頭號大熱 Zelos，無緣冠軍。

(18)才晉 Alvin彈唱金曲

其實當晚才藝表演環節(18)溫詠傑 Alvin自彈自唱，大玩金曲 medley，成個翻版周杰倫咁款，可惜仍然輸咗個馬鼻俾 Zelos。

贊助商獎項

Za完美鬈睫毛大獎　(9)浸大黃雪瑩

(9)黃雪瑩 Megan一向擁有一副出眾嘅混血兒面孔，一雙電眼更加成為佢嘅 icon，難怪會成為 Za完美鬈翹睫毛大獎嘅得主。

落選 USatar到場撐

上九展決賽大台只有 UStar 10強，但落選 UStar 20強當晚就拉大隊支持，果然係好兄弟！

師姐師兄成功分享

上屆花草冠軍 Mina同 Phoebus都有上台分享心得，二人不約而同話當選後多咗好多機會接觸娛樂圈兼 casting， Phoebus更被 Jam Cast簽約成旗下模特兒。

Popper 88晒舞功

星級排舞老師 Popper88（左）為一班 10強 UStar出盡力排 Opening dance同才藝個人 solo，當晚仲上台大跳拿手 popping舞技。

8星撐 UStar　觀眾嗌爆九展

九展決賽當晚，除咗一眾 UStar落力演出，希望可以成功突圍奪冠，仲有 8星現身獻唱，為花草們打氣，泳兒就化身 UStar四強考官，在台上與 UStar合唱，而其他歌手就在台上大送靚歌，令全場觀眾 high到上太空！

當晚大會評判王喜向 UStar教路，佢話：「如果你冇把握成為今晚第一，就嘗試做唯一。」咁(15)Jason李展樑騷肌啱唔啱你口味呢？

泳兒

泳兒當晚除咗係表演嘉賓，仲與 UStar重新翻唱〈擋不住的風情〉，獻唱期間見泳兒同 UStar互動多多，十足搞笑。

關心妍

靚太關心妍壓軸 fit爆唱〈關家姐〉，原來佢自爆細個係大肥妹，所以好羨慕一眾 UStar身形窈窕。

雨僑

港大生物系畢業的雨僑大騷長腿出場，一上台佢就問司儀杜如科，點解冇港大同學參加，台下 UStar 20強，港大潮醫神 Morgan，即時舉手大叫回應，女神果然有吸引力！

陳詩欣

2011年 UStar校花二強 Eunice陳詩欣，夢想成真，成為今年樂壇新人，佢以暖場嘉賓身份唱新歌〈蠢〉，為一眾師弟妹打氣！

關楚耀

關楚耀有一排冇曝光，但當晚獻唱完落台，即被唔少觀眾及落選 UStar包圍，不過佢就來者不拒，大方俾 UStar集郵！

Super Girls

Super Girls當晚又跳又唱，但佢哋都試過唔少台上瘀事，成員 Heidi就自爆試過忘記歌詞同甩舞，後尾扮冇事繼續演出，好彩觀眾唔發覺！

欣宜

欣宜在後台向記者表示睇好(13)Danny孔德賢，貪佢喺宿舍扮過女人，一定好玩得！

As One

成功進軍韓國樂壇嘅 As One，當晚獻唱〈 Candy Ball〉，在場除咗觀眾跟住唱，連後台工作人員及記者都識唱。

羅孝勇

羅孝勇自彈自唱〈愛怎說起〉，原來佢一早到場綵排仲聽咗校草冠軍 Zelos演出，大讚佢好有才華，希望之後可以同佢合唱！

Daydream Nation　尖沙咀河內道 18號 K11 1樓 K11 Art Mall（ 2177 7208）

DEMO　http://www.demo-fashion.com

IMPLY　尖沙咀厚福街 45-47號 The Studio 1樓 125鋪（ 2771 8098）

HOAX　銅鑼灣希慎廣場 709鋪（ 2337 8327）

Novelty Lane　灣仔莊士敦道 104-106號 2樓（ 9257 9875）

http://facemag.hk/ustar2015

主辦： FACE

贊助商： bauhaus、 FUJIFILM insrax、 HUAWEI Za

大會指定編舞伙伴： Popper88

化妝及髮型： A revolutionary

鳴謝：中國 3D數碼娛樂有限公司

撰文：彭家駿

攝影：鄭明川、葉曉明、楊學

鍾意就快D Share啦！

下一篇 》