上週六（ 14日），蔡思貝同男友麥秋成（左）一齊為好友許亦妮慶祝生日。
封面
涉假學歷 扮 Single 大話妹蔡思貝分身瘟仔
13年港姐亞軍蔡思貝，出道短短兩年，是非多到拍得住吳若希，緋聞男友數目更係同期新人之冠，堪稱大台新一代集郵女星。
鍾意溝仔唔係罪，不過 24歲蔡思貝最近被爆疑似報假學歷， 13年 10月透過國力書院報讀菲律賓比立勤國立大學的工商管理學士課程， 11月極速讀完，同年 12已經攞埋證書，快過打針!
麻煩事鑊鑊新鮮，但蔡思貝仍然有心情瘟仔。對外聲稱單身方便收兵，實則就繼續同大隻跳舞男麥秋成同居。咁識分身，大台應該度身訂造套《雙面伊人》俾佢啦!
冇家底冇後台的蔡思貝， 13年選港姐雖然不敵票后陳凱琳，不過得寵程度絕不比「嘉穎嫂」差，劇接劇而且戲份重，早前的《衝線》擔正做女一，未出街的《潮流教主》、《純熟意外》同拍緊的《味想天開》都係女主角，無疑係大台重點力捧新人！
分車出入
深受監製高層喜愛，全因蔡思貝低調又識做。明明同大隻跳舞男麥秋成同居，蔡思貝都可以公開話自己單身，入行短短兩年已掌握「偽人」之道。
上週六（ 14日），蔡思貝同男友麥秋成為好友許亦妮慶祝生日，經過去年被本刊踢爆同居，兩人今次都顯得格外小心，各自揸車出發，避免被影到同車出入。三人到將軍澳 Popcorn食飯，雖然蔡思貝盡量避忌，同男友前後腳分開行，但一入到餐廳即捉住男友雞啄唔斷，幾乎無視壽星女許亦妮存在。
稱單身收兵
做戲做全套，離開商場時，蔡思貝又同男友刻意分開車走，自己揸 Beetle，而許亦妮就跟麥秋成同車，擺明搵老友做煙幕。事後許亦妮在 ig全力配合做大龍鳳，只 po自己同蔡思貝的合照，扮晒冇其他人在場。
「麥蔡戀」去年 8月被本刊斷正，有圖有真相，但蔡思貝多次否認，強調自己單身。擘大眼講大話，一方面可以討好公司、另一方面其實係方便自己周圍溝仔。
德國留學的蔡思貝，性格爽朗開放，參選港姐時有個老外男友，分手後分別同多個小生傳緋聞，包括大隻仔溫家偉、大孖周志文等，甚至有傳拍《衝線》時姣溝羅仲謙，令謙謙一度被楊怡逐出家門！
大台盲撐
分身溝仔有術，分身讀書一樣掂！蔡思貝參選時報稱學生， 10年至 12年在德國讀德文課程， 12年 10月開始在德國海德堡大學修讀民族學和音樂，直至收到通知即停學返香港選港姐。
浸過鹹水本來好吃香，點知蔡思貝於 13年 10月透過國力報讀菲律賓比立勤國立大學的工商管理學士課程，並火速於 11月讀完， 12月獲頒證書。僅 1個月就做到學士，天才貝被質疑買學位，嚴重損害港姐美貌與智慧並重的形象。不過你有你恥笑，大台已講明盲撐蔡思貝，唔會奪去港姐亞軍名銜，繼續開劇力捧。滿口大話， so what？
收兵高手
明明有大隻舞男做正印，蔡思貝都要扮單身收兵，差啲連羅仲謙都中招呀！
周志文
又係拍《衝線》傳撻着，蔡思貝仲自爆會約大孖打友誼波——籃球。
校友王璐瑤：冇見過蔡思貝上堂
蔡思貝以 1個月極速完成菲律賓比立勤國立大學學士課程，被質疑學歷造假，事件爆出後，發現原來除了不少名人於此校畢業外，多個圈中人亦係校友。
王璐瑤
同樣係比立勤國立大學工商管理學士課程畢業的王璐瑤，對蔡思貝 1個月讀完覺得難以置信，「我讀咗 3年先畢到業， 1個星期上 3堂，份畢業論文要寫過萬字，我寫咗 3個月先搞掂！不過我咁耐都冇見過佢（蔡思貝），反而同李蘊一齊上過堂！呢單新聞搞到以為我呢間學校唔掂，所以𠵱家諗住報讀其他學校嘅課程！」
陳茵媺 假大胸
06年港姐冠軍報稱 33.5吋上圍，但着泳衣時，卻現出與尺寸不符的岩石胸身材，有網友拎番佢 04年參選華姐時的平胸相比較，質疑佢曾隆胸。
採訪、撰文：娛樂組
攝影：娛樂突發組
|
鍾意就快D Share啦！
|
|
|