王菀之老竇唔放手 Eric So搶新娘
恭喜、恭喜，36歲的王菀之（Ivana）昨日下嫁47歲的「Figure王」蘇卓航（Eric So），於陽明山莊舉行白色簡約婚禮，不捨愛女將離開身邊的王父遲遲不肯將Ivana的手交給新郎，搞到Eric So要出手搶新娘，王母即場朗誦作給新人的詩，在親戚及好友見證下，Eric So肉緊得兩度啜爆太太，Ivana恨嫁成功。
歌手王菀之昨午與拍拖兩年的男友蘇卓航於陽明山莊舉行婚禮，邀請自稱是Ivana「老公」的張敬軒、好友容祖兒、楊千嬅母子、吳君如、王祖藍、填詞人黃偉文、梁祖堯及前歌手黃馨一家三口等出席。
棄傳統夠另類
婚禮會場布置以白色為主，前晚因緊張失眠的Ivana戴上頭紗襯白喱士長裙代替傳統婚紗，新郎則戴上紳士帽、西裝外套襯牛仔褲，兩人進行結婚儀式時Ivana翹實父親王帆進場，不捨愛女出嫁的王父遲遲不肯將愛女的手遞給新郎哥，賓客起哄說：「係咪唔捨得呀？」王父點頭直認：「係呀，我唔捨得！」新郎哥Eric So心急到伸手搶新娘，一對新人雙眼通紅攬實王父，場面感人。
在過百親友見證下，新人進行註冊儀式，交換戒指、合巹交杯及切蛋糕，兩人全程情深對望，Sweet到爆，親友再次起哄：「咀佢、咀佢。」新郎哥即肉緊雙手捧住「老婆」面珠兩度大力「咀嘴」，雖然現場舉行西式婚禮，但會場又播出中式婚禮樂曲，原來是一對新人想要求中西合璧！
王母贈詩唱歌
跟住新人向父母、長輩跪地斟茶，王父送上名牌手錶給女婿，王母則送上一對龍鳳鈪及巨型玉器鏈墜給Ivana作嫁妝，又親自作詩《新的篇章》贈給新人，身為「女高音」的王母還即席獻唱，在Eric陪同下由Ivana彈琴伴奏，其兄則送上碎鑽戒。一眾賓客與新人玩自拍時，軒仔向Ivana撒嬌說：「依家兩個老公同你影張相啦。」在旁的黃偉文插嘴說：「哈，唔知邊個係老公呢？老公競選比賽。」軒仔火速將三人合照放上網，並留言：「真假老公。」有網友留言笑說：「兩個都要啦。」
紅繩締結良緣
Eric So向來低調，只有蘇太Ivana單獨受訪，她承認爸爸唔捨得：「其實交咗畀Eric，我依然都係爸爸嘅乖乖女。」為母親伴奏的Ivana更錯把婚禮說成「音樂會」：「呢個音樂會充滿音樂，係個好浪漫婚禮，最親嘅朋友、親戚都喺度。」談到她與老公的結婚造型，表示是一起構思：「頭上皇冠係喺日本影婚紗相時，佢買嚟送畀我今日戴，花球就係日本一間藝術廊度買。」至於Ivana左手無名指戴上求婚戒及鑽石結婚戒指，她說求婚戒指是老公設計：「綁咗條紅繩打咗隻蝴蝶結，佢話代表『締結良緣』。（老公有冇講愛的宣言？）第一次聽到佢點叫我。（叫你做老婆？）唔講」她完成手上工作便往度蜜月，會否趁機造人？Ivana說：「呢啲問題咁私人，唔知呢。」文：音樂組
|
鍾意就快D Share啦！
|
|
|