吼小龍女嘆串燒 吳綺莉破戒掃紅酒
【跑馬地】真寒流襲港，香港前日經歷了59年來最低溫的一天，街上行人疏落，可是《蘋果》記者前晚8時發現單親媽媽吳綺莉，冒着嚴寒，駕車載女兒卓林及翁靜晶大女劉萬儀到跑馬地一串燒店食晚飯。
吳綺莉去年遭女兒卓林大爆她經常酗酒，情緒不穩，吳當時向女兒許下承諾「飲少啲」，但前晚記者卻發現她趁女兒與萬儀嘆串燒期間，獨自到便利店買了一支紅酒，匆匆塞入背囊，然後才折返座駕接女兒。
前晚8時許，本報記者發現吳綺莉偕囡囡吳卓林到跑馬地南亭日式串燒店晚膳，與翁靜晶情同姊妹的她，亦愛屋及烏，當晚請埋翁的大女兒劉萬儀食飯。其間記者目睹吳綺莉食至中途，忽然獨自步出串燒店，在店外神不守舍地來回行了幾個圈後，才步入對面的便利店，買了一支紅酒、零食和一本雜誌，秒速將紅酒塞入背囊後，便返回串燒店結賬。
【匆匆買酒】■吳綺莉前晚與小龍女開餐期間，走到便利店買紅酒，極速放入背囊。
稱女兒未過反叛期其實去年3月，吳綺莉曾遭囡囡卓林大爆要日隊兩支酒和食安眠藥才能入睡，即使嘔吐後仍要喝，喝醉了便爆喊，卓林指母親試過酒後躲在廁所，而飲酒後情緒波動亦很大，母女更試過發生推撞。最後卓林決定報警拉阿媽，而吳綺莉亦因涉嫌虐女而被警方拘捕，兩母女關係一度緊張。為修補關係，吳綺莉當時曾向女兒承諾會「飲少啲」。言猶在耳，如今吳綺莉又被發現買酒。
當晚吳綺莉埋單離開食店後，匆匆上車吸了一支煙，便坐定定等囡囡和劉萬儀上車，只見吳綺莉和坐在車頭乘客位的卓林毫無芥蒂有講有笑。閒話家常後，吳綺莉便駕車直駛回大埔寓所。
【一臉迷茫】■吳綺莉買酒後折返串燒店外，來回踱步，一臉迷茫。
【上車煲煙】■等女兒上車期間，吳綺莉急急在車上嘆了一支煙。
事後記者致電吳綺莉，她坦言買酒純因為當晚家中有聚會，買酒只是招呼朋友，她在電話中說：「嗰日阿女話要同朋友整muffin（鬆餅），咁我咪做司機車佢哋出去，食完飯有朋友嚟我屋企傾偈，所以我咪買定啲酒同嘢食囉。講真如果我屋企有好多酒，就唔使出去買啦，我哋嗰晚五個成年人飲，你諗吓每人分得幾多，唔通夜晚同朋友聚會，叫佢哋飲普洱咩！」
問到現時和女兒關係是否有好轉？吳綺莉坦言女兒仍未過反叛期：「佢𠵱家10幾歲，始終朋輩會對佢影響大啲，有時真係教到嘔血，不過佢知我嘅性格，脾氣好惡，如果佢做嘢過份咗，會識得收，會去到一個位就唔敢再做。」
【載埋萬儀】■當晚吳綺莉母女相約翁靜晶大女兒劉萬儀食飯，最後由吳綺莉埋單。
【親子時刻】■吳綺莉和「小龍女」吳卓林（右）前晚8時許，冒着嚴寒駕車到跑馬地一間日式串燒店晚膳，兩母女在車上有傾有講，母女關係似有所改善。DV圖片
小龍女冷親請病假前日教育局首次因寒冬宣佈幼稚園和小學昨日停課一天，雖然卓林已上中學，但由於這兩天和母親同樣凍到病，因此昨日亦要請病假，吳綺莉說：「以前喺加拿大、上海住咗咁多年，就算冬天落雪都未試過好似香港呢幾日咁凍，但係呢幾日，大埔都係得攝氏2度，我要着住條虧佬褲先瞓到覺，你哋嗰晚見到我，我入面着咗四件冷衫外加一件大褸，再着埋條虧佬褲外加牛仔褲先出到街，好彩我本身瘦底，其他人先唔多覺！
「卓林平時有跟鼎爺（李家鼎）學騎馬，前兩日佢去騎馬嗰陣，颳到好大風，嗰度有個溫度計，我見到個溫度已經去到零度以下。我企喺出面望咗一陣已經頂唔順，阿女話騎咗一陣塊面已經冇咗知覺。平時鼎爺要佢跳欄，但嗰日都話凍得滯唔使啦，可能嗰日感親吓，所以就有啲唔舒服！」
採訪、攝影：畢紹基、吳耀輝
■吳綺莉不時上載與小龍女的合照上微博，母女大和解。
■小龍女與劉萬儀（左）感情要好，經常相約見面。互聯網圖片
|
鍾意就快D Share啦！
|
|
|
