鄺佐輝癌病復發停化療 好友盼奇蹟
現年59歲的資深演員鄺佐輝去年證實患上腸癌，雖然病情一度轉好，但今年9月又再復發，有指他已停止化療，並靠藥物紓緩痛楚。前晚一班藝進同學會成員到過醫院探望，暴瘦的鄺佐輝仍堅強撐住，鄺佐輝昨日在電話中以極度虛弱的聲線說：「都病咗好耐，精神好差，太攰。」好友廖安麗和鄧英敏給予無限鼓勵，盼奇蹟出現。
鄺佐輝育有三名女兒，前年與比他年輕19年的內地女子再婚，惜婚後半年發現患上腸癌，未幾癌細胞擴散至肝臟，需切部份肝保命。鄺佐輝一直樂觀面對，今年3月做完第8次化療後，本以為已康復便復工。但本報收到可靠消息，原來鄺佐輝3個月前癌症復發，已留院近一個月接受治療，其間接受過一次標靶治療，惟副作用太大太辛苦，終決定停止化療。
■廖安麗與吳浣儀等前晚到醫院探望鄺佐輝。
■鄺佐輝去年發現患上腸癌，先後做過8次化療。資料圖片
■鄺佐輝病情曾好轉，8月最後一次公開亮相。
擬提前搞大壽
之後鄺佐輝接受中醫調理，不過功效不大，現只能靠飲嗎啡紓緩痛楚。記者昨日聯絡鄺佐輝，其聲線極度虛弱，問及病情時，他說：「都病咗好耐。」又稱不便往探望：「唔方便，精神好差，太攰。」記者着他好好休息，鄺佐輝謂：「好，拜拜。」
與鄺佐輝相交多年的廖安麗，前晚與吳浣儀等幾位藝進同學會成員去過醫院探望，廖安麗透露鄺佐輝的癌細胞已擴散，情況不太理想，她說：「我同佢家人好熟，知佢唔係好方便，因為佢連屋企人都唔想見，因為有壓力，但大家都好想探佢，因為佢都病得重，見面時佢都特登落床同大家影合照，佢仲話呢張係好值得紀念嘅相，影完好攰，唔想講嘢。」相中見鄺佐輝比之前消瘦好多，但仍面掛笑容。問到鄺佐輝是否末期？廖安麗說：「西醫角度係咪第四期就係末期、係咪冇得醫呢？好難講，希望有奇蹟出現！」
廖安麗表示兩個月前曾想過幫鄺佐輝搞60歲大壽，她說：「我問佢有啲咩想做，佢明年7月就60歲，原本提前擺大壽，唔係話沖喜，只覺生命無常，但估唔到身體狀況越嚟越差。」
太太每日探望
有病手停口停，鄺佐輝第一次發病時，獲藝進同學會籌款解困，問今次可需要經濟幫助？廖安麗說：「我哋一班朋友都做緊嘢，第二次睇吓籌得幾多得幾多，當係支援吓幫補吓都好，咁佢自己都有買保險，保險嗰度都有賠番錢畀佢。」藝進同學會會長麥長青則謂：「了解緊，有需要絕對會幫。」
鄺佐輝現正留醫，昨晚7時半，鄺佐輝現任妻子戴住口罩離開，被問鄺佐輝現時情況？她皺着眉頭，以半鹹淡廣東話耍手說：「（鄺佐輝）𠵱家講唔到嘢，我唔想做訪問。」是否每日探望老公？她說：「係呀。」然後匆匆離開。
採訪：魯吉、張俊銘
攝影：徐錦池、羅德光
■鄺佐輝現任太太不時陪丈夫出席活動（左圖），而鄺太昨晚離開醫院時一臉愁容。
|
鍾意就快D Share啦！
|
|
|