天佑喊住娶老婆 恨炮製龍鳳胎
Shine成員徐天佑昨日與拍拖8年的圈外女友Olive結婚，天佑註冊時數度哽咽地向太太宣讀誓言！晚上則移師洲際酒店筵開36席，並三度咀嘴！對於被指婚禮花費200萬的天佑，出動兩卡求婚鑽戒。恨生仔的他將到日本度蜜月，笑言要睇紅葉漂亮與否才決定造人！
天佑三度肉緊咀老婆，認真Sweet爆！
一對新人進場時接受親友的夾道祝福。
新娘唔小心Kick親裙！
宣誓時，天佑忍喊表情勁搞笑！
新娘子豪邁地打算為老公抹走眼淚，其後天佑為老婆戴戒指！
現年32歲的徐天佑上月突爆與拍拖8年的圈外有米女友Olive結婚，早前遠赴意大利小鎮舉行訂婚儀式，並在意大利及法國為婚照取景。昨日天佑小登科，身為新郎哥的他事前已在微博表露興奮心情，除讓姨甥仔跳床寓意「連生貴子」外，又上載整裝照片，對大日子可謂雀躍不已！
經過接新娘的儀式後，一對新人換上西式婚紗及禮服出發到半島酒店餐廳舉行簡單而隆重的簽字註冊儀式。當一對新人宣讀誓詞時，見慣大場面的天佑仍十分緊張，在回憶兩人拍拖點滴時，他數度忍住眼淚，又表情多多，引得全場嘉賓大笑，更要Olive用紙作扇為他「降溫冷靜」，天佑說：「你記唔記得我哋啱啱一齊嗰陣，你就問我『Do you love me？』，我就話講呢啲係冇用。」而Olive又坦言當年中二，已睇中身為校草的天佑，希望大家會繼續相愛。接着二人宣讀誓詞及交換戒指，當禮成天佑掀起老婆頭紗後，即肉緊擁吻，令全場尖叫聲不斷！
三度咀嘴偷笑
當註冊儀式完成後，一對新人在洲際酒店筵開36席。通往宴會的長樓梯上擺放綠色的花草，令人儼如置身花園。約6時15分，一對新人着婚紗及西裝會見傳媒，並在傳媒要求下三度咀嘴，兩人又不時對望偷笑！Olive則十分怕醜，「拒絕」與天佑齊齊受訪。獨自受訪的天佑坦言心情十分興奮，指場內布置均出自太太靈感：「佢負責審美，好似樓梯布置係太太諗咗好耐，之前婚紗相喺花園影，好想有呢種感覺。」
有指今次婚禮使費要200萬，天佑笑說：「使少少啫！（嘩！）講笑咋！一路有儲錢，但婚禮應使則使，一生一次，係大事嚟嘅。」問到太太手上的鑽戒價值多少？他說：「兩卡，係求婚戒指，今晚仲有啲鑽飾未戴，仲對黃鑽耳環，係朋友設計，非常友情價。」
日本度蜜月
天佑透露將前往日本度蜜月，笑言要睇紅葉漂亮與否，才決定造人計劃：「我哋成日都兩個人去旅行，今次同朋友去日本，好想去影紅葉。（造人？）咁睇吓啲紅葉靚唔靚，自己都想，愈大個愈想。（太太點睇？）佢話睇我，但教小朋友都係幾傷腦筋。（生幾多個？）親友講笑話最好生龍鳳胎，女家親戚有生過孖胎，一年抱兩，咁就方便啲。」又稱會在婚宴上為太太獻唱：「原本想自己作，但趕唔切，會唱陳百強嘅《有了你》。（今晚不醉無歸？）未到十點半都唔會飲酒，好想清楚Enjoy每一個Moment。」
憶述註冊時，天佑坦言原本以為十分冷靜，但先見外父忍不住落淚，之後再到太太，所以才觸動自己淚腺，但澄清並不是嚎哭！他強調是實際型，會用行動去實踐「愛的宣言」。
採：音樂組 文：專案組
天佑三度肉緊咀老婆，認真Sweet爆！
一對新人進場時接受親友的夾道祝福。
新娘唔小心Kick親裙！
宣誓時，天佑忍喊表情勁搞笑！
新娘子豪邁地打算為老公抹走眼淚，其後天佑為老婆戴戒指！
|
鍾意就快D Share啦！
|
|
|