手起刀落，黎太隨即把新鮮切好的牛肉送到客人手上，「最緊要身體健康啊！」黎太向買肉的街坊送上祝福，在馬鞍山恆安邨街市開鮮牛肉檔29年的她，最終決定在11月30日結業退休，結束長達48年的宰牛生涯。
黎太憶述，娘家中只有一個男丁，所以她17歲開始便要幫爸爸落街市劏牛，自此與牛為伴近半世紀。人稱「牛肉妹」的她以前在新蒲崗街市宰牛，街市清拆後遷至當時新落成的馬鞍山恆安街市，繼續出售鮮牛肉，不經不覺29年，子女長大成人，有感媽媽做肉檔辛苦，紛紛勸告黎太退下來享受生活，黎太不捨心血，多番推搪，結果「3年之後又3年」，她終於決定與牛肉刀說再見。
黎太本身住西貢，每天清晨5時多便出門動身往檔口，多年來風雨不改地開檔，即使「頭暈身㷫」、有傷在身，都堅持工作，「啲貨要送畀人㗎嘛！」29年來兩夫婦靠賣鮮牛養活一家五口，黎太說，自己最初其實不喜歡宰牛，但為了生計，「都冇法㗎。」
臨別依依，不少街坊均流露不捨之情。在恆安邨任家務助理的曾太幫襯黎太20多年，她指黎太與一般肉檔檔主不同，臉上總掛著親切的笑容，而且牛肉品質與價錢相宜，「有時老人家唔食得多，但我買少少（肉）佢都肯畀我，唔係檔檔都肯㗎嘛！」
來買肉的街坊來到檔前，總會抬頭一看檔頂那個告別啟事。黎太指，告示是丈夫的主意。一直迴避記者的黎先生終於說話：「話畀人知我哋退休，畀返個通知。唔係拉埋個閘就算，人哋唔知你去咗邊。」黎太笑言，丈夫害羞，平時主要由她與街坊打交道，她坦言多得街坊、子女、和枕邊人的疼惜與支持，才支撐得起牛肉檔的經營。
| 陳奕釗攝 |  陳奕釗攝 |  陳奕釗攝 |
 陳奕釗攝 |  陳奕釗攝 |  陳奕釗攝 |
|
鍾意就快D Share啦！
|
|
|