香港地借錢真係容易過借火，相信大家經常都會收到銀行或財務公司打嚟問你想唔想借錢，有啲仲話唔使入息證明添。幾個月前，新婚不久嘅陳宛蔚（Calinda）屋企都中招，疑遭家傭偷咗銀行月結單，一次過借咗七間「財仔」十幾萬，最後被追數公司寄陰司紙去屋企，超恐佈！Calinda今日接受《蘋果》電話講番整件事，佢話﹕「我諗工人係有啲用我哋嘅bankstatement，有啲就自己借，佢突然話屋企人有事就飛走咗。冇 ...
香港地借錢真係容易過借火，相信大家經常都會收到銀行或財務公司打嚟問你想唔想借錢，有啲仲話唔使入息證明添。幾個月前，新婚不久嘅陳宛蔚（Calinda）屋企都中招，疑遭家傭偷咗銀行月結單，一次過借咗七間「財仔」十幾萬，最後被追數公司寄陰司紙去屋企，超恐佈！Calinda今日接受《蘋果》電話講番整件事，佢話﹕「我諗工人係有啲用我哋嘅bank statement，有啲就自己借，佢突然話屋企人有事就飛走咗。冇耐有財務公司打電話嚟屋企搵佢，對方粗口爛舌話我哋包庇佢，仲寄陰司紙嚟我哋屋企，當中夾咗屋企人嘅bank statement，話『我知你哋住邊0架，小心啲。』」Calinda同家人商議後，亦有報警求助，佢話：「好彩我哋有啲移民入境事務署發嘅信，證明工人已經離開咗，我哋唔需要承擔呢個數字，警方亦好好，間中會打嚟問仲有冇被騷擾，0依家都停止咗。」Calinda呼籲大家要好小心處理個人文件，佢話：「大家都應該買部碎紙機喺屋企，原來攞bank statement，唔使身份證都可以借錢，真係唔知仲有咩其他用途，始終係好personal嘅嘢。」Calinda黑仔事件唔止一單，早前自己張信用卡又畀人盜用作海外簽賬，佢嘆氣謂：「我睇電話短訊，突然發現有人喺英國簽賬，十分鐘過咗七條數，好奇怪。我即刻打去銀行問發生咩事，原來係一個網站不斷碌卡，數額由百幾至七百蚊左右，我梗係話唔承擔呢條數啦。我上網check過嗰間公司，原來2013年開始，已經有人試過畀佢盜用信用卡資料簽賬，銀行咁大間機構，都應該blacklist佢啦，好彩最終銀行都扣番我呢筆數，但大家都係要小心。」另外，Calinda今午喺微博貼咗張碎紙機嘅相，並表示：「家中一定要有碎紙機，私人文件小心被盗用！」
Calinda話大家都應該買部碎紙機喺屋企。(陳宛蔚微博圖片) 
(陳宛蔚微博圖片)