賭王公子多戀事，四房細仔猷君同新加坡變臉孖妹組合Yumi愛得越來越高調，四太阿媽開晒口都阻唔嚟，原來三房孻仔猷啟亦有著落!
三房孻仔猷啟之前傳佢同家姐超蓮閨蜜、宇宙巨G.E.M.撻著，似乎純屬煙幕，仲出嚟話自己單身冇拖拍。估唔到猷啟平時斯斯文文、內裡open愛夜蒲，噚晚一身貼身圖案tee嘅戰鬥格，出動中環搵食媾女，節目豐富。
凌晨1點，猷啟先同成班友人去蘭桂坊夜場Zentral慶祝生日，最初喺場內都係飲吓悶酒、玩下手機；玩咗半個鐘，就同一男子落樓，接一個身穿黑色背心連身短裙嘅長髮女子上樓繼續玩。
猷啟可謂深藏不露，遺傳咗賭王風流基因，有女伴即上晒身，揸住大大支香檳同長髮女跳舞，猛要遲到嘅女伴飲酒，多次要對方隊晒杯香檳才滿意，然後猷啟亦好豪氣咁、「自動波」乾晒自己杯酒。
飲咗兩杯，猷啟開始進擊，埋身媾女，見佢不時手舞足動、high爆捉住女仔嘅手仔跳舞，又玩猜枚，雙方玩得癲，狀甚情侶feel，猷啟更借意攬對方纖腰、手臂，拖手、咬耳仔密密斟，之後更想咀對方。
不過長髮女可能未warm up，對猷啟嘅咀咀閃避，佢惟有退一步錫對方額頭，同平時乖乖仔簡直判若兩人，猴擒媾女急色相盡出。
二人喺舞池玩咗一輪，就坐埋梳化回吓氣，猷啟繼續同長髮女密斟纏綿，難得賭王公子睇得上，加上猷啟落力冧女，長髮女亦開始受落，主動捉住猷啟條腰，而猷啟出手輕摸對方長髮，期間再為佢密密為女方斟酒飲，似乎好急想個女仔飲醉咁。長髮女表現酒量麻麻，不時斷斷續續慢慢飲，而猷啟就望到實，希望對方乾晒為止。
猷啟同長髮女玩足3粒鐘，蒲到4點半，佢哋就同一男友人離開，行斜路落娛樂行附近截車，眾人都腳步浮浮，動作hyper，相信佢哋有啲醉意。男友人十分識做自行坐的士走先，而猷啟則同長髮女上另一部車，未知會唔會有下半場。
據悉，猷啟呢排未有拖拍，不過周時都會與唔同女友人約會，唔知長髮女有冇機會升呢做「固定女友」，就睇吓有冇進一步發展嘞!
| 賭王三房兒子何猷啟噚晚喺中環夜蒲。(採訪、攝影：楊浩賢、陳辰) |  猷啟本來都係同一班男士一齊，飲吓悶酒。 |  玩咗半個鐘，猷啟就接女伴上嚟，猷啟一見女伴在場，即風騷「咬耳仔」。 |
 猷啟又出招o氹女，真係盡得爸爸何鴻燊追女仔嘅遺傳。 |  之後就係咁捉住女方嘅手仔! |  女伴亦主動餵猷啟飲酒。 |
 女伴餵咗一陣，猷啟就將對方擁入懷中。 |  猷啟仲向女伴放電晒冧樣。 |  女伴就再次餵佢飲酒。 |
 二人坐低嗰陣，女伴唔止「咬耳仔」，仲輕攬猷啟。 |  就算有一班朋友喺身邊，佢哋亦情深對望，好似眼中得對方咁! |  |
 終於見到女伴真身! |  最終…猷啟攬住女伴上咗的士走人。 |
|
鍾意就快D Share啦！
|
|
|
