去年古仔與郭采潔拍阮世生執導的《巴黎假期》，雖然套戲是寰宇科水開拍，但卻是古仔引薦女友演出，兩人不避嫌在巴黎親密，寓工作於拍拖。
探熱針
古天樂掟一億拍《迷城 2》 郭采潔繼續坐正
45歲古天樂有錢靚仔又多頭髮，大把女人輪籌做樂嫂，中港台三地，古仔近年口味偏向「台菜」；過去兩年，旗下的「天下一」電影公司，已先後有三部戲由緋聞女友郭采潔孭正女主角。據知古仔有份投資、由林嶺東執導的億元製作《迷城 2》，除了人妻胡杏兒，郭采潔亦繼續坐正成為古天樂的不二選。
識做自動隱形
要做古天樂女友，其中一項先決條件是識得自動隱形。有指因為拍微電影《誰是你的菜》，古仔同郭采潔撻着，女方更為此同前度楊祐寧斬纜。雖然成為男神頭寵，但對二人的花邊新聞，郭采潔幾乎絕口不提，完全符合「神秘樂」的要求，得寵程度更加有升冇跌。
識趣聽話有獎賞！今年中將開拍，古仔有份投資兼擔正的《迷城 2》，亦預埋郭采潔。
「因為有大量動作，預計製作成本要億計，上年《迷城》上畫嗰陣，古仔已經叫林（嶺東）導籌備《迷城 2》，雖然套戲仲有其他老闆，但其他投資者都好聽古仔講，製作同搵演員都幾乎係佢話晒事。呢套主線係古仔同張孝全，上集冇乜女角，今次刻意加番兩個女仔，古仔話冇咁 dry，一個係胡杏兒，係蕭定一揮返嚟嘅，另一個梗係 Amber（郭采潔）啦。」知情者說。
鍾情台灣妹
自從二人搭上後，古仔過去已先後開了三部電影給郭采潔擔正，包括去年的賀歲片《衝上雲霄》電影版、張家輝再執導的《陀地驅魔人》，還有和吳彥祖、張孝全合作，未上映的《天火》。
「古仔覺得 Amber演戲好用心，所以俾多啲機會佢。 Amber性格開朗又識氹人，佢間唔中會買啲無無謂謂嘅小禮物氹古仔；講真，台灣女仔氹人功夫比北方佳麗仲高明，港女更加唔入流，所以近年同古仔傳緋聞嘅女星，都係來自寶島！」知情人說。
闊佬男友
有錢就有面，但有錢得嚟對女人又手鬆的，就可遇不可求！闊綽到科水開戲捧女友做主角，更加不可多得。
向華勝、張敏
已故的向華勝，當年與張敏拍拖期間，公司每逢開戲，例必搵女友做主角，由《賭神》、《鹿鼎記》、《逃學威龍》等，合作對手包括周潤發、李連杰、周星馳、劉德華，全部當時得令，直至 95年張敏淡出香港影壇。
撰文、攝影、攝錄：娛樂組
|
鍾意就快D Share啦！
|
|
|
